2 Rona Rahel naksuhuk nunia, Yakob nakanas na'ak, “O maneo ha'u ne'e, Maromak mak bele foo oan baa o ka!?”

3 Rahel nataa na'ak, “Nune'e! Di'ak liu, o mola ha'ukaan atan Bilha, toba mo nia, nebee nahoris oan bodik ha'u.”

4 Hotu, Rahel latan Bilha baa la'en. Yakob moos toba no nia. 5 Bilha ko'us, hotu nahoris oan mane ida. 6 Naree nunia, Rahel dale na'ak, “Maromak rona ha'ukaan hamulak ti'an nodi foo oan mane ida baa ha'u! Nia nakotu ha'ukaan lia nodi moon!” Hotu, Rahel nanaran oan nia, naran Dan (tan lia fuan dan isin na'ak ‘hakotu lia hodi moon’).

7 Hotu, Bilha ko'us, netan tenik oan mane ida. 8 Rahel moos dale tenik na'ak, “Ha'u ko ha'ukaan biin sita malu ti'an. Ha'u mak kodi nia.” Tan baa nia, Rahel nanaran oan nia, naran Naftali (tan lia fuan naftali isin na'ak ‘sita malu’).

9 Oras Lea noran la netan oan tenik, nia latan atan Silpa baa Yakob, atu nalo baa feen. 10 Hotu, Silpa ko'us, nahoris oan mane ida. 11 Naree nunia, Lea dale na'ak, “Ha'u ketan sotir di'ak ti'an.” Tan baa nia, Lea nanaran oan nia, naran Gad (tan lia fuan gad isin na'ak ‘sotir di'ak’).

12 Hotu, Silpa ko'us, nahoris tenik oan mane ida. 13 Naree nunia, Lea moos dale na'ak, “Haa! Oras ne'e, foin ha'u neon di'ak! Lei haree! Feto hotu-hotu atu dale na'ak, ha'u ketan sotir di'ak basuk ti'an.” Tan baa nia, Lea nanaran oan nia, naran Aser (tan lia fuan aser isin na'ak ‘neon di'ak’).

14 Dala ida, oras ku'u hare, Ruben baa alas laran. Nia netan ai horis ida dadi aitahan mak bele nalo ema netan oan. Nia nodi mai baa inan Lea. Naree nunia, Rahel nusu baa Lea na'ak, “Bii! Aitahan mak ohin Ruben nodi mai nia, foo oan ida baa ha'u lai.”

15 Mais Lea nataa na'ak, “Hoi! O ne'e, liu resik! O madau mola ha'ukaan la'en ti'an. Oras ne'e, o nmakara madau mola tenik aitahan mosi ha'ukaan oan. O ne'e moe lalek!”

Mais Rahel dale na'ak, “Nune'e bii. Kalo ha'u ketan aitahan nia, ohin kalan ne'e o bele toba mo Yakob!” Rona nola nunia, Lea moos nakara.

16 Loro malirin, Yakob fila nikar nosi to'os. Lea baa nasoru Yakob nodi na'ak, “Yakob! Kalan ne'e, o musti toba mo ha'u, tan ha'u kselu kedan ti'an, kodi ha'ukaan oan aitahan.” Hotu, Yakob toba no Lea baa kalan nia.

17 Tan Maromak rona Lea namulak, Lea moos ko'us, hotu nahoris oan mane nomer lima. 18 Nia dale na'ak, “Maromak selu ha'ukaan kolen ti'an, tan ha'u klatan Silpa dadi baa ha'ukaan la'en feen.” Tan baa nia, Lea nanaran oan nia, naran Isaskar (tan lia fuan isaskar na'ak ‘selu kolen’).

19 Nosi ikus, Lea ko'us, hotu nahoris tenik oan mane nomer neen. 20 Nia dale na'ak, “Maromak foo loos lia kabaas ida baa ha'u ti'an. Oras ne'e, ha'ukaan la'en musti nakneter ha'u, tan ha'u kahoris oan mane na'in neen ti'an bodik nia.” Hotu, Lea nanaran oan nia, naran Sebulon (tan lia fuan sebulon isin na'ak ‘hakneter’).

21 Nosi ikus, Lea nahoris oan feto ida. Nia nanaran oan nia, naran Dina.

22 Nosi ikus, Maromak nanoin Rahel nodi rona niakaan hamulak. Maromak loke Rahel notak, 23 hotu Rahel ko'us, nahoris oan mane ida. Hotu nia dale na'ak, “Maromak foti soe ha'ukaan moe ti'an.” 24 Nia moos dale na'ak, “Nebee Maromak foo tu'an oan mane ida tenik baa ha'u.” Tan baa nia, Rahel nanaran oan nia, naran Yusuf (tan lia fuan yusuf isin na'ak ‘kusu nebee foo tu'an’).

