3 Rona nola nunia, Yahuda moos nataa na'ak, “Ama! Hori hirak nia, na'i Mesir ema liman kwana nia foo natene maka'as baa ami na'ak, ami la bele hatudu oin tenik baa nia, kalo ami la hodi ama oan ikun Benyamin baa. 4 Ama musti nabusik ali Benyamin tuir ami, foin ami bele baa sosa haan tenik. 5 Kalo ama la nabusik, ami moos la bele baa, tan ema boot Mesir nia dale maka'as ti'an nunia!”

6 Yakob moos de'an sia na'ak, “Tan saa emi katak baa ema nia ha'ak, emi sei hoo alin ida tenik?! Emi buka lia atu hasusar ha'u ba-baa dei!”

7 Rona nola nunia, sia namaus na'ak, “Ama! Ema nia nakusuk ami bei-beik, atu nodi natene itakaan familin sia hotu-hotu! Nia nusu na'ak, ‘Nunabee? Emikaan ama sei moris ka? Emi sei hoo alin mane ida tenik ka?’ Tan nia seten ami bei-beik, ami katak lo-loos ona! See mak natene na'ak, nia atu naruka ami hodi ali baa nebaa?”

8-9 Yahuda moos dale tu'an na'ak, “Ama! Mabusik oan nia baa no ami ona! Ha'u karai aan, kalo saa ida kona nia, ha'u mak seluk nia! Kalo ha'u la kodi kikar nia sei moris mai baa ama, ama tau sala nia baa ha'u dei, to'o ha'u kmate! Dadi, ama mabusik oan nia ona, tan ami atu la'o ona! Di'ak liu, ami baa lai-lais, nebee keta no ema ida mate salaen! 10 Hanoin kokon! Kalo ami la hein to'o kleur nune'e, ami nanis baa-mai isin rua ti'an!”

11 Hotu, Yakob katak na'ak, “Kalo nunia, emi halo nune'e dei! Baa hola rai ne'e isin kabaas sia. Nu'u wani ween, ai babudun, ai morin ween, aitahan ween, kiar^a isin no ai horis isin seluk sia. Hotu, hodi baa hatetu foo baa na'i Mesir liman kwana nia, hodi hasara baa nia ha'ak, ne'e amikaan sera bodik ama! 12 Emi moos musti hodi kedan osan wa'in liu osan uluk nia dala rua, tan emi musti foo fila osan mak emi hetan iha emikaan kakaluk laran hori hirak nia! Arumak, ema nia sia sura sala! 13 Emi moos bele hodi emikaan alin baa, mais hodi hikar mai lai-lais! 14 Ha'u kaloon nebee Maromak mak Beran Kaliuk, nalo na'i Mesir liman kwana nia neon monu baa emi! Nebee nia bele foo fila Benyamin no Simeon baa emi, atu fila mai bele. Kalo ha'ukaan oan sia lakon, so'in baa. Ha'u kterus susar nia!”

15 Rona ti'an Yakob dale nunia, oan sia moos nahulin buat nia sia no osan, atu nodi baa Mesir. Sia moos no Benyamin baa. To'o Mesir ti'an, sia baa nasoru Yusuf. 16 Naree Benyamin no maun sia mai, Yusuf naruka klosan serwisu ulun na'ak, “Modi ema ne'e sia baa ha'ukaan uma! Ho'o karau baka ida, te'in malo midar! Tan loro natetu ne'e, sia atu naa bele no ha'u!”

17 Rona Yusuf naruka nunia, klosan nia nalo tuir. Nia moos nala'o nodi Yusuf maun sia baa Yusuf uman.

18 Iha dalan klaran, Yusuf maun sia nata'uk basuk. Sia dale baa malu na'ak, “Hoi! Tan saa nia naruka nodi ita mai iha ne'e? Arumak, nia atu nasusar ita, tan osan mak uluk sia natama nikar iha itakaan kakaluk laran nia. Keta-keta sia nodi fudi nala'o ita mai iha ne'e, nebee kohi ita, nalo baa ata. Hotu, sia nadau nola itakaan kuda keledai sia!”

