3 Rona Yakob naruka nunia, Yusuf maun na'in sanulu nia moos nadi'a aan baa. 4 Mais Yakob la nabusik Yusuf alin ikun Benyamin tuir maun sia, tan Yakob naneo na'ak, “Arumak oan ikun nia netan maufinu tenik!” 5 Hodi nunia, Yakob oan^a na'in sanulu dei mak baa sosa haan iha rai Mesir. Oras nia, ema wa'in nosi rai Kana'an moos baa sosa haan iha Mesir, tan rai salaen nia to'o rai Kana'an ti'an.

6 Baa oras nia, na'i Mesir foti Yusuf ti'an baa niakaan liman kwana iha rai Mesir. Kalo ema mai nosi nabee dei atu sosa hare, Yusuf mak fa'an baa sia. Tan baa nia, baa oras maun sia to'o, sia nakni'a lo'u-sudur baa Yusuf. 7-8 Naree maun sia mai, Yusuf natene nola kedan. Mais nia nalo aan nu'u ema Mesir, to'o maun sia la natene nia. Nia nusu nodi lian maka'as na'ak, “Emi ne'e hosi nabee?”

Maun sia moos simu na'ak, “Ami ne'e hosi Kana'an. Ami mai atu sosa haan nosi ama na'i!”

9 Rona maun sia nataa nunia, Yusuf nanoin nola niakaan me'i uluk nia. Hotu, nia dale nata'uk sia na'ak, “Ha'u la kfiar emi! Emi ne'e nanis mai atu buka rai Mesir ain! Hotu emi fila hikar mai hatuda ho ami!”

10 Rona Yusuf lian nia, sia nataa na'ak, “Lale, ama! Ami ne'e, ama na'i eman haruka sia dei! Tebes ama. Ami mai atu sosa haan! 11 Ami hotu-hotu ne'e, aman ida dei! Ami la mai buka lia, ama! Ami ne'e, ema di'ak!”

12 Rona nola nunia, Yusuf dale maka'as tenik na'ak, “Hoi! Emi ne'e bosok teen! Keta tolek ha'u! Emi nanis mai atu buka rai ne'e ain!”

13 Mais maun sia sakar na'ak, “Lale ama! Ami ne'e, ama na'i eman haruka sia dei! Ami mai hosi rai Kana'an! Ami ne'e, maun-alin na'in sanulu resin rua! Ami hotu-hotu ne'e, aman ida dei! Amikaan alin ikun nein no ama iha uma. No tenik amikaan alin ida, mais nia la iha ti'an!”

14 Hotu Yusuf nataa nikar na'ak, “Lale! Lia mak ha'u kdale nia, tebes! Emi ne'e, nanis mai buka rai ne'e ain. 15 Ha'u kusu emi hatudu kakaer ida baa ha'u, nebee kodi katene emikaan dalen nia tebes ka lale. Ha'u karai aan! Kalo emikaan alin ikun nia la mai ne'e, emi la bele la'o hela rai ne'e! 16 Emi musti boi hola emi na'in ida, nebee nia fila baa saka nola alin ikun nodi mai! Seluk sia ha'u keti katoos baa ne'e! Emikaan alin mai ti'an lai, foin ha'u katene emi dale loos. Kalo lale, malorek ti'an emi ne'e mai buka rai Mesir ain.” 17 Hotu, Yusuf naruka niakaan ema sia neti natoos maun sia iha bui loron tolu laran.

18 Sia tama loron tolu ti'an, Yusuf baa dale no sia iha bui laran na'ak, “Ha'u ne'e, ema mak nata'uk Maromak. Ha'u moos tuir Niakaan hakaran nohuun! Ha'u kakara kabusik emi, nebee emi bele moris. 19 Mais, emi musti hatudu kakaer nebee ha'u katene emi ne'e, ema loos! Nune'e: Ha'u keti katoos emi na'in ida iha ne'e! Emi seluk sia bele fila, hodi haan foo baa emikaan familin sia! Tan sia no'i nein emi fila hodi haan! 20 To'o nebaa ti'an, emi musti fila hikar mai hodi emikaan alin nia, nebee hatudu ha'ak emi ne'e ema loos! Kalo lale, ha'u ktaa ukun mate baa emi!”

Rona nola nunia, sia moos simu. 21 Hotu, sia dale baa malu na'ak, “Haa! Oras ne'e, ita musti selu itakaan salan mak uluk ita halo ti'an baa itakaan alin. Baa oras nia, nia susar tebes to'o nusu tulun baa ita, mais ita la mana nia kois. Tan baa nia, oras ne'e ita moos kona susar nune'e!”

