Eina' Sara nahoin na' Isak
21
1-7 Nalalit UISNENO natiaba' neu eina' Sara saa' le' In anba'an nalali ye. Na' Abraham namnasi yen, mes eina' Sara na'aup. Tabu in he nahoin, na' Abraham anmoin naan toon nautn es (100). Antia in taubn ate, in nahoin li'aan mone yes. Nalalit na' Abraham nakanab li'ana' nane, na' Isak (le' in otan nak, ‘in main’).Nalalit eina' Sara na'uab ma nak, “Uisneno anmoe' kau he 'main, natuin tabu ii au 'maliin. Biak eun nateenb eun, au ka neu he uhoin fa 'bi tabu au umnais on le' ii. Te kahaf, amneon ee, maski au mone namnais niis een, mes au fe' uhoin 'aan ne li'aan es. On nane te tabu ii, sekaum-sekau le' anneen lasi ii te, sin of anmanin on le' au msa'.”
Tabu in nmoin naan neno faun, na' Abraham na'heli' na' Isak, natuin Uisneno In iplenat.
Sin nliu ' eina' Hagar ma in anah na' Ismael
8 Nalalit na' Isak na'nae. Tabu sin he nsole' te, amaf na' Abraham anmoe' elaf a'naek.
9-10 Neno wes, eina' Sara nkius niit na' Abraham in fee muni' eina' Hagar in anah na' Ismael na'koke' na' Isak. On nane te eina' Sara na'uab neu in mone ma nak, “Amliu' mupoitan ate na'ko Masir nane nok in anah! Natuin au ka 'loim fa he ate in anah napein pusaak saa'-saa'. Maut he au anah na' Isak anmees es anpaal nain pusaak eun oke.”
11 Anneen eina' Sara in uaban nane te, na' Abraham natnina te ka leko fa, natuin na' Ismael nane, in anah amsa'. 12 Mes Uisneno nakua' a'an neu na' Abraham ma nak, “Abraham! Ho kais mutenab ho fee muni' nane nok in anah. Mutuin eina' Sara in i'lomin nane. Natuin Au 'ba'an ulali m'ak ho of musuuf mu'ko na' Isak. 13 Mes Au 'fee tetus amsa' 'eu ho fee muni' nane in anah. Natuin in imsa' ho naa' ma ho nesam. In sufan sin of anlalin uuf es.”
14 Nok-nok ana on nane te, na' Abraham nabalab oe ma beti' neu eina' Hagar, ma antesin oe nbi bale yes, le' anmo'e na'ko pasu. Nalalit in nafetin bifee nane ma in anah he nnaon nmesen. Oka te sin nnaon nfuun bael luman anpaumaak Beer Seba.a
15 Tabu sin oe mninu' oke' te, eina' Hagar nasaitan li'ana nane anbi hau aan' es in hafon. 16 On nane te in natenab ma nak, “Kaul in isnasan natfeek ma au 'hak-hake te, au nekak mes ansuse nmaet.” Nalalit in ntet-koit, ma nnao antook suuk na'loo na'ko li'ana nane of oin metel bo' niim. Oka te in nkae nme'-me'ul.
17 Uisneno nneen na' Ismael ankae msa', oka te In ameupt es neem na'ko sonaf neno tunan, ma nhaman eina' Hagar ma nak, “Hagar! Nasaa' am es ho msuis on le' nane? Kais mumtau, Uisneno nneen anlail ho anah in kaet. 18 Tabu ii, mfeen ma mnao mkius li'ana' nane. Mumepan ma mha'taen in nekan, natuin Au of a'moe' in sufan sin anlalin too uuf ma'tane' es.”
19 Nalalit Uisneno nfei eina' Hagar in maatn eun, ma in niit oe maat es anbi nane. On nane te in neik bael oe, ma nnao naheun oe, oka te in neki ma na'inu li'ana' nane.
20-21 On nane te na' Ismael nok in einaf natuan anbin bael luman Paran. Na'ko neno nnao neu neno, in na'nae, ma in nlail atoin aklaot leko wes. Nalalit in einaf anmafeba' nok bifee muinf es na'ko pah Masir. Lasin ii anlalin, natuin Uisneno nokan na' Ismael.
Na' Abraham ma kesel Abimelek anhaaln eun anbin Beer Seba
22 Tabu nane, kesel Abimelek, nok in meo pa'e makenat, na' Fikol, neman ma na'ekun nok na' Abraham. Kesel nane na'uab ma nak, “Abraham! Hai mihiin mak Uisneno nokan ko'. Etun ho mmoe' saa'-saa' aah, lo he nlalin on nane. 23 On nane te tabu ii, au 'toit ko he msuup ambi Uisneno In matan, mak ho of ka mputa-bliu' kau fa, mok au anah ma au upuf sin ok-oke'. Natuin au 'moe' leko 'ok ko, es nane te ho lo he mmoe' leko mok kau nbi pah ii msa'.”
24 Oka te na' Abraham nataah ma nak, “Leko, pah! Au 'suup.”
25 Mes nalalit na' Abraham ankalaak neu kesel nane ma nak, “Aam usi', ho too nuu nasiik naan au oe maat hain es.”
26 Anneen on nane te, kesel nane nataah ma nak, “Ahh! Au fe' a'neen lasi ii. Nasaa' am es ho ka m'eut kau fa na'ko afi neon aa? Au ka uhiin fa neu sekau es anmoe' on le' nane.”
27-28 Nalalit na' Abraham ma na' Abimelek anmo'en lais manba'an. Na' Abraham nait biya ma 'bib-kase ma anfee sin neu kesel. Oka te in npiil intein 'bib-kaes tipu' hiut. 29 Nalalit kesel nataan ee ma nak, “Nasaa' am es ho mmoe' on nane?”
30 Oka te, na' Abraham an'eut ma nak, “Aam usi'. Amsimo 'bib-kaes tiup eun ii, he nlalin a'taka' nak aam usi' ho mmanaku' mak au es a'hain oe hani' le' ii.”
31 Natuin sin nua sin nmo'en nlalin lais manba'an anbin bale nane, es na' sin nakanab bale nane Beer Seba. In otan nak ‘Oe 'Hain Supat’.b
32 Sin nsupan nlalin ate, kesel na' Abimelek nok in meo pa'e nfanin neu sin pah Filistin. 33 Nalalit na' Abraham anseen hau tamareskac uu' es anbi Beer Seba. Anmulai na'ko tabu nane, hau nane anfani 'taka' amnauba' neu na' Abraham, nak in na'bees neu UISNENO le' Amonit Nabal-baal anbi bale nane. 34 Nalalit na' Abraham natua on le' anao-amnemat tal a'loo anbi atoin Filistinas sin pah.