3 Hotu, karau baka matan hitu seluk sai mai nosi mota. Karau nia sia rekas, hela mesan ruin. Sia nariik kre'is baa karau bokur sia. 4 La oras, karau rekas sia folan nola karau bokur sia hotu-hotu. Naree nunia, na'in sarebak, hotu naktekir.

5 Naktekir la kleur, na'in toba nikar. Hotu, nia me'i tenik na'ak, nia naree hare fulin hitu mak isin makonuk. Hare fulin nia sia tubu nosi hare kain bo'as ida. 6 Hotu, nia naree tenik hare abas fulin hitu mak naklaik ti'an, tan kona anin manas. 7 Teki-tekis hare abas nia sia folan nola hare mahoo isin makonuk sia. Naree nunia, na'in sarebak, hotu naktekir. Foin nia natene na'ak, nia me'i tenik.

8 Baa seisawan nia, na'in noran la di'ak. Nia naruka klosan sia baa bolu nola ema makdook no ema matenek sia hotu-hotu iha rai Mesir. Sia mai hotu ti'an, na'in moos katak me'i nia. Mais la no mak bele nalore me'i nia isin baa nia.

9 Rona lia nia, klosan ulun mak babilan na'in hemun foin nanoin nola Yusuf. Hotu nia katak baa na'in na'ak, “Ama na'i! Ha'u kmusti katak sain ha'ukaan salan! 10 Uluk, ama na'i krakat ha'u ko ha'ukaan maluk, hotu ama natama ami baa bui laran. 11 Iha nia, kalan ida ami na'in rua moos me'i. Ida-idak netan me'i se-seluk. 12 Iha bui laran nia, no ema Ibrani nurak ida, mak Potifar atan. Ami katak me'i baa nia. Hotu, nia nalore. 13 Tuir me'i nia, foin ama foti nikar ha'u. Mais ha'ukaan maluk netan ukun mate. Hahalok nia sia hotu-hotu kona besik baa saa mak ema Ibrani nalore nia!”

14 Rona nola nunia, na'in naruka kedan klosan sia lai-lais baa nola Yusuf nosi bui laran. Sai nosi bui, Yusuf koi timi rahuk no nadi'a aan atu baa nataa ama na'i. 15 To'o baa, na'in dale baa Yusuf na'ak, “Hei, lawarik! Ha'u ko me'i ida, mais la no ema mak bele nalore me'i nia isin! Mais ema katak baa ha'u na'ak, o ne'e bele!”

16 Rona nola nunia, Yusuf nataa na'ak, “Ama na'i! Ha'u moos la katene sa-saa! Maromak mesan mak bele nalore me'i isin! Nia nanis beer nalore lia mak di'ak bodik ama na'i!”

17 Hotu na'in katak na'ak, “Iha me'i nia, ha'u ko'i kariik iha mota Nil tehen. 18 Hotu ha'u karee karau baka mak bokur no leen matan hitu sai nosi mota, hotu naa hae iha mota tehen. 19 Hotu karau baka matan hitu seluk moos mai. Mais sia rekas, hela mesan ruin. Iha rai Mesir ne'e, ha'u la karee karau rekas oin nunia! 20 Mais ha'u kblaar tebes! Tan teki-tekis, karau rekas matan hitu nia folan nola hotu karau bokur nia sia! 21 Masik folan nola nunia moos, karau nia sia rekas nafati dei! Me'i ti'an, ha'u moos kaktekir!

22 La kleur, ha'u ktoba dukur kikar. Hotu ha'u kme'i tenik. Karee hare isin makonuk fulin hitu, tubu nosi hare kain bo'as ida. 23 Nunia hotu, karee tenik hare abas fulin hitu mak naklaik ti'an, tan kona anin manas. 24 Mais teki-tekis, hare abas nia sia folan nola hotu hare isin makonuk sia. Hotu, ha'u kaktekir. Ha'u moos katak me'i nia baa ema matenek sia. Mais la no ema ida moos mak bele nalore me'i nia isin!”

25 Rona nola me'i nia sia, Yusuf katak baa na'in na'ak, “Ama na'i! Me'i rua nia, isin manesak! Maromak beer katak kedan baa ita boot saa mak Nia atu nalo! 26 Me'i nia sia isin, nune'e: karau baka bokur matan hitu, no hare isin makonuk fulin hitu nia, ne'e na'ak, rai bosu tinan hitu laran. 27 Nunia moos, karau baka rekas matan hitu, no hare abas fulin hitu nia, ne'e na'ak, rai salaen tinan hitu laran.

28 Hodi me'i nia sia, Maromak katak sain kedan lia mak Nia atu nalo. Lia nia hanesan ohin ha'u kfoin katak nia. 29 Ita atu hetan rai bosu tinan hitu laran iha rai Mesir. 30-31 Hotu ti'an, foin ita hetan rai salaen tinan hitu laran. Rai salaen nia boot tebes, to'o la no haan tenik iha rai Mesir tomak. Ema hotu-hotu salaen mate, to'o la nanoin tenik rai bosu uluk nia.

32 Tan ama na'i me'i rua nia isin manesak, ne'e na'ak, Maromak nakotu kedan ti'an atu nala'ok tuir me'i nia sia. La kleur, saa mak Nia nakotu ti'an nia, nanis dadi.

