Yusuf hemun fatik murak lakon
44
Sia naa hotu ti'an, Yusuf naruka klosan serwisu ulun na'ak, “O baa matama hare baa siakaan kakaluk ida-idak, to'o nakonu. Hotu, matama mikar siakaan osan ida-idak baa kakaluk! 2 Hotu ti'an, foti mola ha'ukaan hemun fatik murak, matama baa oa ikun kakaluk!” Rona nola nunia, klosan nia moos nalo tuir.3 Seisawan oan, Yusuf maun sia tami atu fila. Sia la'o nodi kuda keledai mak tula haan. 4 Sia sei la la'o dook nosi kota nia, Yusuf katak baa klosan ulun nia na'ak, “O lai-lais baa tuir ema sia lai! Toma sia ti'an, ma'ak nune'e: ‘Tan saa emi hase'i hahalok aat ho ama boot? Emi selu niakaan dadi'ak, hodi hahalok aat nune'e ka? 5 Tan saa emi hana'o hodi ama boot hemun fatik murak? Emi la hatene ka? Fatik murak nia, lahoos bodik hemun dei! Mais nodi buka moris loron ikus! Buat nia, buat lulik! Emikaan hahalok ne'e, aat resik!’”
6 Rona nola nunia, klosan nia moos tuir sia to'o netan. Nia katak baa sia, tuir Yusuf harukan.
7 Mais sia sakar na'ak “Ama na'ak nunabee? Maromak naree ami! Ami la bele halo aat nunia! 8 Ama du'uk matene! Osan iha kakaluk laran hori hirak nia sia, ami foo fila ti'an. Nunabee ami bele hana'o hola ama ulun niakaan mean-mutin hosi uma laran! 9 Ama, mai maree du'uk baa! Kalo hetan buat nia iha see niakaan kakaluk, taa ukun mate baa nia! Ami rumak sia moos dadi baa ata!”
10 Hotu klosan simu na'ak, “Lale! Nune'e dei! Hetan iha see, nia mak dadi baa ha'ukaan atan. Emi rumak sia bele fila!”
11 Hotu sia natuun lai-lais kakaluk nodi kore. 12 Klosan naree sura kakaluk, nahuu nosi maun ulun niakaan, to'o alin ikun niakaan. Nia netan hemun fatik nia iha Benyamin kakaluk.
13 Naree nunia, Benyamin maun sia laran dodok tebes. Sia moos nasa'e nikar kakaluk baa kuda keledai, hotu fila baa kota.
14 To'o Yusuf uman baa, Yusuf sei iha nia. Sia tama nodi nakni'a sudur baa nia. 15 Yusuf nakanas na'ak, “Tan saa emi halo nune'e? Arumak emi la hatene, ema boot nu'u ha'u ne'e bele leno hodi buka ema lian kabun laran?”
16 Rona nola nunia, Yahuda nataa na'ak, “Adeei! Maromak loke malorek amikaan salan sia ti'an! Ami atu ha'ak saa tenik, ama! Ami atu haloos aan nunabee tenik? Kalo ama neti natoos amikaan alin ikun ne'e, di'ak liu ama neti natoos ami hotu, dadi baa ata.”
17 Mais Yusuf nataa na'ak, “Lale! Hetan iha see, nia mak dadi ha'ukaan atan! Emi seluk sia, bele fila baa emikaan aman!”
Yahuda nusu nebee nia seluk Benyamin
18 Rona Yusuf dale nunia, Yahuda nare'is aan baa Yusuf nodi na'ak, “Ama boot. Ha'u katene ama beran hanesan na'i boot. Dadi kakro'an ama keta kanarak ha'u. Kalo bele, foo leet baa ha'u atu katak lia ida baa ama! 19 Hori hirak nia, ama boot nusu ami na'ak, ‘Emikaan ama no emikaan alin sei iha ka?’
20 Hotu, ami hataa ha'ak, ‘Amikaan ama no amikaan ali ikun sei iha. Oras ali ikun nia moris, amikaan ama katuas ti'an. Ali ikun maun susu na'in ida, mais la iha ti'an. Siakaan inan mate ti'an. Oras ne'e ali ikun mesan dei ti'an. Tan baa nia, amikaan ama dadobe nia tebes.’
21 Ami dale hotu baa ama boot nunia ti'an, ama naruka ami hodi alin ikun mai ne'e, nebee ama boot bele naree nia. 22 Ami hataa ha'ak, lawarik nia la bele la'o nela niakaan ama. Kalo la'o nela, nanis aman mate.
23 Hotu ama boot moos nataa ami na'ak, ‘Kalo emi la hodi alin nia mai, emi keta mai ona.’
24 Rona nola ama boot lia nia, ami moos fila. To'o baa, ami katak ama boot lia fuan sia hotu baa amikaan ama. 25 La kleur, amikaan haan moos. Hotu amikaan ama naruka ami mai hikar Mesir, atu sosa tenik haan. 26 Mais ami hataa ha'ak, ‘Ama! Ami la bele baa hikar! Na'in liman kwana nia na'ak, kalo ami la hodi alin ikun baa, ami keta mai ona! Tan baa nia, ali ikun musti tuir, foin ami bele baa!’
27 Hotu, amikaan ama dale tenik na'ak, ‘Emi hatene ti'an, ha'ukaan feen Rahel oan, na'in rua dei! 28 Oan ulun la iha ti'an! Asu fuik folan nola nia ti'an, to'o la karee nia ona. 29 Kalo emi hola tenik ali ikun hodi baa, hotu nia kona maufinu, emi hasusar ha'u katuas ne'e, to'o tama rate!’
30-31 Dadi nune'e, ama boot! Kalo ha'u kfila baa ha'ukaan ama, la kodi kikar ali ikun ne'e, nanis ama mate. Tan amikaan aman kmalar nakri'it no lawarik ne'e. Nia katuas basuk ti'an. Kalo ami tu'an tenik susar ne'e, nanis nia mate! 32 Ha'u moos kamate lia ko ha'ukaan ama ka'ak, ha'u mak kataa bodik lawarik ne'e. Ha'u kamate lia ti'an ka'ak, kalo ha'u la kodi fila lawarik ne'e baa, ha'u katiu sala to'o mate.