Eina' Sara nasaeb on, ma ama' na' Abraham ansuub
23
1-2 Eina' Sara anmaet tabu in nmoin naan toon nautn es am bo' nua mhiut (127). Tabu in nmate te, sin natuan anbin kuan Kiryat-Arba (es le' Hebron), et pah Kana'an. Na' Abraham ankae nme'-me'ul. Sin nbe'en amsa'.3 Nalalit na' Abraham annao na'euk nok atoin Hetes sin. In na'uab ma nak, 4 “Au le' ii ala atoin anao-amnemat. Au ka 'mui fa bale he 'suub au fee. On nane te kaul hi mlomi te, hi mi'sosa' maan kau nain piis es, he au 'suub au fee anbi nane.”
5 Sin nataah ma nak, 6 “On ii, aam! A'loo-loo le' ii, hai mibai ko mfain atoni mnasi'. Hai mtola' ko namneo-namneo, pah. On nane te ho mbeit kuum, bale mee es le' leko nneis, le' anmatoom nok ho 'lomim. Hai mloim mituin ahaa ho lomim, pah.”
7 Nalalit na' Abraham anfeen anhaek ma na'bees neu nain tuaf eun atoin Hetes sin nane. 8 Oka te in nak, “Kaul hi msium au haan totis fe' le' ii te, au 'toit he hi mtulun kau he mi'uab mok aam Sohar in aan mone na' Efron. 9 Amtoit miit, he kaul leko te, in na'sosa' kau in nuat fatu Makpela, le' et in po'an ninen. In ntoit fak-fauk aah, au 'baen. Au he 'baen ufeek in upan nane anbi hi matam, he nlail au pusaak. Au he uloitan he nlail hai bael subat.”
10 Tabu nane, na' Efron nok antoko nbi atoin Hetes sin nane. In neikn on anneen na' Abraham in haan totis nane. Nalalit in nhaek ma nataah na' Abraham anbi atoni mnais eun sin maatk eun ma nak, 11 “Kais on nane, aam! On ii. Au 'fee ko po'an nane luum-luumn aah, nok nain in nuat Makpela nane. Aam, ho msuub ho fee nbi nane. Au 'nona' nain nane 'bi au atoni mnais eun sin maatk enu. Maut he sin nlalin saksii.”
12 Nalalit na' Abraham na'bees antein neu atoin Hetes sin. 13 On nane te in na'uab nok na' Efron ma nak, “On le' nane msa' leko, mes hi al-aal ki mneen miit au haan totis ii fe'. Au he 'soos ufeek nain nane, maut he au 'suub au nuu anbin nane.”
14-15 Nalalit na' Efron nataah ma nak, “Nain nane in upan ala noin muti' fuan natun haa' yah. Hit he tma'oten upa' nane he tasaa'? In upan ka manenu' fa'. Amnao meik ho fee he msuub ee nai'.”
16 Na' Abraham anloim natuin upa' nane, on le' na' Efron na'uab. On nane te na' Abraham ansoi' noin muti fuan natun haa', oka te annona' sin neu na' Efron, anbi atoin Hetes sin maatk enu he sin aal sin anlalin saksii.
17-19 Es nane te, na' Abraham anpaal na' Efron in nain, anlail in pusaak. Es le' nain abit Makpela, anpaumaak kuan Mamre (es le' Hebron). In nsoos nafeek nain nane nok in po'an, in nuat, ma in hau 'naek eun ok-oke. Atoni mnasi Hetes sin aal sin anlalin saksii nak, nain nane nok ale saa'-saa' le' anbi nani nane, na' Abraham in anpaal sin ok-oke.