Yakob nusu matak-malirin bodik Yusuf oan Efraim no Manase
48
Nunia hotu, Yusuf fila. La kleur, ema mai katak na'ak, aman moras todan. Rona nola nunia, Yusuf bolu nola niakaan oan na'in rua, mak Manase no Efraim. Hotu sia baa naree Yakob. 2 Baa oras Yakob rona na'ak, Yusuf no oan sia mai, nia naka'as aan nadeer tuur baa toba fatik.3 Hotu, nia katak baa Yusuf na'ak, “Oa Yusuf! Hori hirak nia, Maromak natadu aan baa ha'u iha leo Lus iha rai Kana'an. Nia mak Beran Boot Kaliuk. Nia nameno baa ha'u iha nebaa 4 na'ak, ‘Ha'u atu kalo okaan husar-binan sia hetak wa'in tu'an, nebee sia dadi klibur boot! Ha'u atu kfoo rai ne'e bodik sia, nebee dadi bein sasoin, to'o rai falu fila!’
5 Tan lia nia, oras ne'e ha'u atu katak lia ida bodik okaan oan Efraim no Manase. Natoon baa ha'u kmai iha Mesir, sia rua moris ti'an. Masik nunia moos, oras ne'e ha'u kalo sia dadi baa ha'ukaan oan du'uk, hanesan okaan maun Ruben no Simeon! 6 Mais nosi ikus, kalo o metan oan tenik, filak sia nu'u okaan oan du'uk. Sia musti simu sasoin nosi maun Efraim no Manase. 7 Ha'u kalo nunia, atu kodi temi okaan inan Rahel. Tan oras ami fila hikar hosi Mesopotamia atu baa Kana'an, okaan inan mate nahoris iha dalan. Nia mate kre'is baa leo Efrata, iha rai Kana'an. Oras nia, ha'u laran moras resik, tan kakoi okaan inan iha dalan tehen baa leo Efrata!” (Oras ne'e, ema nanaran leo nia na'ak, Betlehem.)
8 Dale notu nunia, Yakoba foti oin nodi titu baa Yusuf oan sia. Hotu nia nusu Yusuf na'ak, “Sia ne'e, see niakaan oan sia?”
9 Yusuf nataa na'ak, “Ne'e sia, ama bein oan sia mak Na'i Maromak foo ti'an baa ha'u iha rai Mesir ne'e!”
Rona nunia, Yakob katak na'ak, “Kalo nunia, mare'is oan sia mai ha'u. Ha'u atu kamulak kodi kaloon nebee Maromak natuun matak-malirin baa sia!” 10 Tan Yakob katuas ti'an, matan malahuk ona. Nia titu la malorek ti'an. Rona aman naruka nunia, Yusuf nare'is oan sia baa Yakob. Hotu, Yakob nako'ak nodi de'i sia rua. 11 Hotu, Yakob dale tenik no Yusuf na'ak, “Kleur ti'an ha'u ka'ak falik la kasoru o ona! Mais oras ne'e Maromak nalo liu tenik, to'o ha'u moos bele karee okaan oan sia!”
12 Hotu, Yusuf dada sees oan sia nosi Yakob.b Hotu nia nakni'a nodi sudur baa aman. 13 Hotu, nia nariik. Nia moos dada nare'is tenik oan rua nia baa aman Yakob, nebee nia namulak nodi nusu matak-malirin baa sia. Yusuf nariik oan ulun Manase iha Yakob sorin kwana. Oan nomer rua Efraim iha karuk. 14 Mais, baa oras Yakob rai liman baa sia atu namulak, Yakob rai seluk liman. Nia rai liman kwana baa alin Efraim ulun, liman karuk baa maun Manase ulun. 15 Hotu, nia namulak nusu matak-malirin bodik Yusuf na'ak,
“Okaan bein Isak aman Abraham,
no okaan bein Isak du'uk,
sia rua moris tuir bei-beik Maromak hakaran.
Maromak moos naliku ti'an ha'u, hori sei nurak to'o oras ne'e!
16 Maromak sori ha'u ti'an nosi maufinu oi-oik.c
Tan lia nia, ha'u moos kaloon, nebee Nia natuun matak-malirin baa oan ne'e sia no siakaan husar-binan.
Hanoin. Kalo sia namulak baa Maromak,
sia keta nalu'a temi bei Abraham naran, no bei Isak naran no ha'ukaan naran!
Hodi nunia, siakaan husar-binan hetak wa'in tu'an,
dadi klubun boot iha raiklaran ne'e!”
17 Yakob namulak nunia, mais baa oras Yusuf naree aman rai liman kwana baa alin Efraim ulun, nia moos kaer nola aman liman nia, atu rai seluk baa maun Manase ulun. 18 Nia katak baa aman na'ak, “Ama! Keta malo nunia! Oan ulun lahoos Efraim, tan Manase nahali Efraim! Ama musti rai liman kwana baa maun Manase ulun, tan nia mak oa ulun.”
19 Mais aman Yakob la no'uk. Nia dale na'ak, “Oa! Ha'u katene nanis! Nosi ikus Manase dadi ema boot. Niakaan husar-binan moos hetak wa'in tu'an, to'o dadi ema klubun boot! Mais alin Efraim atu dadi ema boot liu tan tenik! Niakaan husar-binan sia moos wa'in liu resik, to'o dadi baa ema klubun wa'in mak boot liu tan tenik!”
20 Hotu Yakob katak baa lawarik rua nia na'ak, “Nosi ikus, kalo ema Isra'el naloon baa Na'i Maromak, nebee natuun matak-malirin baa ema, sia atu temi emikaan naran. Sia atu naloon na'ak, ‘Nebee Na'i Maromak natuun matak-malirin baa o, hanesan Nia natuun ti'an matak-malirin baa Efraim no Manase!’”
Hodi nunia, Yakob temi uluk alin Efraim naran, foin maun Manase naran.
21 Hotu Yakob katak baa Yusuf na'ak, “Oa! La kleur ha'u kmate ona! Mais Na'i Maromak nanis tulun emi! Nia atu nodi fila emi baa emikaan bei uluk rain. 22 Oras ne'e, ha'u klatan baa o liu nosi okaan maun-alin sia! Tan ha'u klatan tu'an baa o, foho iha rai Kana'an mak uluk ha'u kola ti'an kosi ema Amori, baa oras ha'u katuda ko sia!”