Abraham noo tenik feen
25
Nosi ikus, Abraham nola tenik feto ida, naran Ketura. 2 Ketura nahoris oa hira foo baa Abraham. Oa nia sia naran: Simran, Yoksan, Medan, Midian, Isbak no Sua. 3 Yoksan oan sia mak: Seba no Dedan. Dedan husar-binan sia mak: ema Asyur, ema Letus no ema Leum. 4 Midian oan sia mak: Efa, Efer, Henok, Abida no Eldaa. Sia hotu-hotu nia, Ketura husar-binan.5-6 Oras Abraham sei moris, nia fa'e foo kedan fafa'ek baa Hagar no Ketura oan sia ida-idak. Hotu, nia naruka sia nein iha rai Kana'an lorosa'e, dook nosi oan Isak. Mais, nia latan niakaan sasoin hotu-hotu baa Isak.
Abraham mate
7-8 Nosi ikus, Abraham mate baa otas tinan atus ida hitu nulu resin lima. 9-10 Niakaan oan Isak no Ismael nakoi nia iha fatuk kuak Makpela, kre'is baa Mamre. Uluk Abraham sosa nola to'os ida nosi ema Het ida, naran Efron, mak Sohar oan, nalo baa siakaan rate fatik. Uluk sia nakoi Sara baa fatuk kuak iha nia. 11 Abraham mate ti'an, Maromak moos natuun matak-malirin baa Isak, to'o nia moris manek no dame. Baa oras nia, Isak nein kre'is wee knuuk ida, naran Beer Lahai Roi.
Ismael husar-binan
12 Ne'e, lia Ismael. Nia ne'e, Abraham feen ki'ik Hagar oan. Hagar nia, Sara ata feto nosi Mesir. 13-16 Ismael oan mane na'in sanulu resin rua. Siakaan naran tuir malu nosi ulun to'o ikun, mak ne'e: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis no Kedma. Oan nia sia dadi bei uluk nosi ema klubun sanulu resin rua, ida-idak no rain du'uk. Sia nanaran rai nia sia, ida-idak tuir siakaan bei uluk naran.
17 Ismael mate baa otas tinan atus ida tolu nulu resin hitu. 18 Mais, niakaan husar-binan sia funu malu. Sia nein fatin keen kari malu, nahuu nosi rai Hawila to'o rai Syur mak kladik no rai Mesir, liu to'o Asyur.a
Isak oan Esau no Yakob
19 Ne'e, lia Isak. Nia ne'e Abraham feen boot Sara oan. 20 Baa oras Isak nola Ribka baa feen, nia otas tinan haat nulu. Ribka aman, naran Betuel. Naan, naran Laban. Sia nia, ema Aram nosi Padan Aram.b
21 Isak no Ribka nola malu kleur ti'an, mais la netan oan. Tan baa nia, Isak namulak baa MAROMAK. Nia nusu nebee loke Ribka notak. MAROMAK moos rona niakaan namulak, hotu Ribka ko'us. 22 Natene nodi baa, nia ko'us oa karuak. Mais oan rua nia te-tei malu nohuun iha inan notak. To'o Ribka naneo na'ak, “Tan saa oan rua ne'e te-tei malu nune'e?” Hotu, nia nusu lia nia baa MAROMAK.
23 MAROMAK moos nataa na'ak,
“Iha okaan notak nia, noo ema klubun rua. Sia atu funu malu nohuun!
Oan ikun biit liu oan ulun.
Maun atu serwisu bodik alin.”
24 To'o niakaan oras, Ribka nahoris oa mane karuak. 25 Oa kawa'ik ilas mean, isin marahuk. Etuk oin, sia nanaran nia, Esau (tan lia fuan esau isin na'ak ‘marahuk’).
26 Oras alin sai, nia kaer maun ain nuban. Etuk oin, sia nanaran nia, Yakob (tan lia fuan yakob isin na'ak ‘ain nuban’). Baa oras oan rua nia moris, aman Isak otas tinan neen nulu ti'an.
Yakob be'ur nola Esau niakaan beran oa ulun
27 Baa oras oa rua nia boot ti'an, Esau dadi maktama alas. Nia beer nein iha alas laran. Mais Yakub dadi ema mak la duun dale. Nia beer nein iha uma dei. 28 Isak beer basuk naa na'an fuik. Tan lia nia, nia nadomi liu Esau. Mais Ribka nadomi liu Yakob.
29 Dala ida, Yakob da'an fore mean. Oras nia moos, Esau fila mai nosi alas. Nia kole no salaen tebe-tebes. 30 Naree alin Yakob no'i da'an fore, nia moos nusu na'ak, “Ali! Foo okaan fore mean da'an oan ida lai, nebee atu kaa, tan ha'u ksalaen mate ona.” (Tan baa nia, ema moos bolu Esau na'ak, Edom, tan edom ne'e, lian hanesan lia fuan Ibrani ida na'ak ‘mean laak’.)
31 Yakob nataa na'ak, “Di'ak mau. Mais latan okaan beran oa ulun baa ha'u lai, foin ha'u kfoo!”c
32 Esau nataa na'ak, “Basa klerek beran oa ulun nia! Mola baa o dei. Surak modi fore da'an nia mai, tan ha'u ksalaen mate ona.”
33 Mais Yakob nataa tenik na'ak, “Mein lai, mau! Marai aan uluk lai ma'ak, mau latan beran nia baa ha'u, foin ha'u kfoo.” Hotu, Esau moos narai aan tuir Yakob hakaran. 34 Hotu, Yakob foo fore da'an no tubi baa nia. Naa-nemu notu, Esau moos nariik la'o.
Hodi nunia, Esau soe lerek niakaan beran oa ulun.