3 Hotu, MAROMAK naruka Yakob na'ak, “Oras to'o ti'an. Fila mikar baa o inan-aman ona. Ha'u nanis kamalu o.”

4 Rona Maromak naruka nunia, Yakob moos naruka ema bolu Rahel no Lea mai nasoru nia iha hae molik. 5 Feen sia to'o mai ti'an, Yakob katak baa na'ak, “Loron hira ne'e, ha'u karee emikaan aman oin kadubuk no la di'ak no ha'u hanesan uluk. Mais ha'u katene ka'ak, Maromak mak ha'ukaan ama tonu-naboot, nanis namutuk no ha'u. 6 Emi rua hatene ha'u kserwisu susi ruin kleur ti'an bodik emikaan aman. 7 Mais nia be'ur nakdiuk ha'u! Nia seluk nakdiuk ha'ukaan saseban to'o dala sanulu. Masik nunia moos, Maromak daka di'a-di'ak ha'u. 8 Oras emikaan aman nameno baa ha'u na'ak, ‘Bibi rahun makerek sia dadi baa okaan saseban,’ foin bibi nahoris oan rahun makerek hotu. Baa dala seluk nia dale tenik na'ak, ‘Oras ne'e, bibi rahun falatak sia dadi baa okaan saseban.’ Foin bibi sia nahoris oan rahun falatak hotu. 9 Maromak mak nalo nunia, nebee nola emikaan aman bibin, foo baa ha'u.

10 Dala ida, oras bibi sia nakla'ok malu, ha'u kme'i karee ka'ak bibi aman mak nakla'ok nia sia, rahun makerek no falatak mohu. 11 Hotu, Maromak Niakaan makbukar lale'an ida bolu ha'u iha me'i nia na'ak, ‘Hei Yakob!’

Ha'u ksimu ka'ak, ‘He'e Na'i Maromak?’

12 Nia moos katak na'ak, ‘Maree lai! Bibi aman mak nakla'ok nia sia, rahun makerek no falatak mohu. Ha'u mak babilan nunia, tan Ha'u karee ti'an saa mak Laban nalo baa o. 13 Ha'u ne'e, Maromak. Ha'u mak katadu aan baa o iha Betel. Iha nebaa, o mariik fatuk ida, o fui mina baa leten, modi lo'u-sudur baa Ha'u. Hotu, o mamate menon mo Ha'u iha nia. Oras ne'e, o musti la'o mela rai ne'e, fila mikar baa okaan inan-aman rain.’”

14 Rona la'en dale nunia, Rahel no Lea nataa na'ak, “Di'ak! Ami tuir dei, tan ami la hetan tenik sasoin ti'an nosi ama Laban! 15 Nia nalo ami hanesan ema seluk! Nia fa'an ami, hotu naa lakon amikaan folin! 16 Sasoin hotu-hotu mak Maromak nola ti'an nosi ama Laban, oras ne'e dadi bein sasoin bodik ami ho amikaan oan sia! Tan lia nia, kalo Maromak katak nunia ti'an, ami tuir baa dei!”

17-18 Feen sia simu nunia, Yakob moos nahuu nadi'a naha sia. Nia nasa'e feen-oan hotu-hotu baa kuda unta, no naha mak nia netan ti'an iha Padan-Aram. Nia nala'o nodi bibi no karau hotu-hotu, fila nikar baa rai Kana'an.

19 Oras Yakob sia atu la'o, Laban la iha uma, tan nia baa teri bibi malae rahun. Naree nunia, Rahel foti nana'o nodi aman niakaan ai'oi lulik sia. 20 Yakob sia la'o, la tami niakaan banin mane. 21 Sia la'o lai-lais nodi sasoin hotu-hotu, nakur mota boot, liu baa foho Gilead.

22 Loron tolu liu ti'an, foin Laban natene na'ak Yakob sia nalai ti'an. 23 Hotu, Laban libur niakaan ema sia, te'ur tuir Yakob sia. Tuir to'o loron hitu, foin toma sia iha foho Gilead sia.

