Isak kona be'ur to'o foo matak-malirin baa Yakob
27
Oras Isak hetak katuas, matan moos malahuk basuk ti'an. Loron ida, nia bolu oan ulun Esau mak nia nadomi basuk na'ak, “Esau, mai ne'e lai!”Esau nataa na'ak, “He'e ama.”
2 Hotu, Isak katak baa Esau na'ak, “Ha'u katuas ti'an, la katene wainhira ha'u kmate. 3 Oras ne'e, o mola rama no diman, baa buka mola na'an fuik ida bodik ha'u! 4 Hotu te'in, malo midar tuir ha'ukaan beer. Hotu, modi mai ha'u. Kaa kotu, ha'u kfoo kedan matak-malirin baa o. Kalo ha'u kfoo matak-malirin baa o ti'an, ha'u kmate moos, bele ona.”
5 Rona nola nunia, Esau sai baa buka na'an fuik. Mais natoon baa oras Isak dale no Esau, Ribka moos rona. 6 Hotu, Ribka baa katak Yakob na'ak, “Hei Yakob! Rona di'a-di'ak! Foin da-dauk, ha'u krona okaan aman dale baa Esau, na'ak nune'e: 7 ‘Baa buka mola na'an fuik ida. Hotu, te'in, malo midar, modi mai ha'u. Kaa kotu ti'an, ha'u kfoo kedan matak-malirin baa o iha MAROMAK oin.’ 8 Tan okaan ama na'ak nunia, o rona di'a-di'ak modi malo tuir ha'ukaan harukan ne'e. 9 Baa itakaan bibi natar, boi mola bibi salak bokur matan rua. Ko'a mola isin, modi mai ha'u. Ha'u atu kte'in, tuir okaan aman beer. 10 Te'in kotu ti'an, o musti modi baa okaan ama naa, nebee oras nia sei moris ne'e, nia foo kedan matak-malirin baa o ona. Hodi nunia, o mak metan matak-malirin. Lahoos okaan maun.”
11 Mais Yakob dale baa inan na'ak, “Nune'e ina. Mau Esau isin marahuk, mais ha'u lale! 12 Keta arumak ama kaer kona ha'ukaan isin, hotu natene kedan na'ak, ha'u kbe'ur nia. Hotu nia kastikar ha'u!”
13 Mais inan katak na'ak, “Yakob! Keta mata'uk. Ina mak nahulin! Kalo ama kastikar o, so'in ina mak natiu! Baa mola bibi nia sia ona.”
14 Rona nola nunia, Yakob baa boi nola bibi. Hotu, ko'a nodi foo baa inan. Ribka moos te'in kedan tuir Isak beer. 15 Hotu Ribka baa nola faru ida mak Esau tau nanis, foo baa Yakob tau. 16 Nia moos falun Yakob liman no kokorok nodi bibi kulit mak noo rahun. 17 Hotu nia foo baa Yakob haan midar nia no tubi mak nia nalo ti'an.
18 Hotu, Yakob nodi haan nia baa aman nodi katak na'ak, “Ama! Ha'u kmai ti'an.”
Isak nataa na'ak, “O see?”
19 Yakob nataa na'ak, “Ha'u, ama oan ulun, Esau! Ha'u kalo ti'an tuir ama nakara ohin nia. Madeer, maa ona. Ha'u kte'in ti'an na'an nia mak kola iha alas laran. Maa hotu, foo kedan matak-malirin baa ha'u ona.”
20 Rona nola nunia, Isak katak na'ak, “O maka'as tebes! O bele metan lais nunia?”
Yakob nataa na'ak, “Ha'u ketan ne'e, tan MAROMAK mak ama lo'u-sudur baa, tulun ha'u!”
21 Hotu, Isak bolu Yakob na'ak, “Mare'is aan mai, nebee ha'u kaer kokon o! O ne'e, Esau tebes ka, lahoos?”
22 Hotu, Yakob nare'is aan baa aman. Katuas nahuu kaer nia nodi na'ak, “Lia maliak ne'e, Yakob lian! Mais liman ne'e, Esau liman.” 23 Isak la natene Yakob, tan liman marahuk hanesan Esau. Isak simu atu foo matak-malirin baa Yakob, 24 mais nia sei nusu tenik na'ak, “O ne'e, Esau tebes ka?”
Yakob nataa na'ak, “Tebes, ama!”
25 Hotu, Isak dale na'ak, “Lolo soruk na'an nia mai, nebee ha'u kaa. Kaa kotu, ha'u kfoo matak-malirin baa o.” Yakob moos lolo soruk na'an nia no anggor ween baa, Aman moos naa. 26 Naa-nemu notu, aman katak na'ak, “Oa! Mare'is aan mai, de'i ha'u.”
