Yusuf no Potifar feen
39
1-2 Hori hirak nia, ema Ismael sia nodi ti'an Yusuf baa rai Mesir. Iha rai nia, no ema boot ida naran Potifar. Potifar ne'e, ulun bodik sondadu hotu-hotu mak daka na'i Mesir tofatik. Nia sosa nola Yusuf nosi ema sia, atu nalo baa ata iha uman. Iha uma nia, MAROMAK tulun Yusuf, to'o niakaan serwisu sia hotu-hotu la'o di'a-di'ak. 3 Yusuf ulun Potifar naree niakaan serwisu di'ak nunia, nia moos natene ona na'ak, MAROMAK mak nanis tulun Yusuf. 4 Tan baa nia, Potifar nakara no fiar baa Yusuf, to'o foti nia nalo baa klosan ulun iha uman laran. Nia moos fiar baa Yusuf, nebee babilan uman no bein sasoin hotu-hotu. 5 Tan Yusuf tuur iha Potifar uman, MAROMAK moos natuun matak-malirin baa Potifar, ema Mesir nia. Potifar sasoin uma laran, bein sasoin, to'os, no serwisu sia hotu-hotu la'o di'a-di'ak. 6 Tan Yusuf nala'o di'a-di'ak serwisu sia hotu-hotu, Potifar la nanoin sa-saa ona. Nia natene loos naa dei.Baa oras nia, Yusuf isin lolon kabaas tebe-tebes. 7 Nia tuur iha nebaa sei la kleur falik, Potifar feen neon monu baa nia. Tan baa nia, feto ne'e tene Yusuf nebee sia rua toba namutuk.
8 Mais Yusuf la no'uk. Nia katak baa feto nia na'ak, “Keta nunia, ina! Ha'ukaan ama boot Potifar foo ti'an beran baa ha'u atu kodi kaliku sa-saa hotu-hotu. 9 Iha uma ne'e, la no ema ida tenik mak netan beran liu ha'u, tan ama boot naruka ha'u ti'an atu kaliku sa-saa hotu-hotu. Hela mesan ina dei mak ha'u la kbele kaliku. Oin nunabee, ha'u kbele kalo hahalok aat nunia! Hahalok nia moos sakar Maromak hakaran!”
10 Masik Yusuf la no'uk nalo aat nunia moos, sura loron Potifar feen tene Yusuf bei-beik. Yusuf moos dudu bei-beik.
11 Baa loron ida Yusuf tama baa uma laran atu serwisu. Baa oras nia, la no ema seluk iha uma. 12 Natene nola nunia, Potifar feen kaer nola Yusuf farun liman. Hotu, nia dada seten Yusuf nodi na'ak, “Mai ona! Oras ne'e ita rua mesan ti'an! Mai ita baa toba ona!”
Mais Yusuf la no'uk. Nia nakfodak sai to'o farun nakolu. Hotu, nia nalai sai. Mais feto nia kaer natoos Yusuf farun.
13 Oras Potifar feen naree na'ak Yusuf nalai nela farun, 14-15 nia bolu ema serwisu sia nodi katak na'ak, “Emi mai haree lai! Ohin nia, mane Ibrani nia tama baa ha'ukaan ke'an laran! Nia atu nalo aat no ha'u, mais ha'u kahii maka'as, to'o nia nalai nela niakaan faru ne'e! Ha'ukaan la'en nodi ema notar lalek ne'e mai, atu namoe ita dei!”
16 Potifar feen moos rai Yusuf farun nia, to'o la'en fila mai. 17 La'en fila mai ti'an, feen nasa'e lia na'ak, “Ama! Ema Ibrani mak ama nodi mai ti'an nia, foin da-dauk ne'e tama baa ha'ukaan ke'an laran atu nalo lia kfo'er no ha'u! 18 Mais ha'u kakrake maka'as, kodi bolu ema! Hotu mane nia nalai nela niakaan faru ne'e!”
19 Rona ti'an feen dale nunia, Potifar krakat tebe-tebes. 20 Nia naruka ema baa kohi nola Yusuf. Hotu, sia natama Yusuf baa na'i Mesir niakaan bui.
21 Mais MAROMAK la nalu'a Yusuf. Nia tulun nima-nimak, to'o bui ulun moos nakara Yusuf tebe-tebes, 22 no fiar baa Yusuf. Nia latan beran baa Yusuf atu naliku ema bui sia hotu-hotu, no nala'ok serwisu hotu-hotu iha nia. 23 Tan Na'i Maromak tulun Yusuf nunia, serwisu hotu-hotu iha bui nia la'o di'a-di'ak, to'o bui ulun moos la nanoin sa-saa ona iha bui nia.