22 Hotu, Ruben foo natene baa alin sia na'ak, “Hei ali sia! Uluk ha'u kakahik emi ti'an nebee keta halo saa ida baa lawarik nia. Mais emi la rona! Etuk, oras ne'e ita hatiu hola Yusuf raan ona!” 23 Maun sia dale nunia, mais sia la natene na'ak Yusuf moos natene siakaan lia. Baa oras nia Yusuf dale no sia nodi lia Mesir, foin niakaan ibun-nanaan salin baa lia Ibrani.

24 Rona maun sia dale nunia, Yusuf nariik kedan baa tanis mesan iha fatik seluk. Tanis notu, nia fila nikar baa maun sia. Hotu, nia naruka niakaan ema sia kesi nola maun Simeon iha maun-alin sia oin.

25 Hotu, Yusuf naruka klosan sia natama hare baa maun kakaluk sia, nodi natama nikar no-nook ida-idak osan baa kakaluk laran. Nia moos naruka foo bakae baa sia. Rona nola nunia, klosan sia nala'ok Yusuf harukan nia. 26 Nunia hotu, Yusuf maun sia nasa'e kakaluk sia baa siakaan kuda keledai. Hotu, sia moos fila.

27 To'o dalan klaran, sia nanawa kole. Hotu, ida kore niakaan kakaluk atu nahaan kuda keledai. Mais nia sarebak, tan naree niakaan osan iha kakaluk laran. 28 Nia nahii kedan na'ak, “Adeei! Mai haree lai! Ne'e, ita susar ti'an! Sia tau nikar ha'ukaan osan baa kakaluk laran!”

Naree nola nunia, siakaan neon lakon kedan, tan sia nata'uk tebes. Sia moos dale baa malu na'ak, “Maromak natuun tenik saa baa ita ti'an?”

29 Hotu, sia la'o liu. To'o Kana'an ti'an, sia katak baa ama Yakob lia hotu-hotu mak kona baa sia ti'an. 30 Sia katak na'ak, “Ama! Na'i Mesir ema liman kwana nia, maka'as resik! Niakaan dalen maka'as tebes! Nia duu ami na'ak, ami mai buka rai Mesir ain. 31 Mais ami hataa ha'ak, ‘Lale! Ami dale lia loos! Ami la mai buka rai Mesir ain. 32 Ami ne'e, ema di'ak! Ami hotu-hotu, maun-alin na'in sanulu resin rua! Amikaan aman, ida dei! Amikaan alin ida mate ti'an! Alin ikun nein no amikaan ama iha Kana'an!’

33 Rona ami dale nunia, na'in liman kwana nia na'ak, ‘Ha'u atu karee kokon, emi ne'e loos ka lale! Ida nosi emi musti nein heik iha ne'e! Emi seluk sia bele fila, hodi hare baa emikaan famili sia, nebee sia keta mate salaen! 34 Mais emi musti hodi alin nia mai lai, nebee ha'u kbele katene, emi ne'e dale loos, la mai buka lia iha rai ne'e. Foin ha'u kbele kabusik emikaan maluk mak keti katoos ne'e! Hotu ha'u moos foo leet baa emi baa nabee dei iha rai ne'e!’”

35 Dale hotu nunia, sia nahuu kore no namamu sai kakaluk isin sia. Sia sarebak, tan naree sia ida-idak osan iha kakaluk laran. Naree nunia, Yakob no oan sia hotu-hotu nata'uk tebes.

36 Hotu, Yakob dale baa oan sia na'ak, “Emi ne'e halakon mohu ha'ukaan oan sia! Yusuf la iha ti'an! Simeon moos nunia tenik! Oras ne'e, emi hakara hola tenik Benyamin hodi baa. Emi ne'e tebe-tebes atu hasusar ha'u dei!”

37 Rona aman katak nunia, Ruben moos dale baa aman na'ak, “Ama! Latan Benyamin baa ha'u! Ha'u mak katiu kola lia ne'e! Ha'u karai aan, ha'u atu foo kikar nia baa ama! Kalo lale, ama bele no'o ha'ukaan oan mane rua nia!”

38 Mais Yakob nataa nikar na'ak, “La bele! Emi la bele hodi Benyamin baa! Maun Yusuf mate ti'an! Oras ne'e, hela mesan nia dei! Kalo nia moos netan maufinu iha dalan lolon, emi halo ha'ukaan ulun moras tu'an tan tenik, to'o ha'u ktama rate!”^b