Na'i Mesir latan rai baa Yusuf familin sia
47
1-2 Katak ti'an baa maun-alin sia, Yusuf no mane malun na'in lima baa nasoru kedan na'in. Yusuf nasara baa na'in na'ak, “Ama na'i boot! Ama atan oan sia, ha'ukaan aman no ha'ukaan maun-alin sia, to'o mai ti'an nosi Kana'an. Sia mai nodi siakaan bibi, bibi malae, karau baka no naha sia hotu-hotu. Oras ne'e, sia hotu-hotu iha rai Gosen ti'an!” Yusuf nasara nunia ti'an, nia moos naruka mane malun na'in lima nia, ida-idak katak naran baa ama na'i. 3 Hotu na'i nusu baa sia na'ak, “Emi serwisu saa?”
Sia nataa na'ak, “Ama atan ami ne'e, ema makbalin, hanesan amikaan bei uluk sia. 4 Oras ne'e, rai loro falin naruk basuk iha amikaan rai Kana'an, to'o haan no hae la iha ti'an. Tan baa nia, ata ami ne'e, mai iha rai ne'e atu hein heik. Ami ata moos hodi bibi no karau oan sia. Ami ata haloon baa ama na'i boot, nebee foo leet baa ami ata ne'e bele hein heik iha rai Gosen, atu hodi haliku bibi no karau oan sia.”
5 Rona ti'an nunia, na'in katak sain niakaan hakaran baa Yusuf na'ak, “Oras ne'e, o aman no o maun-alin sia mai baa o ti'an! 6 Sia bele nalo rai ne'e, nu'u siakaan rain du'uk! Ha'u katene rai Gosen nia, rai di'ak kaliuk iha Mesir ne'e! Tan baa nia, di'ak liu sia tuur iha nebaa ona! Kalo noo nosi sia, mak natene naliku bibi no karau nalo kabaas, sia moos bele naliku ha'ukaan sia iha nebaa!”
7 Na'in dale hotu nunia, Yusuf natudu niakaan ama Yakob baa na'in. Yakob moos namulak kedan nodi naloon nebee Na'i Maromak natuun matak-malirin baa na'i.
8 Hotu na'in nusu baa Yakob na'ak, “Ama! Ita otas tinan hira ona?”
9 Yakob nataa na'ak, “Ha'u kmoris tinan atus ida tolu nulu ona, mais la tuur metin iha fatin ida. Ha'ukaan bei uluk sia moos nunia. Kalo ha'u kanesa baa sia, ha'ukaan otas sei badak liu sia, mais ha'ukaan moris nakonu no susar.” 10 Dale notu nunia, Yakob moos tami na'i. Mais sei la sai dauk, nia namulak nodi naloon tenik, nebee Na'i Maromak natuun matak-malirin bodik na'i.
11 Nasoru na'in ti'an, Yusuf nalo tuir na'in harukan, nodi baa natudu fatin iha rai Gosen bodik aman no maun-alin sia. Fatin nia di'ak liu resik. (Nosi ikus, Yakob sia nanaran fatin nia na'ak, Rameses.) Sia tuur nafati iha nia. 12 Hotu, Yusuf naliku nodi foo haan baa aman, no maun-alin sia, no siakaan feen-oan sia hotu-hotu, sura tuir uma kain ki'ik no boot.
Rai salaen hetak naruk iha Mesir
13 Baa oras nia, rai salaen hetak naruk, to'o la no haan ti'an iha rai Mesir to'o rai Kana'an. Ema hotu-hotu isin olek, tan salaen. 14 Tan baa nia, sia mai atu sosa haan iha Yusuf. Hotu, Yusuf libur nola haan folin sia hotu-hotu, nodi baa rai iha na'in tofatik. 15 Loron ikus, ema Mesir no ema Kana'an osan sia mohu ti'an, to'o la bele sosa haan ona. Tan baa nia, sia baa Yusuf nodi na'ak, “Ama boot! Ama foo haan lai, nebee ami keta mate salaen! Tan amikaan osan mohu ti'an!”
