Mansian ka nfiloil fa plenat Uisneno
3
Na'ko ale' kanan mu'it le' UISNENO nmoe' nain sin anbin pah-pinan ii, kauna' es aputa-bliu anesit. Anbi tabu wes, kauna' nane nataan neu bifee nane ma nak, “Hoe! Namneo, kah? Uisneno ntaal ki ma nak, ‘Ka nabei' fa he hi miah hau fua' na'ko hau seen eun anbin etu ii, ai' kahaf?”’ 2-3 Bifee nane nataah ma nak, “Kahaf! Hai mibei' miah! Mes anmui' naan hau sena' uu' es et etu tnanan le' Uisneno ntaal kai, he hai kais miah in fuan. In nak, hai kais miah in fuan, ma kais amnefo msa', natuin hai of ammaet.”
4 Mes kauna' nane nataah ma nak, “Hoe, napoib on! Hi mees ka mmaet fa, pah! 5 Namneo, Uisneno anpenan ki on nane, natuin In nahiin, kaul hi miah hau fua nane, hi hiinm eun namnees nokan. Hi of mihiin mee es leko, ma mee es amle'ut.”
6 Nalalit bifee nane ankiso te, hau sena' nane leokn ee kaah. Ma in natniin ate hau fua' nane oin minan kah. On nane te in natenab ma nak, “Kaul au 'uah hau fua' ii, au of uhiin ma 'manoe.” Nalalit in anseu hau fua' nane, ma in nahan. In neki ma nfeen in mone msa', he naah. 7 Naah nalalin on nane te, na' sin nahinen nak sin moons eun. Es nane te, sin nkaton apas hau noo' he natain.
8 Manas anmaeb on nane te, sin anneen UISNENO neem annoon etu nane. Nalalit sin naen na'tool eun henati' UISNENO kais niit sin. 9 Mes UISNENO nboin atoni nane ma nak, “Hoe! Ho et ko mee, Adam?”
10 Atoni nane nataah ma nak, “Au 'neen Ho hanam anbi ii. Mes au umaeb ok, natuin au ao monas kau. Etun au 'aen u'tolo', ahoit.”
11 Nalalit Usi' nataah ma nak, “Sekau es an'eut ko ma nak ho m'ao moons om? On mee? Of oin ho muah mulail hau fua' le' Au 'taal ee nane, ai'?”
12 In nataah ma nak, “Usi', bifee le' Ho mfee kau nane, in es anfee kau hau fua talas nane, ma au 'uahan!”
13 Nalalit UISNENO na'uab nok bifee nane ma nak, “Nasaa' am es ho mmoe' on nane?”
Ma bifee nane nataah ma nak, “Te kauna' nane es napoiba kau, ahoit! On nane te es au 'uah hau fua talas nane, ahoit.”
Uisneno nkaas sin neik hukun ma'tane'
14 Nalalit UISNENO na'uab kasat neu kauna' nane ma nak,
“Natuin ho 'mo'em nane, Au 'hukun ko. Na'ko ale' kanan mu'it, aal ho mmes-mees kuum es le' mupein kasat on ii: nmulai na'ko tabu ii tal antia ho mmaet, ho ala mnonok meki yaa ho 'basam. Ma ho mnaaht eun es afu skuku'. 15 Au of a'moe' ko mok bifee nane ammamusun piut. Ho sufam ma ho kau'm eun on nane msa'. Ho sufam ma ho ka'um sin of anlau sin haek-tiik enu. Mes in sufan es, of antuut naklati' ho 'nakam.”a
16 Nalalit Uisneno nakua' a'an neu bifee nane ma nak,
“Au of a'saot ho suset tabu ho mu'aup', ma mumeen anneisi ntein tabu ho muhoin. Mes maski on nane, ho mloim he mubua piut mok ho mone. Ma in es naplenat ko.”
17 Nalalit Usi' na'uab neu atoni nane ma nak,
“Ho ka mutuin fa Au plenat, mes mutuin ho fee ye in i'lomin, tal antia ho muah hau fua' le' Au 'taal ee nane. Es nane te, ho mupein kasat amsa'. Ma nain amsa' napein kasat. Anmulai na'ko tabu le' ii tal antia ho mmaet, ho lo mees he mmepu mbain aetn om, ma mu'foi' nain, hena' ho mupein he muah. Ammeup on nane te, na' ho mmoin. 18 Maski ho mseen ma mlua huma'-huma', mes nain ee aal napoitan kisan ma kasunat. 19 Nalalit ho lo mees he mmepu mbain aetn om ma'tane', hena' nain anfee ko mnahat. Ho lo mees he mmeup ma 'puse nsai tal ho mmaet. Au 'moe' ko na'ko afu. On nane te kaul ho mmate te, ho mfani mlail afu.”
20 Nalalit na' Adam nakanab in fee nak ‘bi Hawa’ (in otan ‘le' anmoin’), natuin bifee nane es le' nlail einaf neu ale' mansian amonit anbin pah-pinan le' ii.b
21 Nalalit UISNENO anmoe' tai-nusat na'ko pasu, ma nfeen sin he npaken.
Uisneno nliu' napoitan na' Adam ma bi Hawa
22 Nalalit UISNENO na'uab ma nak, “Tabu ii mansian eun nahinen lais leko, ma lais amle'ut, on le' Hit.c Kais tal antia sin naah hau fua' le' neki 'honis abal-balat.” 23 Nalalit In nliu' napoitan sin na'kon etu Eden, he sin nua sin annaon neun bale bian, ma nmonin on atoin atoof lene, he sin imnaimt eun na'ko afu. 24 Anliu nalail sin on nane te, Uisneno nleun In ameput sonaf neno tunan,d he nnao npao etu nane antoom neon-saet. Sin nna'an suni' le' anpiin ma ntana' neu-mneem. Usi' nleun sin he nhaken n'eka' lanan, natuin In ka nloim fa he tuaf anseu naan hau fua' le' neki 'honis abal-balat.