Yakob no husar-binan sia nadi'a aan atu baa rai Mesir
46
Nunia hotu, Yakoba nahulin naha hotu-hotu atu la'o nela rai Kana'an. To'o leo Barseba, nia nalo sera tunun, nodi natetu baa Na'i Maromak mak uluk niakaan ama Isak lo'u-sudur baa. 2 Baa kalan ida, Yakob me'i. Nia rona Maromak bolu nia na'ak, “Yakob! Yakob! Madeer! Rona mai!”
Hotu, Yakob nataa na'ak, “Ha'u iha ne'e, Ama.”
3 Hotu Maromak katak na'ak,“Ha'u ne'e Maromak mak okaan ama tonu nanis baa hori uluk! Keta mata'uk baa Mesir! Tan Ha'u atu kalo okaan husar-binan dadi klubun boot iha nebaa! 4 Ha'u kla'o ko o baa Mesir! Loron ikus, Ha'u moos kodi kikar okaan husar-binan fila mai rai Kana'an! Baa oras o mate, o oan Yusuf mak toma o nawan!”
5 Me'i notu ti'an, Yakob no oan siab la'o nela leo Barseba. Nia no feen-oan sa'e kareta mak na'in solok nia. Sia hotu-hotu nahuu la'o baa Mesir. 6-7 Sia nodi bein sasoin no bibi no karau hotu-hotu mak sia netan iha rai Kana'an. Yakob baa Mesir nia, no oan feto, oan mane, no bein oan sia hotu-hotu.
Yakob familin mak lori tuir baa Mesir
8 Yakob funan klaut mak lori tuir baa Mesir, mak ne'e:c
10 Simeon, no oan na'in neen mak: Yemuel, Yamin, Ohad, Yakin no Sohar; no oan tenik mak Saul, nosi feen ema Kana'an.
11 Lewi, no oan na'in tolu mak: Gerson, Kehat no Merari.
12 Tuir loos, Yahuda no oan na'in lima, mak: Er, Onan, Sela, Peres no Sera. Mais, Er no Onan mate ti'an iha Kana'an. Yahuda nodi no Peres oan na'in rua mak: Hesron no Hamul.
13 Isaskar, no oan na'in haat mak: Tola, Pua, Ayub no Simron.
14 Sebulon, no oan na'in tolu mak: Sered, Elon no Yahleel.
15 Yakob no oan mane na'in neen nia, no tenik oan feto ida, naran Dina. Sia ne'e, funan klaut nosi Yakob no feen Lea, baa oras sia tuur iha Mesopotamia. Yakob no Lea oa feto, oa mane no bei oan hotu-hotu, na'in tolu nulu resin tolu.
16 Yakob moos no oan nosi feen ki'ik, naran Silpa. Oan ida naran Gad. Gad oan na'in hitu mak: Sifion, Hagi, Suni, Esbon, Eri, Arodi no Areli.
17 Oan ida tenik, naran Aser. Aser oan na'in lima mak: Yimna, Yiswa, Yiswi, Beria, no alin feto, naran Sera.
Beria moos no oan na'in rua mak: Heber no Malkiel.
18 Yakob no Silpa funan klaut hotu-hotu, na'in sanulu resin neen. Silpa ne'e, ata feto mak uluk Laban foo baa niakaan oan feto Lea, mak Yakob feen kawa'ik nia.
19 Yakob feen ida seluk, naran Rahel. Siakaan oan na'in rua mak: Yusuf no Benyamin. 20 Oras nia, Yusuf nola feto Mesir ida ti'an, naran Asnat. Asnat aman, naran Potifera, mak na'ilulik ulun iha kota On. Yusuf no Asnat oan na'in rua mak: Efraim no Manase.
21 Benyamin moos baa Mesir, nodi oan na'in sanulu mak: Bela, Beker, Asibel, Gera, Naaman, Ehi, Ros, Mupim, Hupim no Ared.
22 Yakob no Rahel funan klaut hotu-hotu, na'in sanulu resin haat.
23 Yakob feen ki'ik ida tenik, naran Bilha. Siakaan oan na'in rua mak: Dan no Naftali.
Dan oan ida naran Husim.
24 Naftali oan na'in haat mak: Yasel, Guni, Yeser no Silem.
25 Yakob no Bilha funan klaut hotu-hotu, na'in hitu. Bilha ne'e, ata feto mak uluk Rahel netan nosi niakaan ama Laban.
26 Yakob funan klaut hotu-hotu mak lori nosi Kana'an baa Mesir, ema na'in neen nulu resin neen. 27 Tu'an baa Yusuf oan na'in rua iha Mesir, Yakob funan klaut hotu-hotu mak tuur iha rai Mesir, na'in hitu nulu.
Yakob nasoru nikar oan Yusuf
28 Oras Yakob sia nare'is aan baa rai Mesir, nia naruka oan Yahuda la'o uluk baa bolu Yusuf, nebee mai nasoru sia iha rai Gosen. Sia to'o rai Gosen, 29 Yusuf moos sa'e kareta atu baa nasoru aman iha nia. Baa oras sia rua aman oan nasoru malu ti'an, Yusuf nako'ak aman nodi tanis kleur basuk.
30 Hotu, Yakob dale no oan Yusuf na'ak, “Adeei, oa! Oras ne'e, ha'u karee o ti'an kodi matan du'uk! Ha'u katene ti'an, o sei moris! Masik oras ne'e ha'u kmate moos, di'ak!”
31 Rona ti'an aman lian nunia, Yusuf katak baa maun-alin sia hotu-hotu na'ak, “Ha'u kmusti baa kasara baa ama na'i ka'ak, ha'ukaan familin sia mai ti'an nosi rai Kana'an. 32 Ha'u moos katak sain ka'ak emi ne'e, makbalin. Tan baa nia, emi mai ne'e, emi hodi kedan bibi no karau no bein sasoin sia hosi rai Kana'an. 33 Kalo oras ida ama na'i bolu emi, hotu nusu emi na'ak, emi serwisu saa, 34 emi musti hasara baa nia ha'ak, emi makbalin hori sei ki'ik to'o oras ne'e, hanesan emikaan bei uluk sia. Hodi nunia, ama na'i atu naruka emi tuur iha rai Gosen.” Yusuf katak nunia, tan ema Mesir sia noran nakribi, kalo sia tuur namutuk fatin ida no ema makbalin.