27 Yakob moos nare'is aan baa de'i aman. Isak moos noran nola Esau farun nuhar. Hotu, nia foo matak-malirin baa Yakob na'ak,
“Ha'ukaan oan nuhar, hanesan hae molik mak MAROMAK natuun matak-malirin baa.
28 Nebee, Maromak natuun ma'un nosi lale'an,
nalo okaan to'os dadi bo'as no boran!
Nebee, Maromak foo o hare wa'in lear,
no anggor fuan bokar tebe-tebes.
29 Ema klubun sia atu dadi baa okaan atan.
Ema hunun sia atu lo'u-sudur no foo kneter baa o.
Nebee, o ukun baa okaan maun-alin sia hotu-hotu.
Sia moos nakni'a baa o.
See mak kastikar o, sia moos netan kastikar.
See mak foo matak-malirin baa o, sia moos netan matak-malirin.”
Esau fila, nusu Isak foo matak-malirin baa nia
30 Isak foo matak-malirin baa Yakob ti'an, Yakob sai nela aman. La kleur, maun Esau fila mai, nodi na'an mak foin kohi nola. 31 Nia baa te'in, hotu nodi baa aman. Nia bolu na'ak, “Ama! Ha'u kmai ti'an. Madeer maa ona. Ha'u kte'in ti'an na'an fuik mak ama nusu nia. Ama naa notu, foo matak-malirin baa ha'u ona.”
32 Rona nola nunia, Isak blaar! Hotu nia nusu na'ak, “Hoi! O ne'e, see tenik?”
Esau nataa na'ak, “Ha'u, Esau. Ama oan ulun.”
33 Rona nola nunia, Isak kiki. Hotu nia nusu na'ak, “Kalo nunia, see mak ohin nodi na'an baa ha'u kaa nia? Ha'u kfoo matak-malirin baa nia ti'an! La bele fokit kikar ona.”
34 Rona aman dale nunia, Esau laran moras kedan. Nia tanis nodi nusu na'ak, “Adeei, ama! Foo tenik matak-malirin baa ha'u!”
35 Isak moos nataa na'ak, “Okaan alin mai be'ur nola ha'u, nodi nana'o nola okaan matak-malirin ti'an.”
36 Hotu Esau dale na'ak, “Nia be'ur ha'u dala rua ti'an. Uluk fohon, be'ur nola ha'ukaan beran oa ulun! Oras ne'e, be'ur nola tenik ha'ukaan matak-malirin. Etuk oin, nia naran ‘Yakob’. Tan lisan tebe-tebes tuir naran ‘be'ur teen’. Mais ama sei noo matak-malirin seluk bodik ha'u ka lale?”
37 Isak nataa na'ak, “Ha'u kfoti ti'an nia dadi baa okaan ulun. Niakaan maun-alin hotu-hotu, atu dadi baa niakaan atan! Ha'u kfoo ti'an baa nia, hare wa'in lear no anggor fuan bokar tebe-tebes. Dadi, oa! Oras ne'e, matak-malirin saa tenik mak atu kfoo baa o? La noo ti'an.”
38 Rona nola nunia, Esau nusu bei-beik baa aman na'ak, “Ama noo matak-malirin mesak ida dei ka? Nanis, ama sei bele buka matak-malirin seluk bodik ha'u. Masik oan ida dei moos, di'ak!” Hotu, Esau tanis tenik.
39 Isak moos nataa nikar nia na'ak,
“O atu moris dook mosi to'os boran,
tan ma'un la tuun nosi lale'an nabotes okaan rain.
40 Okaan surik naruk mak atu foo moris baa o.
Masik nunabee moos, o dadi ata baa okaan alin.
Kalo o bele maksakar aan mo nia, foin o bele makbudi sai mosi niakaan liman.”
Ribka naruka Yakob nalai
41 Nunia hotu, Esau hirus tebe-tebes Yakob, tan nia nadau nola niakaan matak-malirin. Mais Esau naneo na'ak, “La kleur, ama mate. Dadi, ha'u kein dei, to'o loron daka ama maten liu ti'an, foin ha'u ko'o nia!”
42-43 Mais Ribka rona Esau lia kakotun nia. Hotu, nia bolu nola Yakob nodi katak na'ak, “Rona di'a-di'ak! Okaan maun hirus o to'o atu no'o o. Dadi, malai lai-lais baa okaan tua na'i Laban iha leo Haran. 44 Baa mein heik iha nebaa, to'o okaan maun laran malirin. 45 Nosi ikus, kalo nia nalu'a ti'an okaan hahalok baa nia, foin ha'u karuka ema bolu nikar o. Tan ha'u la ko'uk, ha'ukaan oan rua-rua lakon loron ida.”
46 Hotu, Ribka katak baa Isak na'ak, “Ha'u la kbeer ti'an Esau feen ema Het nia! Kalo Yakob moos nola feto Het, di'ak liu ha'u kmate.”