2 Ha'u kaloon nebee Na'i Maromak daka o, nebee o bele moris manek no dame. Nebee o isin di'ak, no neon moos di'ak. 3 Mamaluk na'in hira mai nasara baa ha'u na'ak, o tuir nohuun hanorin loos. Rona nunia, ha'u neon di'ak. 4 Ha'u kakara basuk kalo ha'u krona, ha'ukaan oa sia moris tuir hanorin loos.

5 Maluk mak ha'u kadomi! Itakaan mamaluk na'in hira nala'ok Kristus Niakaan serwisu iha okaan leo. Oras sia to'o, o simu sia di'a-di'ak hotu tulun sia. Masik o sei la matene dauk sia moos, o maliku sia di'a-di'ak nunia. 6 Oras ne'e, sia mai nikar ti'an. Sia nasara baa hutun sarani iha ne'e na'ak, o simu sia modi laran maluak. Ha'u kusu nebee o tulun bei-beik ema nu'u sia nia, tan hahalok nunia nalo Na'i Maromak neon di'ak. 7 Ema nia sia la'o nasirin baa nanorin ema nosi Yesus Kristus, mais sia la nusu tatulun sa-saa nosi ema mak la fiar baa Yesus. 8 Ita mak musti tulun sia, tan hodi nunia, ita hala'ok Na'i Maromak Niakaan serwisu bele-bele ho sia.

9 Uluk, ha'u ksolok hakerek baa hutun sarani iha okaan leo. Mais Diotrefes la titu ha'ukaan hakerek, hotu nalo aan nu'u ema ulun ida. 10 Kalo ha'u ktone emi, ha'u atu kdale loke fore niakaan hahalok aat, tan nia dale nahaat ami no la simu Na'i Maromak eman mak mai nala'ok serwisu iha emikaan leo. Kaliuk, nia sasuku mamaluk sia iha nia nebee keta simu sia.

11 Maluk mak ha'u kadomi! O musti maninu baa ema mak nalo lia di'ak. Keta maninu baa ema mak nalo lia aat. Ema mak nalo lia di'ak, Na'i Maromak eman. Mais ema mak nalo lia aat, lahoos Na'i Maromak eman.

12 Knaninuk nu'u Demetrius. Tan nia moris tuir hanorin loos, ha'u ktonu nia. Ema hotu-hotu moos tonun nia. O na'in du'uk matene ha'u kdale ne'e, tebes.

13 Sei noo lia wa'in tenik mak ha'u kakara katak baa o, mais ha'u la ko'uk kakerek iha ne'e. 14 Ha'u kaloon, la kleur ona ita hasoru malu, nebee ita rua bele dale du'uk baa malu.

15 Nunia dei! Mamaluk iha ne'e sia solok tabe. Tulun mato'o ha'ukaan tabe ne'e baa ha'ukaan mamaluk sia iha nia, tuir siakaan naran ida-idak.