Mai rona emikaan aman Isra'el ne'e atu dale!

3 Ruben! O ne'e, ha'ukaan oa ulun. Tan lia nia, ema kneter o. O ne'e, ha'ukaan kno'a no ha'ukaan liman kwana! 4 Mais o neon la metis. O la matene makara nabee! Sarebak, o toba mo ha'ukaan feen Bilha, modi madoor okaan aman toba fatik! Tan lia nia, ha'u la kfilak o baa oa ulun ona.

5 Simeon no Lewi! Emi rua ne'e, manesak dei! Emi rua beer hasusar ema hodi surik. 6 Emi beer taa siit karau baka kloor, to'o nakfeur atu mate! Emikaan a'aat ida tenik, emi ruun ne'an hodi ho'o ema! Tan hahalok nia, ha'u la kakara rona emi! Ha'u moos la kakara kahur emikaan lia! 7 Tan emikaan krakat aat liu resik nia, ha'u katuun dinu baa emi! Emi kanarak to'o la ho dadomin! Tan baa nia, emi musti hatiu du'uk emikaan a'aat nia! Nosi ikus Maromak keke karin emikaan husar-binan, to'o sia tuur keen karin malu iha rai Isra'el!

8 Yahuda! Okaan naran na'ak ‘tonu’! Okaan maun-alin sia atu tonu o nodi lo'u baa o! O moos atu tonan okaan funu sia, to'o la nakfodak! 9 O ne'e, hanesan busa fuik boot ida, mak buka biit haan du'uk! O moos hanesan busa fuik boot aman, mak fofen aan baa noku; la noo ema ida mak naksakar aan koen o! O moos hanesan busa fuik boot inan, mak daka oan: la noo ema ida mak naksakar aan koen o! Ema nakerat o, to'o la noo ida mak naksakar aan atu nalo oi-oik baa o! 10 Loron ikus, o atu kaer ukun! Okaan husar-binan moos atu kaer ukun tuir malu, to'o noo husar-binan ida mak beran kaliuk mak tuur kaer ukun nia! Hotu, ema klubun hotu-hotu atu lo'u-sudur no rona baa Nia!^a 11-12 O atu moris di'ak! O makara saa, iha! Okaan bibi no karau no to'os isin moos hetak wa'in tu'an, to'o soe hahaat. O maa-memu midar nohuun.

13 Sebulon! Rai mak dadi okaan bein sasoin, niakaan luan nosi tasi tehen to'o kladik no kota Sidon. Roo tasi nosi rai seluk sia tama soe sao mamatek iha okaan namon!

14-15 Isaskar! O ne'e biit hanesan kuda keledai! Mais kalo o toba ti'an iha dalan klaran,^b la no ida bele fu'a nadeer o, nebee la'o liu! Kalo o maree mola leo di'ak ida iha sorin balu nebaa, masik ida la naruka moos, o matiu mola okaan naha sia, modi baa! O ne'e, nunia ona!

16 Dan! Okaan naran ‘Dan’ ne'e, lia isin na'ak ‘maktetu no makotu lia’! O mo okaan husar-binan atu natetu no nakotu okaan ema klubun lian, nalo tetuk no nesan! Hotu, o dadi maun bodik ema hunun sia iha Isra'el! 17 O ne'e moos, karonak hanesan samea mahoo raso mak no'i noku iha dalan tehen! Kalo ema sa'e kuda liu nia, teki-tekis o tutu kuda nuban, to'o ema mak sa'e monu!

20 Aser! Nosi ikus, okaan to'os isin kabaas lo-loos! To'o o bele malo tubi midar oi-oik. Hotu na'in sia mai sosa iha o!

21 Naftali! O ne'e, hanesan bibi fuik mak nakbois sai, tan la noo ema ida bele lituk nola o! O moos metan oan kabaas sia!

22 Yusuf! O ne'e, hanesan ai mane'ek mak moris kre'is wee matan! Okaan sorun sia nane'e sa'e baa kadidin fatuk aas sia!^c 23 Noo ema mak rai hirus baa o, hanesan funu nana dama baa o! 24 Mais Na'i Maromak mak ha'u klo'u-sudur baa, Nia nanis tulun o! Nia nakbiit okaan liman, to'o o bele sakar funu sia modi dama, masik mosi dook! O bele matoba mola sia, tan Maromak tulun o. Nia mak beran boot kaliuk! Tan lia nia, ha'u kakrai aan baa Nia! Nia mak daka ha'u! 25 Nia moos daka o nodi foo matak-malirin baa o. Matak-malirin nosi lale'an, matak-malirin nosi raiklaran, no matak-malirin to'o hetan oan wa'in mak isin di'ak! 26 Matak-malirin mak ha'u kusu foo baa o ne'e, kasalak liu nosi foho mak nariik nafati sia! Nebee matak-malirin hotu-hotu ne'e, nakduar baa o. Tan o ne'e, liu mosi okaan maun-alin sia hotu-hotu!

27 Benyamin! O sakar manesak no asu fuik mak salaen! Seisawan oan, nia tama rai kohi haan, hotu naa. Mais kalan, nia fa'e haan resin baa oan sia! Okaan husar-binan moos, atu maka'as nunia!”