24 Baa kalan nia, Maromak natadu aan baa Laban iha me'i na'ak, “Laban! Kalo o dale mo Yakob, daka ibun di'a-di'ak.”

25 Kalan nia, Yakob nariik batane iha foho Gilead sia. Laban sia moos nariik batane la dook nosi nia.

26 Baa awan, Laban mai nasoru Yakob nodi katak na'ak, “Yakob! Tan saa o malai no-nook modi ha'ukaan oan feto sia? Hanesan o modi ema mak o kohi mola iha hatuda laran. 27 O malai no-nook, o la tami ha'u tenik! Kalo o katak di'a-di'ak ha'u, nanis ha'u kalo dahur, kala'o emi kodi likurai no bareka, foin emi la'o! 28 Okaan salan ida tenik, o la foo leet baa ha'u kde'i ha'ukaan oan no bein oan sia. Okaan hahalok ne'e, beik liu resik! 29 Ha'u atu kasusar o, bele basuk! Mais hori kalan, Maromak mak okaan ama lo'u-sudur baa, de'an ha'u na'ak, kalo ha'u kdale ko o, ha'u kmusti daka ibun di'a-di'ak. 30 Ha'u katene o la'o ne'e tan o makara fila mikar! Mais, tan saa o sei mana'o modi tenik ha'ukaan ai'oi lulik sia?”

31 Yakob nataa na'ak, “Tua na'i keta de'an ha'u! Ha'u kla'o no-nook, tan ha'u kata'uk keta arumak tua na'i natoos oan ne'e sia, hotu nunabee?” 32 Yakob dale nunia, mais nia du'uk la natene feen Rahel nana'o nodi ai'oik nia sia. Hotu, nia dale tenik na'ak, “Tua na'i! Lia ai'oi lulik nia, buka baa! Kalo o metan, taa ukun mate baa ema mak nodi. Sobu karin hotu-hotu dei! Kalo ama na'i metan sasoin seluk sia moos, mola mikar. Nebee, ema ne'e sia hotu-hotu dadi saksiin.”

33 Hotu, Laban baa buka ai'oik nia sia iha ida-idak batanen. Uluk fohon, Yakob niakaan. Hotu, Lea niakaan. Liu baa, ata feto rua siakaan. Mais, nia la netan ai'oik nia sia. Ikus basuk, nia tama baa Rahel batanen. 34 Mais, Rahel rai subar ai'oik nia sia iha kusin kuda unta ohak. Hotu, nia tuur natoos. Laban buka nasirin Rahel batanen, mais la netan.

35 Oras nia Rahel dale baa aman na'ak, “Ama keta kanarak. Ha'u la kbele kariik, tan ha'u ko'i kasoru fulan.” Laban buka baa-mai, mais la netan.

36 Hotu, Yakob nawan sa'e. Nia dale maka'as baa Laban na'ak, “Ha'u kalo aat saa ti'an baa tua na'i, to'o te'ur tuir ha'u hanesan ema aat! 37 Tua na'i sobu karin naha sia ti'an! Hotu, hetan saa? Kalo hetan saa, rai baa oin ne'e, nebee ita hotu-hotu haree! Nebee ema ne'e sia bele nakotu, see niakaan! 38 Tinan rua nulu ti'an, ha'u kserwisu bodik tua na'i. Oras ha'u kdaka tua na'i niakaan bibi no karau sia, la noo matan ida mak lonus. Matan ida moos, ha'u la kaa kola. 39 Kalo asu fuik no'o tua na'i bibin, ha'u la kasara baa tua na'i. Mais ha'u mak selu du'uk. Tenik, kalo ema nana'o tua na'i bibin, tua na'i naruka ha'u mak selu, masik ha'u la sala! 40 Oras loro makas, loro tunu nawai ha'u. Baa kalan, ha'u kiki tan malirin. Masik ha'u kakati moos, ha'u kdaka tua na'i bibin sia loron-kalan. 41 Tinan rua nulu nia, tebes! Ha'u kserwisu tinan sanulu resin haat, nebee ha'u ketan tua na'i oan feto sia! Hotu kserwisu tenik tinan neen, nebee ha'u ketan bibi sia! Ha'u kserwisu kleur nunia, mais tua na'i seluk nakdiuk ha'ukaan saseban sia, to'o dala sanulu. 42 Mais ha'u ksotir tan Maromak mak Bei Abraham no Ama Isak lo'u-sudur baa. Kalo Maromak la daka ha'u, nanis tua na'i naruka ema nabu'a fila ha'u, la'o kodi liman mamuk. Mais Maromak la taka matan baa ha'ukaan susar. Nia naree ha'ukaan serwisu hotu-hotu. Etuk hori fonin, Nia mai naruka tua na'i daka ibun.”

