Yusuf nalore aan nodi nusu nebee aman no maun-alin sia lori mai rai Mesir
45
Rona nola Yahuda dale nunia, Yusuf laran dodok basuk, to'o la bele naterus nola iha klosan sia oin ona. Tan baa nia, nia naruka klosan sia sai, nebee nia bele mesan no maun-alin sia. Hodi nunia, nia bele katak sain na'ak nia ne'e, see. 2 Klosan sia sai hotu, Yusuf tanis nodi nakrake, to'o ema Mesir iha ke'an molin no iha na'in uman moos bele rona.3 Hotu, Yusuf katak sain lia baa maun-alin sia na'ak, “Mane malun sia! Ha'u ne'e, Yusuf, emikaan maun no emikaan alin! Ama sei moris tebes ka?”
Mais Yusuf maun-alin sia la nataa saa ida, sia tan nata'uk basuk.
4 Hotu, Yusuf baku liman bolu sia na'ak, “Kre'is mai lai!”
Sia moos nare'is aan baa nia. Hotu nia katak tenik na'ak, “Ha'u ne'e, Yusuf, mak hori uluk nia, emi fa'an lakon baa Mesir! 5 Tebes, emi fa'an lakon ha'u ti'an! Mais keta hata'uk. Keta tula sala malu! Maromak du'uk mak nodi ha'u kmai iha rai ne'e! Nodi dalan oin nunia, Nia nodi ha'u ksori ema lear nosi mate salaen!
6 Oras ne'e, rai salaen foin tinan rua laran! Sei tinan lima tenik. Baa tinan lima nia laran, ema la fila rai, la furi, no la netan rai isin ida kois! 7 Mais Maromak nodi ha'u kmai uluk emi iha ne'e, nebee emi ho emikaan bein oan sia bele hetan moris. Maromak Niakaan hahalok ne'e, maka'as tebes!
8 Ha'u kmai ne'e, lahoos tan emikaan hahalok, mais tan Maromak Niakaan hahalok! Nia mak nalo ha'u kdadi baa na'in liman kwana. Ha'u moos dadi ulun iha na'in tofatik fohorai! La no ema seluk mak boot liu ha'u iha rai Mesir ne'e!
9 Oras ne'e, emi lai-lais fila ona! To'o uma, katak baa ama nune'e: ‘Ama oan Yusuf sei moris. Nia dadi ema boot ti'an iha rai Mesir. Nia nusu ama baa lai-lais Mesir! 10 Ama bele tuur iha rai Gosen, kre'is no Yusuf. Fatin nia, fatin di'ak no luan. Iha fatin nia, ama bele nakiak bibi no karau. Yusuf moos nusu, nebee ama baa bele-bele no ama oan sia no bein oan sia. Naha uma laran no sasoin sia hotu-hotu, hodi bele, nebee tuur hafati iha nebaa. 11 Kalo ama tuur iha rai Gosen, Yusuf bele naliku ama. Rai salaen sei tinan lima. Tan baa nia, Yusuf atu naliku ama no familin sia, no ama niakaan bibi no karau sia hotu-hotu, nebee keta susar sa-saa.’”
12 Katak hotu nunia, Yusuf natebes tenik na'ak, “Oras ne'e, emi na'in haree du'uk! O moos nunia, Benyamin! Ha'u ne'e, Yusuf! 13 Fila baa, katak ama ha'ak ha'ukaan beran iha Mesir, boot lo-loos! Emi moos musti katak malorek nosi sa-saa hotu-hotu mak emi haree ti'an! Hotu, emi lai-lais hodi ama mai!”
14 Dale hotu ti'an, Yusuf nako'ak nola alin Benyamin. Sia rua moos tanis. 15 Hotu Yusuf nako'ak maun sia ida-idak nodi de'i. Nunia hotu, foin maun-alin sia nahuu dale no nia.
Na'i Mesir simu Yusuf maun-alin sia
16 Oras Na'i Mesir no niakaan ema sia rona na'ak Yusuf maun-alin sia mai ti'an, sia hotu-hotu neon di'ak. 17 Na'in moos katak baa Yusuf na'ak, “Yusuf! Katak baa okaan maun-alin sia, nebee tula hare baa kuda keledai nodi fila baa Kana'an! 18 Maruka sia baa nola okaan aman no okaan familin sia hotu-hotu, lori mai ne'e! Ha'u atu kfoo rai ida mak boran basuk iha Mesir ne'e bodik sia. Sia bele moris nodi naa nosi rai nia isin. 19 Maruka sia dada nodi kedan kareta hira sia nosi ne'e, nebee bele tula lawarik ki'ik oan sia no okaan aman. 20 Sia keta hanoin sasoin oi-oik tenik. Tan sia atu netan sa-saa hotu mak di'ak kaliuk iha rai Mesir ne'e!”
21 Rona na'in lian nia, Yusuf moos foo kareta hira no bakae baa maun-alin sia, tuir na'in harukan. Maun-alin siaa moos nadi'a aan fila, tuir na'in harukan. 22 Yusuf moos foo faru foun baa maun sia ida-idak tahan ida. Mais baa alin Benyamin, nia foo osan murak tomak atus tolu, no faru foun tahan lima. 23 Nia moos solok baa aman, sa-saa mak kabaas liu iha Mesir. Sia tula naha sia baa kuda keledai aman matan sanulu. Nia foo tu'an hare, tubi, no haan oi-oik mak sia tula tenik baa kuda keledai inan matan sanulu, nebee nalo baa bakae, baa oras sia mai nikar Mesir. 24 Nunia hotu, Yusuf nabusik sia fila nodi foo natene na'ak, “Emi keta toe malu iha dalan!”
Yakob rona na'ak Yusuf sei moris
25 Hotu, Yusuf maun-alin sia fila baa siakaan aman iha rai Kana'an. 26 To'o nebaa, sia katak baa aman na'ak, “Ama! Ama oan Yusuf sei moris! Nia dadi ema boot ti'an mak kaer ukun iha rai Mesir!”
Rona nola nunia, Yakob nakaka loos, tan nia la fiar. 27 Mais oras sia katak Yusuf mamenon, no oras Yakob naree kareta mak Yusuf solok mai atu hodi tula nia baa Mesir, foin nia fiar. 28 Hotu Yakob moos dale na'ak, “Adeei! Ha'ukaan oan Yusuf sei moris ka? Nunia, foin ha'u neon di'ak! Ha'u kmusti baa karee nia lai, foin ha'u kmate!”