Yusuf nalore me'i isin nosi ema bui na'in rua
40
1-3 Iha bui laran nia no klosan ulun na'in rua mak kaer serwisu iha na'i Mesir tofatik. Klosan ida naliku na'in hemun, ida tenik naliku na'in tubi. Dala ida, ama na'i nahibu sia, hotu natama sia baa bui. Tan lia nia, sia rua namutuk fatin ida no Yusuf. 4 Bui ulun naruka Yusuf naliku sia tinan ida-rua ti'an.5 Baa kalan ida, klosan rua nia me'i. Ida-idak netan me'i du'uk. Me'i isin moos se-seluk. 6 Seisawan, oras Yusuf mai baa sia, nia naree siakaan oin mara loos tan noran susar. 7 Naree nunia, Yusuf nusu na'ak, “Tan saa ohin loron ne'e, emi oin mara nunia?”
8 Sia moos nataa na'ak, “Hori fonin ami hetan me'i, mais la noo mak bele nalore me'i nia isin!”
Hotu Yusuf dale na'ak, “La no ema ida mak natene me'i isin. Maromak mesan mak natene. Emi dale kokon me'i nia lai, foin ha'u kamulak kodi kusu me'i isin baa Maromak.”
9 Rona Yusuf dale nunia, klosan mak naliku na'in hemun dale na'ak, “Nune'e! Iha ha'ukaan me'i laran, ha'u karee ai anggor huun ida. 10 Ai anggor nia nasoru tolu. Ai nia nataha kedan, nafuna kedan, nasare kedan no nafua to'o naktasak. 11 Iha me'i nia moos, ha'u kaer ama na'i fatik hemun. Ha'u moos kola anggor fuan sia, kois ween baa ama na'i fatik hemun nia. Hotu, ha'u katetu anggor ween nia bodik ama na'i nalamak.”
12 Rona nola nunia, Yusuf moos katak na'ak, “Ama! Me'i nia malorek nune'e: ai sorun tolu nia na'ak, loron tolu. 13 Iha loron tolu ne'e laran, ama na'i atu nasai ama nosi bui ne'e. Hotu, nia atu foti nikar ama, dadi baa ulun mak babilan hemun, hanesan uluk. 14 Kalo ama netan sotir di'ak ti'an nunia, ama keta nalu'a ha'u! Kalo ama nadomi ha'u, ama tulun katak baa ama na'i, nebee nia moos nasai ha'u nosi fatin ne'e! 15 Tuir lia loos, sia nokbiit nana'o nola ha'u nosi rai ema Ibrani. Iha rai ne'e moos, ha'u la kalo sala saa ida. Mais teki-tekis, sia natama ha'u baa bui laran ne'e, nu'u ha'u ne'e ema aat.”
16 Rona ti'an me'i isin kabaas nunia, klosan mak babilan na'in tubi nia moos dale baa Yusuf na'ak, “Ali! Ha'u moos me'i ka'ak, ha'u ktutur tetek ko'e tolu! 17 Iha ko'e mak leten basuk laran, no na'i niakaan tubi oi-oik. Mais manu ai leten sia mai tutu karin tubi nia nosi ko'e laran iha ha'ukaan ulun.”
18 Rona nola nunia, Yusuf moos nataa na'ak, “Ama me'in nia, nune'e: ko'e tolu nia moos na'ak, loron tolu. 19 Iha loron tolu ne'e laran, ama na'i atu naruka ema taa kotu ama ulun. Hotu, sia nisa ama isin baa ai riin ida. Manu ai leten sia moos atu mai tutu karin ama isin.”
20 Nunia dei, me'i isin mak Yusuf katak baa klosan rua nia sia. Loron tolu nia, kona baa na'in loron moris. Hotu, na'in nalo dahur nodi namata ema boot iha rai nia. Nia moos naruka ema baa nola klosan na'in rua nia nosi bui laran. 21 Nasai nola ti'an, ama na'in foti nikar klosan mak naliku hemun, nebee babilan nikar na'in hemun.
22 Mais klosan mak babilan na'in tubi, ama na'i naruka taa kotu ulun. Hotu sia nisa isin baa ai riin. Lia ne'e kona besik tuir saa mak Yusuf nalore kedan ti'an nia.
23 Nunia ti'an, klosan mak naliku na'in hemun la nanoin tenik Yusuf.