43 Rona Yakob dale nunia, Laban dale na'ak, “Nune'e! Feto na'in rua nia, ha'ukaan oan. Oan mak sia nahoris moos ha'ukaan bein oan sia. Bibi no karau hotu-hotu ne'e moos, ha'ukaan. Sa-saa hotu-hotu mak o maree iha ne'e, nanis ha'ukaan! Mais, ha'u la kbele katoos. 44 Di'ak liu, ita rua hamate menon, nebee ita moris tuir mamenon nia.”

45 Hotu, Yakob foti nola fatuk boot ida, taman nariik fatuk nia atu nalo tadak. 46 Nia moos naruka niakaan ema sia libur fatuk nodi butuk. Hotu, Yakob no Laban sia hotu-hotu tuur atu nalo lahan nodi naa iha nia. 47 Laban tau naran baa fatuk butuk nia nodi lia Aram na'ak Yegar Sahaduta (lia isin na'ak ‘fatuk saksiin’). Yakob moos foo naran nodi lia Ibrani na'ak Galeed (lia ne'e moos na'ak ‘fatuk saksiin’).

48 Hotu, Laban katak na'ak, “Fatuk butuk ne'e, dadi saksiin bodik ita rua.” (Tan lia nia, ema nanaran fatin nia na'ak Galeed.) 49 Laban moos katak na'ak, “Nanis MAROMAK du'uk mak daka ita rua, nebee masik ita rua dook malu, ita keta hakur mamenon ne'e.” Etuk, nia moos nanaran fatin nia, Mispa (tan lia fuan mispa ne'e, lian hanesan lia fuan na'ak ‘daka fatin aas’). 50 Hotu Laban dale tenik na'ak, “Kalo o malo aat mo ha'ukaan oan sia, lale o mola tenik feto, ha'u la katene. Mais manoin! Maromak mak dadi saksiin baa o mo ha'u. 51-52 Maree kokon fatuk hariik no fatuk butuk ne'e. Fatuk ne'e sia dadi kladik. O la bele makur liu fatuk ne'e sia, modi malo aat baa ha'u. Ha'u moos la bele kakur liu fatuk ne'e sia, kodi kalo aat baa o. 53 Ita rua hamate menon ne'e, hodi itakaan bei siakaan Maromak, mak okaan bei Abraham no ha'ukaan bei Nahor lo'u-sudur baa. Maromak du'uk mak dadi makotu lia bodik ita.”

Hodi nunia, Yakob moos tuir narai aan nodi Maromak naran, mak niakaan aman Isak lo'u-sudur baa.

54 Hotu, Yakob nalo sera baa Maromak iha foho nia leten. Nia moos bolu ema hotu-hotu iha nia sia atu mai naa bele-bele, nodi daka to'o seisawan.

55 Seisawan oan, Laban nako'ak de'i oan no bein oan sia hotu-hotu. Nia naloon foo matak-malirin baa sia. Hotu, nia fila nikar.