2
Nok lanan nane, Uisneno nmoe' naan neno tnanan ma pah-pinan nok in nesan ok-oke'.2 Anmoe' nalail sin aal sin, nokfa te, neon hitu' antia. On nane te In nasnaas na'ko In mepu sin nane. 3 Es nane te, In anbeit neon hitu' nane na'ko neno bian sin he nlail neno snasat, natuin In nalail In mepun nane, ma nbi neno nane, In nasnaas. 4a Nu'un le' an'eut nak Uisneno nmoe' neno tnanan ma pah-pinan, on le' nane, pah.
Uisneno nmoe' atoni ma bifee
(Na' Mateos 19:4-6; Na' Markus 10:4-9; 1 Korintus 6:16; 15:45,47; Epesus 5:31-33)
4b Tabu UISNENO fe' anmulai nmoe' neno tnanan ma pah-pinan nane te, 5-6 fe' ka nmui' fa hau saa'-saa', natuin In fe' ka nasanut fa ulan. Tabu nane, ala nmu'i yaa nipu' le' ansae na'ko nain, ma napete pah-pinan. Ma fe' ka nmui' fa mansian le' anmoe' lene. 7 Nalalit UISNENO nnau afu, ma nmo'e nlail mansian. Nalalit In nfuu nataam snasaf nleuk in panan. On nane te mansian nane anmoin tabu nane.
8 Nalalit UISNENO anmoe' naan etu wes anbi bale Eden, antoom neon-saet. On nane te In natokob mansian nane anbi bale nane. 9 Anbi etu nane In namonib ale' kanan hau sena', le' atkiso te namaas, ma taah sin ite miin-oni. In namonib amsa' hau uu' nua' anbi etu in itnanan. Kaul mansian naah hau fua' na'ko uu' es in fuan, in of anmoin nabalah. Ma kaul mansian naah na'ko uu' es antein in fuan, in nabei' nahiin lais leko ma lais amle'ut.
10 Anbi nane, anmui' naan noe yes, ansai npoi na'ko etu nane. Noe nane a'saif haa'. 11 Asait ahunut, in kanan Pison. Asait ii ansai nfuun naan pah Hawila. Anbi bale ii, nmu'i mnatu' amfa-faun. 12 Anbi bale ii msa', anmui' mnaut nesa', anmui' hau le' in oen ee foo bona', ma nmui' faut alimat. 13 Asait es antein, in kanan Gihon. Asait ii, ansai nfuun naan pah Kus.a 14 Asait es antein, in kanan Tigris. Asait le' ii nlail nakat anbi pah Asurb antoom neon-saet. Ma in asait amunit, kanan Efrat.
15 UISNENO nleek mansian nane natua nbi Eden, he npaloil etu nane lek-leko. 16 On nane te In naplenat mansian nane ma nak, “Ho mubei' he muah hau fua' saa'-saa' aah, na'ko ale' kanan hau sena' anbi etu ii. 17 Mes anmui' naan hau uu' es, le' Au 'taal ko ma'tane', he kais muah in fuan. Hau nane es le' hau sena' le' kaul mansian naah in fuan, in nabei' nahiin lais leko ma lais amle'ut. Mes kaul ho muahn ate, ho lo mees he mmaet.”
18 Nalalit UISNENO nakua' a'an antein ma nak, “Ka leko fa kaul mansian anmoni nmes-mees. On nane te Au he 'mo'e 'feen atulun ma abaabt es le' namnees nokan.”
19-20 Tabu nane UISNENO nnau afu, ma nmoe' mu'it ma kolo huma'-huma'. Nalalit In nnao nanaat sin neu mansian nane, maut he in nakanab sin. Oka te mansian nane nakanab mu'it ma kolon nane, es-es ate nok kuun in kanan. Mes neu in, ka nmui' fa atulun ma abaabt es, le' namnees nokan.
21 Nalalit UISNENO an'au natupa' mansian nane. Tabu in antuup anfiin ite, Uisneno nait naan in nui bnapa' tone' mese', nalali te In an'oeb naleko' papa' nane. 22 Ma In anmoe' bifee na'ko nuif nane. Nalalit In nnona' bifee nane neu atoni nane. 23 Tabu atoni nane niit bifee nane te, in nak,
“Haaa! Es ii fe'! Ii lo namnees nok kau!
In nuif ma in lekun paap mese' nok au nuu.
Ma in sisin ma in nesan paap mese' nok au nuu.
Natuin in nlail na'ko atoni', es au ukanab, ‘bifee’.”c
24 Natuin lasi nane, es na' atoni yes lo mees he nnao nasaitan in einaf ma in amaf,
he nmoin nabua nekaf mese' ma ansaof mese' nok in fee,
henati' sin nua sin anlalin mese'.
25 Tabu nane sin moons eun, mes sin ka nmu'in fa lais mae kle'o msa'.