28
Rona Ribka dale nunia, Isak bolu nola Yakob. Nia foo lia tate'an no nusu matak-malirin na'ak, “Rona di'a-di'ak, Yakob! O keta mola feto Kana'an! 2 Baa okaan bein Betuel uman iha Padan Aram. Mola okaan tua na'i Laban oan feto ida.a 3 Nebee Maromak mak Beran Kaliuk natuun matak-malirin baa o. Nebee okaan husar-binan bea dadi baa ema klubun wa'in boot! 4 Nebee Maromak mamenon mak Nia namate no okaan bei Abraham, tuun baa o mo okaan husar-binan. O metan rai ne'e, mak MAROMAK nameno ti'an latan baa bei Abraham.”b 5 Dale notu nunia, Isak moos nabusik Yakob baa tua na'i Laban no bei Betuel uman iha Padan-Aram.Esau nola Ismael oan feto
6 Baa oras nia, Esau rona nola na'ak Isak foo lia tate'an baa Yakob ti'an na'ak, keta nola feto Kana'an, mais baa nola tua na'i oan feto ida iha Padan-Aram. 7 Esau moos natene Yakob la'o ti'an baa Padan-Aram, tuir inan-aman hakaran.
8 Tan baa nia, Esau natene kedan na'ak, aman la nakara niakaan feen sia mak ema Kana'an. 9 Tan lia nia, Esau baa niakaan ama boot Ismael, hotu nola Ismael oan feto ida, naran Mahalat, nalo tenik baa feen. Mahalat ne'e, Nebayot feton.
Yakob me'i iha Betel
10 Oras nia, Yakob la'o nela Beer Syeba, atu baa leo Haran. 11 To'o dalan klaran, loro monu ti'an. Oras nia atu toba, nia nola fatuk ida nalo baa kluni.
12 Baa kalan nia, nia me'i na'ak, nia naree asodan ida nariik lolo, dikin aas to'o lale'an. Maromak Niakaan makbukar sia sa'e-tuun asodan nia. 13 Iha me'i nia moos, Yakob naree MAROMAK nariik iha niakaan sorin nodi na'ak, “Ha'u ne'e, MAROMAK mak okaan bei Abraham no okaan ama Isak lo'u-sudur baa. Ha'u atu klatan rai ne'e, bodik o mo okaan husar-binan. 14 Okaan husar-binan sia atu bea wa'in hanesan raihenek! Sia atu keke lema baa fatin hotu-hotu. Nosi okaan husar-binan, ema klubun hotu-hotu iha raiklaran ne'e, atu netan matak-malirin.c 15 Manoin di'a-di'ak! O baa nabee dei, Ha'u kamalu. Ha'u moos kdaka o. Ha'u atu kodi o fila mikar mai rai ne'e. Ha'u la kla'o kela o. Mamenon hotu-hotu mak Ha'u kameno baa o ne'e, nanis dadi.”
16 Oras Yakob naktekir, nia dale na'ak, “Ha'u kfoin katene, MAROMAK moos iha ne'e!” 17 Mais nia moos nata'uk nodi naneo na'ak, “Adeei! Fatin ne'e, nanis fatik lulik. Arumak Maromak Tofatik, mak odamatan baa lale'an.”d
18 Awan seisawan, Yakob nadeer. Nia foti nola fatuk kluni nia, nariik fatuk nia, nalo baa tadak. Hotu, nia fui mina baa fatuk leten, nodi lo'u-sudur baa Maromak. 19 Nia nanaran fatin nia, Betel, tan lia fuan bet-el na'ak ‘Maromak Tofatik’. (Uluk, fatin nia naran Lus.)
20 Hotu, Yakob narai aan na'ak, “Kalo Na'i Maromak namutuk ha'u no daka ha'u iha ha'ukaan dalan ne'e, nodi foo haan no tais baa ha'u, 21 to'o ha'u fila kikar di'a-di'ak, ha'u atu klo'u-sudur baa Nia mesan dei. 22 Fatuk mak ha'u kariik ti'an ne'e, dadi fatik lo'u-sudur baa Maromak. Sa-saa hotu-hotu mak Maromak latan baa ha'u, ha'u moos foo kikar fa'ek ida nosi fafa'ek sanulu.”