Isak no Na'i Abimelek
26
Baa tinan ida, rai salaen boot iha rai nia, manesak no rai salaen baa oras Abraham sei moris. Tan baa nia, Isak baa nusu baa ema Filistin siakaan na'in, naran Abimelek, nebee nia bele nein iha Gerar. 2 Nia nalo nunia, tan MAROMAK natadu aan baa nia na'ak, “Keta baa Mesir. Ha'u atu katudu fatin seluk baa o. 3-4 Kalo o dadi ema maktabar iha fatin nia, Ha'u atu kamutuk ko o, kodi katuun matak-malirin oi-oik baa o. Ha'u moos kalo okaan husar-binan sia bea tu'an, hanesan fitun iha lale'an. Ha'u moos latan baa o mo okaan husar-binan sia, rai nia tomak. Nosi okaan husar-binan, ema klubun hotu-hotu iha raiklaran netan matak-malirin. Hodi nunia, Ha'u kala'o Ha'ukaan mamenon baa okaan aman Abraham.a 5 Ha'u kalo lia ne'e sia hotu-hotu, tan okaan aman tuir ti'an Ha'ukaan hakaran, Ha'ukaan harukan, no Ha'ukaan ukun.” 6 Tan Maromak lian nia, Isak nein kre'is kota ida iha rai Gerar, dadi ema maktabar.7 Isak feen Ribka, kabaas basuk. Baa oras ema iha nia sia naree nola nia, sia nusu nati'i lia nosi nia. Mais Isak nataa na'ak, “Ribka nia, ha'ukaan feton.” Nia naneo na'ak, kalo nia katak na'ak, Ribka nia, niakaan feen, ema nia sia nanis no'o nia, nebee nola Ribka. 8 Isak nein kleu-leur iha rai nia, dala ida na'in nateke nosi kuak anin, naree Isak no Ribka nako'ak malu. 9 Naree nunia, na'in naruka bolu Isak nodi de'an na'ak, “Isak! Oras ne'e, foin ha'u katene malorek ka'ak, feto nia, okaan feen! Tan saa o katak ma'ak okaan feton?”
Isak nataa na'ak, “Nune'e ama! Ha'u kata'uk, kalo ha'u ka'ak nia ha'ukaan feen, nanis ema no'o ha'u.”
10 Na'in nataa na'ak, “Kalo ema iha ne'e toba no okaan feen, nanis ami hatiu hola sala nia! Tan saa o malo nunia mo ami?”
11 Hotu, Na'i Abimelek foo natene maka'as baa renun sia na'ak, “Emi hotu-hotu hanoin di'a-di'ak! See mak naksakar aan kakoen ema ne'e, lale, kakoen niakaan feen, nanis ha'u ktaa ukun mate baa nia.”
Toe malu tan wee knuuk
12 Baa oras nia, Isak furi fini iha rai nia. Nia netan nikar to'os isin dala atus ida, tan MAROMAK natuun matak-malirin baa nia. 13 Niakaan sasoin tu'an bei-beik, to'o soi basuk. 14 Niakaan karau baka, bibi no bibi malae, bea tu'an. Niakaan ata feto no ata mane moos wa'in. To'o ema Filistin sia hirus nia.
15 Uluk, Isak aman Abraham eman sia ke'e nela wee knuuk wa'in ti'an. Mais, oras ne'e ema Filistin sia baa tunin wee knuuk nia sia hotu-hotu.
16 Hotu, Na'i Abimelek katak baa Isak na'ak, “Di'ak liu, o la'o mela rai ne'e ona. Tan okaan beran liu ami ti'an.”
17 Hotu, Isak nakiduk nosi fatin nia, baa nein iha fatin seluk iha rai fehan Gerar. 18 Nia moos suu nikar wee knuuk nia sia mak ema tunin ti'an nia. Hotu, nia nanaran wee knuuk nia sia, tuir aman nanaran nela.
19 Oras Isak eman sia ke'e wee knuuk iha rai fehan Gerar nia, sia ke'e kona wee matan mak nakduar sai wa'in. 20 Mais makbalin Gerar sia toe malu tenik no Isak makbalin sia, tan wee nia. Sia katak na'ak, “Wee ne'e, amikaan!” Tan lia nia, Isak nanaran wee knuuk nia, Esek, tan lia isin na'ak ‘toe malu’.
21 Hotu, Isak eman sia ke'e tenik wee knuuk ida. Mais sia toe malu tenik baa wee knuuk nia. Tan lia nia, Isak nanaran wee knuuk nia, Sitna. Lia isin na'ak ‘hakaat ho malu’.
22 Hotu, Isak la'o nela fatin nia, baa ke'e wee knuuk ida seluk. Oras ne'e, sia la toe malu ona. Tan lia nia, Isak nanaran wee knuuk nia, Rehobot. Lia isin na'ak, ‘fatin luan’. Isak katak na'ak, “Oras ne'e, MAROMAK foo leet baa ita bele hein iha rai luan! Iha ne'e foin ita bele bea tu'an.”
23 Nosi nia, Isak sia la'o tenik, baa nein iha Beer Syeba. 24 To'o nebaa, kalan nia kedan MAROMAK natadu aan baa nia na'ak, “Isak! Ha'u ne'e, okaan ama Abraham niakaan Maromak! Keta mata'uk, tan Ha'u kdaka o! Ha'u atu katuun matak-malirin baa o. Okaan husar-binan nanis bea tu'an. Ha'u kalo nune'e tan Ha'u kameno ti'an baa okaan ama.”
25 Hotu, Isak nada fatuk, nalo taroman iha nia. Nia namulak sera dodan baa MAROMAK. Hotu, nia nein iha fatin nia. Niakaan ema sia moos nahuu ke'e tenik wee knuuk.
Na'i Abimelek no Isak dame malu
26 Oras nia, Na'i Abimelek mai nosi Gerar bele-bele no niakaan maluk Ahusat, no niakaan meo ulun Pikol, atu nasoru Isak. 27 Naree sia mai, Isak nusu na'ak, “Ama na'i! Uluk emi te'ur sai ami ti'an. Oras ne'e, emi mai halo saa?”
28 Sia nataa na'ak, “Nune'e! Oras ne'e, ami hatene MAROMAK mak daka o. Dadi ami hanoin, di'ak liu ita hamate menon. Mamenon nia nune'e: o marai aan ma'ak, 29 emi la halo aat ho ami, ami moos harai aan ha'ak, ami la halo aat ho emi. Ami laran di'ak ho emi. Tan hori hirak nia, emi sai di'a-di'ak hosi amikaan rain. Ami hatene tebes MAROMAK natuun matak-malirin baa emi.”
30 Hotu, Isak nalo dahur. Sia naa bele-bele. 31 Awan seisawan, sia moos namate menon nodi narai aan. Hotu, Isak nabusik sia fila nodi dame.
32 Baa loron nia, Isak eman serwisu sia mai katak lia nosi wee knuuk mak sia no'i ke'e nia na'ak, “Ama! Ami hetan wee ti'an.” 33 Hotu, Isak nanaran wee knuuk nia, Syeba, tan lia isin na'ak ‘harai aan’. Tan baa nia, ema bolu kota nia Beer Syeba, to'o baa oras ne'e.b
Esau nola feen na'in rua nosi ema hunun seluk