Yakob nasoru nikar maun Esau
33
Loron nia, Yakob naree Esau lolok mai no niakaan ema na'in atus haat. Hotu, Yakob fa'e oan sia, foo baa inan ida-idak. 2 Nahulin feen ki'ik rua no oan sia la'o iha oin. Foin, Lea no oan sia. Hotu, Rahel no oan Yusuf ikus basuk. 3 Yakob la'o iha oin basuk. Kre'is baa maun, nia nakni'a nodi sudur isin hitu.4 Naree alin, Esau moos nalai baa nasoru. Hotu nako'ak de'i nia. Sia rua moos tanis. 5 Esau moos nusu na'ak, “Feto no oan ne'e sia hotu-hotu, see?”
Yakob nataa na'ak, “Sia ne'e, mak Maromak foo baa mau atan, ha'u ne'e.”
6 Hotu, Yakob feen ki'ik sia no oan sia, mai sudur baa Esau. 7 Hotu, Lea no oan sia mai sudur baa Esau. Ikus basuk, Yusuf no inan Rahel, mai sudur baa.
8 Hotu, Esau nusu na'ak “Bibi no karau mak o solok ohin nia, atu halo baa saa?”
Yakob nataa na'ak, “Nune'e mau! Ha'u kfoo baa mau, nebee mau simu ami nodi laran maluak.”
9 Mais Esau dale na'ak, “Ali Yakob! Ha'ukaan sasoin moos wa'in. Lalika foo tenik sa-saa baa ha'u.”
10 Yakob nataa na'ak, “Keta nunia, mau! Mau musti simu, atu dadi baa tadak na'ak mau simu ha'u nodi liman rua. Tan oras ha'u karee mau nanasa ohin nia, hanesan ha'u karee Maromak mak nanasa no h'au. 11 Dadi, ha'u kusu no kakneter, nebee mau simu buat mak la no folin ne'e sia. Maromak di'ak liu resik baa ha'u ti'an. Nia foo sa-saa hotu-hotu, mak ha'u kbuka.” Yakob namaus Esau nohuun nunia, to'o Esau moos simu.
12 Hotu Esau na'ak, “Kalo nunia, hadi'a aan la'o ona! Ha'u ko kela emi baa.”
13 Mais Yakob nataa na'ak, “Lalika mau! Mau na'in naree baa! Oan sia sei ki'ik, la bele la'o lai-lais. Bibi no karau mak foin nahoa sia moos wa'in. Kalo seten sia la'o lai-lais, loron ida dei sia bele mate mohu. 14 Di'ak liu, mau sia uluk ona. Ami tuir nai-naik. Ami to'o ti'an, foin ha'u kmai karee mau iha Seir.”
15 Rona Yakob dale nunia, Esau katak na'ak, “Kalo nunia, ha'u kela klosan balu atu no nela emi baa.”
Mais Yakob nataa na'ak, “Mau lalika hakole aan! Surak mau simu ha'u dei, to'o ti'an.”
16 Rona nunia, Esau la'o nela sia, fila baa Seir. 17 Mais Yakob la baa Seir. Nia baa fatin ida seluk, naran Sukot. Iha nebaa, nia nariik uma hein heik nodi nalo lalu'an bodik bibi no karau sia. Tan nia nariik uma hein heik iha nia, ema nanaran fatin nia na'ak Sukot. (Naran sukot lia isin na'ak ‘uma hein heik’.)
18 Nosi ikus, Yakob sia moos lori baa leo Sikem iha rai Kana'an. Hodi nunia, sia la'o no dame nosi Padan-Aram to'o Kana'an. Hotu, sia nariik batane kre'is baa leo Sikem. 19 Rai mak Yakob nariik batane fatik nia, nia sosa nola nosi Hemor, mak Sikem aman. Nia selu kotu nodi osan murak tomak atus ida. 20 Nia moos nada fatuk, nalo taroman iha nia. Hotu, nia nanaran fatin nia, El-Elohe-Isra'el. Lia isin na'ak ‘Maromak mak Isra'el lo'u-sudur baa’.