25 Rahel nahoris Yusuf ti'an, Yakob dale no Laban na'ak, “Ama! Kalo bele, ha'u kfila uma lai, 26 ko ha'ukaan feen no oan sia. Ama natene ha'u kserwisu susi ruin bodik selu kotu sia ti'an.”

27 Rona mane foun dale nunia, banin mane nataa na'ak, “Oa, rona lai! Kodi kleno urat, ha'u katene MAROMAK natuun matak-malirin baa ha'u, tan o. 28 Dadi, makara musu hira moos, ha'u kselu! Surak, tuur mafati iha ne'e, modi serwisu nima-nimak bodik ha'u.”

29 Rona nola nunia, Yakob nataa na'ak, “Ama naree du'uk ti'an, ha'ukaan serwisu maka'as. Tan ha'u serwisu maka'as nunia, ama niakaan bibi no karau sia bea bei-beik. 30 Oras ha'u ksei la mai dauk, ama sasoin sia sei la duun wa'in nunia. Mais oras ne'e, ama soi ti'an. MAROMAK natuun matak-malirin baa ama, tan ha'ukaan serwisu nia. Oras to'o ti'an, ha'u atu kserwisu bodik ha'ukaan feen-oan.”

31 Rona nola nunia, Laban nusu na'ak, “Ha'u kmusti selu nunabee baa o?”

Yakob nataa na'ak, “Ama lalika foo sa-saa baa ha'u. Ha'u atu kaliku ama niakaan bibi sia bei-beik, surak ha'u kbele kalo lia ida nune'e. 32 Ohin loron ne'e kedan, foo leet baa ha'u kbaa ama niakaan bibi no bibi malae sia, nebee kboi kola balu. Rahun la makerek, dadi baa ama niakaan. Mais kalo rahun makerek, dadi baa ha'ukaan. Ha'u moos kola bibi malae metan hotu-hotu. Bibi nia sia, hodi selu ha'ukaan kolen.^a 33 Baa loron ikus, ama bele natene ha'u ne'e moon ka lale. Oras nabee dei, ama bele mai naree ha'ukaan bibi sia. Kalo ama naree bibi rahun la makerek, lale haree bibi malae mutik, ama natene kedan na'ak, ha'u kana'o kola bibi nia sia.”

34 Rona nola nunia, Laban simu nodi na'ak, “Di'ak! Nunia dei.” 35-36 Mais loron nia moos, Laban be'ur kedan Yakob, nodi fa'e salin bibi mak rahun makerek no mak rahun metan. Hotu, nia naruka oan sia nala'o nodi kedan bibi nia sia baa fatin ida mak salin dook nosi Yakob. Fatin nia, la'o rai loron tolu laran. Hotu, sia naliku bibi nia sia iha nia.

Mais Yakob sei naliku banin mane niakaan bibi no bibi malae seluk sia. 37 Hotu, nia taa nola ai sorun nosi ai huun oik tolu. Nia loke ai kulit nia sia nalo makerek mak noo kaketak. 38 Nia tau ai makerek mak noo keketak nia sia baa bibi hemun fatik. Bibi sia nanis nakla'ok malu iha nia. 39 Tan bibi sia nakla'ok malu iha ai makerek mak noo keketak nia sia, oan sia moris mai, rahun makerek.

40 Oras Laban niakaan bibi sia nakla'ok malu, Yakob feur sia se'i oin baa bibi rahun makerek. Hotu, oan sia moos rahun makerek hotu. Nodi nunia, Yakob niakaan bibi sia bea tu'an. Hotu, nia sasa fa'e sia, nosi Laban niakaan bibi sia. 41 Baa oras bibi mak biit nakla'ok malu, Yakob tau ai makerek iha siakaan oin iha siakaan hemun fatik. 42 Mais, kalo naree bibi biit lalek sia nakla'ok malu, nia la rai ai baa. Hodi nunia, Laban netan bibi biit lalek hotu-hotu. Mais, Yakob netan bibi mak biit hotu-hotu. 43 Hodi nunia, Yakob soi tebe-tebes. Niakaan bibi, bibi malae, kuda unta, kuda keledai no ata sia, wa'in liu resik.