19 Oras sia kre'is baa Yusuf uman, sia moos dale baa klosan nia na'ak, 20 “Ama! Ami bele husu lia ida ka? Uluk ami mai sosa haan iha ne'e ti'an! 21-22 Baa oras ami fila, ami hanawa iha dalan atu toba! Ami moos kore kakaluk sia atu hahaan kuda keledai. Teki-tekis, ami hetan hikar amikaan osan ida-idak, mak ami hodi sosa hare nia. Ami la hatene see mak natama nikar osan nia! Tan baa nia, oras ne'e ami hodi hikar osan nia sia hotu-hotu ti'an! Dadi ama keta krakat ami! Ama moos bele natene, oras ne'e ami hodi tenik osan seluk atu sosa haan foun!”

23 Rona nola nunia, klosan nia nataa na'ak, “Emi no-nook dei! Lalika hata'uk! Arumak emikaan Maromak nia, mak natuun matak-malirin baa emi iha kakaluk laran nia sia! Baa loron nia, ha'u mak simu emikaan osan hotu-hotu! Emi la hoo tusan!” Hotu, klosan nia moos nabusik Simeon sai mai nasoru sia.

24 Nunia hotu, sia tama baa Yusuf uman. Klosan nia nola wee, foo baa sia atu fasi ain. Nia moos nahaan siakaan kuda keledai. 25 Hotu, nia katak baa sia na'ak, “Oras ida, emi haa hamutuk ho ama ulun!” Sia sei no'i nein Yusuf mai, sia nadi'a kedan siakaan naha sera sia.

26 Yusuf to'o mai, sia moos nakni'a sudur iha Yusuf oin. Hotu, sia foti soruk naha sera sia, natetu baa Yusuf. 27 Yusuf moos nusu baa sia na'ak, “Nunabee? Emi hotu-hotu di'a-di'ak dei ka? Nunabee baa emikaan ama katuas nia? Nia moos di'a-di'ak dei ka?”

28 Sia moos nataa na'ak, “Ama atan katuas, mak amikaan aman susu nia, sei no'i di'a-di'ak, ama!” Sia moos sudur foo tenik kneter baa Yusuf.

29 Yusuf foti matan titu satan leur, to'o kona alin Benyamin. Nia dale na'ak, “Ne'e, mak emikaan alin ikun, mak emi dale ti'an baa ha'u hori hirak nia ka?”

Hotu, Yusuf katak baa Benyamin na'ak, “Oa! Ha'u kaloon nebee Maromak natuun matak-malirin wa'in baa o!”

30 Naree nola Benyamin, Yusuf laran hanesan atu nakduar sai ona, tan nia nadomi alin Benyamin liu resik. Tan la bele terus laran moras, Yusuf la'o nela sia lai-lais, tama baa ke'an, hotu tanis. 31 Tanis notu, nia naro'is. Neon noku ti'an, foin nia sai nikar baa nasoru sia. Hotu nia naruka klosan sia baa nadi'a haan.

32 Hotu, sia nadi'a salin Yusuf haan iha fatin ida. Maun-alin sia, salin iha fatin seluk. Yusuf niakaan maluk ema Mesir sia mak naa bele no nia, iha fatin ida du'uk. Sia nalo nunia, tan ema Mesir sia nakribi tuur naa namutuk no ema Ibrani.^b 33 Hotu, sia natuur Yusuf mane malun sia, se'i oin baa Yusuf. Natuur sia, ida-idak tuir otas, nahuu nosi maun ulun to'o alin ikun. Naree fatin tuur oin nunia, Yusuf maun sia moos blaar. 34 Hotu, Yusuf naruka klosan sia foti haan nosi niakaan fatin haan du'uk, foo baa maun-alin sia. Mais nia naruka foo baa Benyamin, wa'in liu dala lima. Hotu, sia moos naa-nemu to'o bosu basuk.