Yakob nata'uk nasoru maun Esau
32
Laban fila nikar ti'an, Yakob sia moos la'o liu. Hotu, Maromak Niakaan makbukar lale'an sia mai nasoru nia. 2 Naree sia nunia, Yakob dale na'ak, “Fatin ne'e, nanis Maromak hanawa fatin!” Tan baa nia, Yakob nanaran fatin nia, Mahanaim (tan mahanaim lia isin na'ak ‘hanawa fatin rua’).3 Hotu, Yakob naruka niakaan klosan na'in hira, baa uluk rai Edom (ne'e mak rai Seir), nebee katak baa maun Esau na'ak nia atu mai. 4 Yakob katak baa klosan sia na'ak, “Emi baa katak baa ha'ukaan maun Esau nune'e: ‘Ama boot Esau! Ama boot atan, ali Yakob, solok tabe hakneter wa'in lo-loos. Nahuu hori la'o uluk nia, to'o oras ne'e, ama boot atan ne'e, tuur iha tua na'i Laban uman. 5 Oras ne'e, ama boot atan ne'e, noo karau baka, kuda keledai, bibi, bibi malae, ata feto no ata mane. Nia solok ami ne'e mai uluk, katak ama boot nosi niakaan mamain. Nia naloon, nebee ama boot simu ami nodi liman rua.’” Yakob naruka nunia, klosan sia moos baa.
6 Klosan sia nasoru Esau ti'an, sia fila nikar, nasara baa Yakob na'ak, “Ami hasoru ti'an ama maun, Esau. Oras ne'e, nia la'o mai nasoru ama nodi mane na'in atus haat.”
7 Rona nola nunia, Yakob neon kiki, tan nia nata'uk tebes. Nia fa'e niakaan ema no karau no bibi sia hotu-hotu, nalo baa lolok rua. 8 Nia naneo na'ak, “Kalo Esau mai, hotu nalatu ema lolok uluk, lolok ikus bele nalai sori aan.”
9 Yakob moos namulak na'ak, “Maromak, mak ha'ukaan bei Abraham no ama Isak lo'u-sudur baa. Rona ha'u lai! Hori hirak nia, Maromak naruka ha'u kmai kikar ha'ukaan familin sia iha rai ne'e. MAROMAK mak namate menon ti'an na'ak, Maromak mak atu babilan nalo di'ak hotu-hotu. 10 Ha'u la kfatan simu Maromak dadomin mak la natuka! Uluk, oras ha'u kakur mota Yordan ne'e, kodi kno'an dei. Mais, oras ne'e ha'u kmai kikar, kodi ema no karau no bibi lolok rua. 11 Ha'u kata'uk arumak mau Esau mai no'o ami. Tan lia nia, ha'u kakro'an, nebee Na'i Maromak sori ha'u ko ha'ukaan feen-oan hotu-hotu, bele hakbois hosi mau Esau. 12 Na'i Maromak mak namate menon na'ak, atu natuun matak-malirin wa'in baa ha'u, nodi nalo ha'ukaan husar-binan bea tu'an, hanesan raihenek iha tasi tehen mak ema la bele sura nola.”
13 Namulak notu, Yakob toba iha nia. Baa awan, nia nadi'a bibi no karau sia atu foo baa maun. 14 Nia boi nola bibi inan matan atus rua, bibi aman matan rua nulu, bibi malae inan matan atus rua, bibi malae aman matan rua nulu, 15 kuda unta matan tolu nulu no oan sei susu, karau baka inan matan haat nulu, karau baka aman matan sanulu, kuda keledai inan matan rua nulu no kuda keledai aman matan sanulu. 16 Hotu, nia fa'e oik ida, lolok ida. Hotu, nalo lolok ida noo makbalin du'uk. Nia katak baa makbalin sia na'ak, “Emi la'o uluk. Ha'u ktuir kosi kotuk! Mais musti daka, nebee lolok ida dook netik nosi lolok ida seluk.”
17 Hotu, Yakob naruka makbalin lolok uluk na'ak, “Kalo ha'ukaan maun Esau nasoru emi, hotu nusu na'ak, ‘Emi atu baa nabee? Emi ne'e see klosan? Bibi no karau ne'e sia see niakaan?’ 18 emi musti hataa ha'ak, ‘Bibi no karau ne'e sia, ama boot atan Yakob niakaan! Nia solok baa maun, ama boot Esau. Mais, nia du'uk sei ikus.’” 19-20 Yakob moos naruka baa makbalin hotu-hotu nosi lolok seluk sia na'ak, “Kalo emi hasoru mau Esau, latan bibi no karau ne'e sia baa nia, hotu katak ha'ak, ha'u ksei iha ikus.” Yakob naruka nunia, tan nia nanoin, kalo nia latan bibi no karau nia sia hotu-hotu baa Esau, Esau laran bele malirin no nia. 21 Tan lia nia, nia solok uluk bibi no karau nia sia baa. Mais kalan nia, nia sei iha Mahanaim.
Yakob nakte'ur no Maromak
22 Baa kalan nia, Yakob nadeer, babilan feen kawa'ik rua, feen ki'ik rua, no oan na'in sanulu resin ida, atu nakur mota Yabok balu. 23 To'o balu baa, Yakob moos solok niakaan sasoin hotu-hotu baa.
24 Nunia hotu, Yakob mesan sei iha nia. Hotu, mane ida mai nakte'ur no nia, to'o kre'is loro sa'e. 25 Mane nia noran atu monu, nia moos tuku Yakob kidan fukun, to'o ruin naklosu sai nosi tuur fatin. 26 Hotu, mane nia dale na'ak, “Mabusik ha'u, tan loro atu sa'e ona.”
Mais Yakob nataa na'ak, “Matuun matak-malirin baa ha'u lai, foin kabusik o!”
27 Hotu, mane nia nusu na'ak, “O naran see?”
Nia nataa na'ak, “Yakob.”
28 Hotu, mane nia na'ak, “Okaan naran lahoos Yakob tenik! Nahuu baa oras ne'e, ema atu bolu o Isra'el, tan o makte'ur ti'an sakar ema raiklaran no sakar Maromak, to'o o modi sia.” (Naran Isra-el ne'e na'ak ‘nia mak nakte'ur no Maromak’.)
29 Hotu, Yakob moos nusu na'ak, “O naran see?”
Mais, mane nia nataa na'ak, “O musu ha'ukaan naran atu malo saa?” Hotu, nia natuun matak-malirin baa Yakob iha nia.
30 Nunia hotu, Yakob dale na'ak, “Ha'u karee besik Maromak oin ti'an, mais ha'u ksei moris.” Tan baa nia, Yakob nanaran fatin nia na'ak, Peniel. Lia isin na'ak, ‘Maromak Oin’.