33 Tan lia nia, ha'u kusu baa ama na'i, nune'e: Di'ak liu, ama foti nola ema matenek ida mak bele naliku sa-saa nalo di'ak. Foti hotu, foo beran baa nia nebee nodi babilan rai Mesir ne'e di'a-di'ak. 34 Oras rai bosu tinan hitu nia, di'ak liu, ama foti tenik ema nebee libur nola rai isin resin sia. Ema musti fa'e rai isin sia, nalo baa lima, hotu rai natoos fa'ek ida. 35 Ema musti nalo tuir ama na'in ukun, nodi libur hare nosi leo hotu-hotu iha rai Mesir. Hotu, sia musti rai natoos hare nia iha kanaha uman nodi daka di'a-di'ak. 36 Hodi nunia, oras rai salaen tinan hitu nia to'o, ita sei ho haan. Kalo ama na'i nadi'a kedan nunia, nanis la no ema mak mate salaen.”

37 Rona Yusuf dale nunia, na'i no niakaan klosan boot sia, simu Yusuf lia fuan. 38 Na'in dale na'ak, “Maromak Kmalar Lulik nanis tuun baa Yusuf ne'e! Ita la bele hetan seluk ema mak di'ak liu nia!”

39 Hotu, na'in dale baa Yusuf na'ak, “Maromak katak ti'an lia hotu-hotu baa o, lawarik! Oras ne'e, foin ami hatene ha'ak o ne'e matenek! Okaan hanoin liu nosi ema hotu-hotu! 40 Tan baa nia, oras ne'e ha'u kfoti o baa ha'ukaan liman kwana. Nebee renu hotu-hotu tuir okaan harukan. Ha'u mesan, mak boot liu o!”

41-42 Dale notu ti'an, na'in kolu nola niakaan kadeli mahoo matan marak, tau baa Yusuf liman fuan nodi na'ak, “Kodi kadeli ne'e, ha'u kfoti o kalo baa ha'ukaan liman kwana iha rai Mesir ne'e tomak!” Hotu, nia moos natais Yusuf nodi faru klobor mamar kabaas ida, nodi tara henu mean ida baa Yusuf kokorok.

43 Na'in moos latan kedan baa Yusuf, niakaan kareta kuda fohorai kabaas ida, mak bodik ema boot nomer rua. Oras Yusuf sa'e kareta nia, no ema nalai uluk iha kareta oin nodi nahii bei-beik na'ak, “Hoi! Loke dalan! Foo tabe!^a No ema boot atu la'o liu!” Nodi nadahur nunia, na'in foti Yusuf nalo baa liman kwana iha rai Mesir.

44 Hotu, na'in moos katak baa Yusuf na'ak, “Nune'e. O matene ti'an, ha'u ne'e mak na'in. Mais ha'u katak ti'an ema hotu-hotu iha rai Mesir ne'e ka'ak, kalo o la mabusik sa-saa, sia nanis la bele nalo!”

45 Hotu, na'in nanaran Yusuf na'ak, Safnat Panea, tuir ema Mesir naran. Nia moos sasudin Yusuf no feto ida, naran Asnat. Yusuf banin mane, naran Potifera. Nia ne'e, na'ilulik ulun iha kota On.^b Hodi nunia, Yusuf dadi ema boot iha rai Mesir.

46 Baa oras na'in foti nia, Yusuf otas tinan tolu nulu. Nosi ikus, Yusuf baa la'o nasirin fatin hotu-hotu iha rai Mesir. 47 Iha tinan hitu rai bosu nia, to'os isin wa'in tebes. 48 Oras nia, Yusuf libur no bali nola to'os isin resin sia. Hare resin nosi fatin kre'is baa kota nabee dei, Yusuf rai baa kanaha uman iha kota nia. 49 Hare resin nia sia wa'in lo-loos, hanesan raihenek tasi tehen, to'o ema la bele sukat.

50 Oras rai salaen sei la to'o dauk, Yusuf feen Asnat nahoris oan mane na'in rua. 51 Baa oras nia, Yusuf katak na'ak, “Maromak nalo ha'u kalu'a ti'an ha'ukaan susar baa oras ha'u ksai kosi ha'ukaan ama uman!” Nodi nanoin lia nia, Yusuf nanaran oan ulun nia na'ak, Manase (tan lian hanesan lia fuan Ibrani ida na'ak ‘halu'a’).

52 Baa oras netan oan nomer rua, Yusuf katak na'ak, “Ha'u ketan susar wa'in ti'an iha fatin ne'e, mais Maromak natuun matak-malirin baa ha'u, to'o ha'u ketan oan iha ne'e!” Nodi nanoin lia ne'e, Yusuf nanaran oan nomer rua nia na'ak, Efraim (tan efraim lia isin na'ak ‘hetan oan’).^c

53 Nosi ikus, rai bosu tinan hitu nia siku. 54 Hotu, rai salaen moos to'o, kona besik no Yusuf lian uluk nia. Iha fatin seluk sia, ema salaen ti'an, mais iha rai Mesir sei noo haan. 55 La kleur, ema Mesir sia moos salaen. Hotu, sia baa nusu haan iha na'in. Na'in moos naruka sia baa Yusuf, mais musti tuir Yusuf ukun.

56 Rai salaen nia hetak boot to'o kona fatin hotu-hotu iha rai Mesir. Yusuf nahuu loke kanaha uman, nebee fa'an hare baa ema Mesir sia. 57 Rona lia nia, ema fatin hotu-hotu iha Mesir mai sosa haan nosi Yusuf. Rai salaen nia aat tebe-tebes iha raiklaran tomak.