6 Oan ulun Er boot ti'an, Yahuda baa nusu nola feto nurak ida naran Tamar, foo baa Er. Hotu, sia rua nola malu. 7 Mais Er nia, aat liu resik to'o Maromak natuun dinu, nalo nia mate, la noo oan.

8 Hotu, Yahuda naruka oan nomer rua na'ak, “Onan! Okaan maun mate ti'an, mais la noo oan! Tuir ema matas siakaan adat, oras ne'e o musti seluk okaan maun, mola mikar niakaan feen Tamar! Nebee o foo husar-binan bodik okaan maun!”

9 Onan natene nanis adat nia ti'an. Mais nia la no'uk foo husar-binan bodik maun Er. Tan baa nia, sura oras toba namutuk no Tamar, Onan soe sai niakaan fini nebee Tamar keta ko'us. 10 Onan niakaan hahalok nia, nalo Maromak krakat basuk, to'o Maromak natuun dinu, nalo nia mate.

11 Yahuda naree nola oan na'in rua mate ti'an, nia nata'uk tan sia ida-idak nola Tamar. Nia naneo na'ak, kalo oan ikun Syela moos nola Tamar, keta-keta nia moos mate tenik. Tan lia nia, Yahuda katak baa uma na'in Tamar na'ak, “Uma na'in! Di'ak liu o fila mikar baa okaan inan-aman dei ona! Loron ikus, kalo ha'ukaan oan Syela boot ti'an, foin o mai mikar nebee emi hola malu.” Rona nola nunia, Tamar moos fila nikar baa inan-aman.

12 La kleur, Yahuda feen moos mate. Nia namuka aan, to'o loron susar nia siku liu.^a Hotu ti'an, Nia bolu nola niakaan maluk naran Hira, nebee sia rua baa leo Timna, tan iha fatin nia, ema no'i teri bele-bele bibi malae rahun atu fa'an.

13 Ema mak natene lia nia, katak baa Tamar na'ak, “Okaan banin mane baa leo Timna ti'an, atu tuir teri bibi malae rahun.”

14 Baa oras nia, Yahuda oan ikun Syela boot ona. Mais Tamar natene nanis na'ak, banin mane la nakara sasudin nia no Syela. Tan lia nia, Tamar na'in buka du'uk dalan atu netan oan. Nia kolu niakaan tais hene metan, seluk nodi tais kabaas ida. Nia moos nodi tais oan taka ulun no sara oin. Hotu, nia baa tuur iha leo Enaim odamatan nanokar, kona besik baa dalan baa leo Timna. 15 Baa oras Yahuda la'o tuir odamatan nanokar nia, nia naree feto ida iha nia. Nia naneo na'ak, arumak feto nia feto aat, tan Tamar natudu ilas, nodi tais kabaas, no taka tenik oin, 16 to'o Yahuda la natene na'ak feto nia, niakaan uma na'in. Hotu, nia nare'is aan baa feto nia, nodi nusu na'ak, “Hoi! Kalo ha'u atu kola o, o musu hira?”

Tamar nataa na'ak, “Loos o dei!”

17 Rona nola nunia, Yahuda taa kokon folin na'ak, “Kalo ha'u kfoo bibi matan ida baa o, o manoin nunabee?”

Tamar moos nataa na'ak, “Di'ak ama! Surak latan uluk lai naha kakaer ida baa ha'u. To'o wainhira ama solok bibi nia mai.”

18-19 Rona nola nunia, Yahuda nataa tenik na'ak, “Ha'u kfoo naha kakaer saa baa o?”

Tamar nataa nikar na'ak, “Ama latan baa ha'u, marak mahoo talin mak ama nahenu nia, no ama kno'an.” Rona nola nunia, Yahuda moos latan naha nia sia baa Tamar.

Hotu, sia rua moos baa toba namutuk. Hotu ti'an, Tamar fila kedan. To'o uma ti'an, nia kolu tais kabaas no tais oan nia, hotu natais nikar tais hene metan. Mais Tamar ko'us ti'an.

20 La kleur falik, Yahuda nusu tulun baa niakaan maluk naran Hira na'ak, “O tulun modi bibi ne'e, foo baa feto aat mak iha leo Enaim nebaa. Hotu musu mola mikar ha'ukaan naha sia mak feto nia kaer ti'an.” Rona nola nunia, maluk Hira moos baa. To'o nebaa ti'an, nia nusu nodi buka feto nia baa-mai, mais la nasoru kois. 21 Nia nusu baa ema iha nia sia na'ak, “Hoi! Emi haree feto aat mak tuur nanis iha odamatan nanokar ne'e ka lale? Oras ne'e, nia iha nabee?”

Mais sia nataa na'ak, “Ama! Iha ne'e la no feto aat!”

22 Tan baa nia, Hira fila nikar baa Yahuda. Nia katak na'ak, “Ha'u la kasoru feto nia. Ha'u kbuka tebe-tebes, mais ema iha nia sia katak na'ak, iha fatin nia la no feto aat.”

23 Rona nola nunia, Yahuda nataa na'ak, “Habusik baa nia nola naha nia baa nia! Surak ema keta namoe ita! Ha'u kakara selu baa nia, mais la hasoru nia!”

24 Fulan tolu siku ti'an, no ema mai nasa'e lia baa Yahuda na'ak, “Okaan uma na'in Tamar nia, nalo aan nu'u feto aat ti'an. Oras ne'e, ko'us ti'an!”

Rona nola nunia, Yahuda krakat tebe-tebes. Nia naruka ema nia sia na'ak, “Baa dada hodi feto nia mai! Musti sunu horis nia!”

25 Hotu, ema nia sia baa atu dada nola Tamar. Mais Tamar nalore marak no kno'an nia. Nia naruka ema nia sia fila katak baa banin na'ak, “Ama! Ita musti leno kokon naha ne'e sia lai! Marak no kno'an ne'e na'in mak nalo ha'u ko'us nune'e!”

26 Naree nola naha nia sia, Yahuda moos natene kedan na'ak, naha nia sia niakaan tebes. Hotu, nia katak na'ak, “Tebes! Feto nia la sala! Ha'u mak sala! Ha'u kmusti sasudin nia no ha'ukaan oan Syela, mais ha'u la kakara!” Tan lia nia, Yahuda la krakat ti'an. Nia moos la toba namutuk tenik no Tamar ona.

27 Baa oras Tamar loron nahoris to'o mai, nia nahoris oa karuak. 28 Oras nahoris, oan ida liman sai uluk. Hotu, makaer mii kesi kabaas mean baa liman nodi katak na'ak, “Ida ne'e, mak oan ulun!” 29 Mais, oan nia dada natama nikar liman. Hotu, niakaan maluk sai, moris uluk. Naree nunia, makaer mii moos katak na'ak, “Hei, o ne'e biit tebes! O mesuk aan atu sai uluk!” Hotu makaer mii tau naran baa oan nia, na'ak Peres (tan lia fuan peres isin na'ak, ‘mahesuk aan atu sai’). 30 Peres sai ti'an, foin alin mak netan ti'an kabaas mean nia sai mai. Sia nanaran oan nia, na'ak Sera (tan lia fuan sera isin na'ak, ‘mean lakan’).