16 Yusuf nataa na'ak, “So'in! Bele sosa haan hodi bibi no karau!” 17 Rona nola nunia, ema sosa haan nodi kuda, bibi, bibi malae, karau baka no kuda keledai. Sia nalo nunia, tan Yusuf nameno nunia ti'an.
18 Tinan oin tenik, ema sia mai tenik baa Yusuf nodi na'ak, “Ama boot! Ami katak malolok dei! Amikaan osan no amikaan bibi no karau sia mohu ti'an! Hela mesan amikaan isin lolon no amikaan rain dei! 19 Ama keta habusik ami mate! Tan kalo ami mate, see mak babilan rai nia sia? Di'ak liu, ami mataroos baa ama boot! Ama boot bele hola amikaan rain sia, mais foo fini, nebee ami furi bodik ama boot! Hodi nunia, ama boot bele selu ami hodi haan. Surak ami keta mate!”
20 Tan rai salaen nia hetak tu'an, ema Mesir sia fa'an hotu rai sia baa Yusuf. Yusuf sosa nola hotu-hotu, nalo baa na'in bein sasoin. 21 Hodi nunia, renu Mesir sia hotu-hotu dadi mataroos bodik na'in.a 22 Mais Yusuf la sosa nola na'ilulik rain, tan sia netan haan bei-beik nosi na'in. Tan baa nia, na'ilulik sia la fa'an siakaan rain.
23 Baa loron nia, Yusuf katak baa renu sia na'ak, “Oras ne'e, emi hotu-hotu atu dadi mataroos bodik ama na'i, tan emikaan rain sia, ha'u ksosa kotu ti'an bodik ama na'i! Dadi, emi musti hola fini ne'e, hodi baa furi ona! 24 Baa oras emi ku'u, halo baa fa'ek lima. Fa'ek ida, hatama baa ama na'i. Fa'ek haat, halo baa fini no halo baa haan bodik emi.”
25 Rona nola nunia, sia simu na'ak, “Ama boot sori ami ti'an nosi salaen boot ne'e. Tan baa nia, ami atu dadi mataroos baa ama na'i. Hodi nunia, ami bele sera dodan baa ama boot.”
26 Nosi ikus, hahalok mak Yusuf nalo nia, dadi ukun baa rai Mesir tomak. Hare mak renu sia ku'u, musti fa'e baa fa'ek lima. Fa'ek ida hatama baa na'in. Fa'ek haat bodik sia du'uk. Sia nala'ok ukun nia iha Mesir to'o oras ne'e. Hela mesan na'ilulik rain sia dei mak na'in la nola.
Yusuf namate lia atu nakoi aman Yakob iha siakaan bei uluk rate fatik
27 Nahuu hori nia, ema Isra'el sia tuur nametin aan iha rai Gosen, to'o sia soi iha nia. Siakaan husar-binan moos hetak wa'in tu'an.
28 Yakob nein iha rai Mesir, to'o tinan sanulu resin hitu. Hotu, nia mate baa otas tinan atus ida haat nulu resin hitu. 29 Kre'is atu mate, Yakob bolu nola oan Yusuf nodi na'ak, “Oa! Ha'u koran la kleur Na'i Maromak bolu nikar ha'u ona! Tan baa nia, kalo o madomi ha'u, mamate lia mo ha'u, nebee o keta makoi ha'u iha rai Mesir ne'e! 30 Kalo ha'u kmate, o musti modi mikar ha'u baa makoi iha itakaan bei uluk rate fatik! Ha'u kakara nunia!”
Yusuf nataa na'ak, “Di'ak ama! Kalo ama nakara ti'an nunia, ha'u moos tuir!”
31 Yakob moos simu na'ak, “Kalo nunia, oa, o marai aan ma'ak o atu tuir tebe-tebes o aman hakaran!”
Yusuf moos narai aan kedan, tuir aman hakaran. Hotu, aman moos nakni'a iha toba fatik nodi namulak sera dodan baa Na'i Maromak.