Buka feen bodik Isak
24
Abraham otas naruk to'o katuas basuk. MAROMAK daka nia di'a-di'ak, to'o nia moris manek no dame. 2-3 Noo Abraham klosan ida, mak nia fiar. Ema nia naliku Abraham sasoin sia. Dala ida, Abraham bolu nola klosan nia, hotu na'ak, “Rona di'a-di'ak! Ha'u kusu o marai aana modi Maromak naran, tan Nia mak nase'i lale'an no raiklaran! O mameno ma'ak, o la mola feto nosi ema Kana'an ne'e, atu malo baa ha'ukaan oan Isak feen. 4 Mais, o musti baa ha'ukaan familin sia iha ha'ukaan uma huun. Buka mola feto ida iha nia bodik ha'ukaan oan.”5 Rona nola nunia, klosan nia nusu Abraham na'ak, “Di'ak, ama! Mais, kalo feto nia la no'uk tuir mai, ha'u kmusti ko ama oan baa nola malu iha nebaa ka, nunabee?”
6 Abraham nataa na'ak, “Manoin di'a-di'ak! Masik nunabee moos, o la bele modi ha'ukaan oan baa! 7 Manoin! MAROMAK makaer beran iha lale'an. Nia mak nodi ha'u sai ti'an kosi ha'ukaan uma huun, nala'o ha'u to'o rai ne'e. Nia moos namate menon no ha'u na'ak, ‘Ha'u klatan to-tomak rai ne'e bodik okaan husar-binan.’ Dadi, lalika mata'uk! Baa ona! Tan Maromak nanis naruka Niakaan makbukar lale'an mai loke dalan bodik o, nebee o bele masoru feto mak atu dadi baa ha'ukaan oa feen. 8 Mais, kalo feto nia la no'uk mai, o makbois mosi harai aan ne'e. Surak o la modi ha'ukaan oan baa.”
9 Hotu, Abraham klosan nia narai aan tuir mohu Abraham hakaran.
10 Hotu, klosan nia boi nola kuda unta matan sanulu. Nia tula naha kabaas oi-oik baa. Hotu, nia baa Nahor niakaan kota iha Mesopotamia.b
11 To'o kota nia, nia kesi kuda unta sia nanawa kole iha kota di'in, kre'is baa wee knuuk ida. Oras nia, loro malirin ti'an. Baa oras nia, oa feto sia mai nakonu wee iha wee knuuk nia. 12 Naree nunia, klosan nia moos namulak na'ak, “MAROMAK, mak ha'ukaan ama boot Abraham niakaan Maromak! Tulun loke dalan, nebee ha'u ketan sotir di'ak. Manoin Ama mamenon bodik ha'ukaan ama boot. Nebee ha'u kbele ketan Isak sasudin. 13 Na'i Maromak! Ha'u kariik iha wee knuuk di'in ne'e! Feto nosi kota ne'e, mai nakonu wee iha ne'e. 14 Dadi, ha'u kakro'an nune'e: kalo ha'u kdale ko feto ida ka'ak, ‘Bete! Tulun matuun okaan lolo, foo ha'u kemu lai.’ Kalo feto nia nataa na'ak, ‘Ama memu ona! Ha'u moos karoo okaan kuda unta sia,’ lia nia dadi tadak na'ak, feto nia mak Na'i Maromak boi dadi baa Isak feen! Tuir tadak nunia, ha'u kbele katene ka'ak, Na'i Maromak natudu dadi'ak bodik ha'ukaan ulun Abraham.”
Abraham klosan nasoru Ribka
15-16 Oras Abraham klosan nia sei namulak, feto ida moos mai. Feto nia naran Ribka. Nia, Abraham alin Nahor no feen Milka, siakaan bein oan. Ribka aman naran Betuel. Ribka nia, sei feto lawarik mak kabaas tebe-tebes. Nia tuun baa wee knuuk nia, kuru nakonu lolo, hotu sa'e nikar.
17 Oras Ribka sa'e to'o leten, Abraham klosan moos nalai baa, hotu nusu na'ak, “Bete. Tulun foo ha'u kemu lai!”
18 Rona nola nunia, Ribka nataa na'ak, “Memu baa, ama!” Nia moos natuun lai-lais lolo, foo wee baa klosan nia. 19 Nemu notu ti'an, Ribka dale na'ak, “Mabusik ha'u mak kuru wee bodik kuda unta sia, nebee sia nemu to'o bosu.” 20 Hotu, Ribka fui wee resin baa kuda unta hemun fatik. Hotu, nia kuru wee sa'e-tuun nodi naroo kuda unta nia sia hotu-hotu to'o bosu. 21 Abraham klosan nariik no-nook mana feto nia serwisu. Nia nanoin baa-mai na'ak, “Feto ne'e mak Na'i Maromak boi ka?”
22 Kuda unta sia nemu to'o bosu ti'an, klosan nia nola fafutar mean nosi naha mak nia nodi. Nia foo karabu inun mean no riti mean rua, tau baa feto nia liman karuk-kwana.c 23 Hotu, nia nusu na'ak, “Bete aman, naran see? Ha'u kbele toba heik iha bete aman uman ka?”
24 Feto nia moos nataa na'ak, “Ha'ukaan ama, naran Betuel. Ha'ukaan bei mane, naran Nahor. Bei feto, naran Milka. 25 Iha amikaan uman, noo toba fatik bodik ama sia. Hae moos wa'in bodik kuda unta sia.”
26 Rona nola nunia, klosan nia lo'u-sudur baa MAROMAK 27 nodi nakro'an na'ak, “Tonu-kaboot Na'i Maromak! Nia loke dalan baa ha'u, to'o ha'u kbele kasoru ha'ukaan ulun Abraham familin sia. Hodi nunia, Maromak nala'ok ti'an Niakaan mamenon bodik ha'ukaan ulun Abraham.”
28 Hotu, feto nia nalai fila lai-lais. To'o uma, nia dale baa ema uma isin, saa mak dadi ohin nia. 29-30 Ribka naan, naran Laban. Oras Laban naree naha mean sia, no rona Ribka dalen, nia nalai sai lai-lais baa nasoru klosan mak sei nariik no kuda unta sia iha wee knuuk nia. 31 Hotu, Laban dale baa klosan nia na'ak, “Ama! MAROMAK nala'o ama di'a-di'ak to'o ne'e ti'an! Keta mariik iha luan dei! Mai tama ona. Ami hadi'a ke'an ti'an. Hahaak bodik kuda unta sia moos, wa'in basuk.”
Abraham klosan tama nusu Ribka
32 Rona nola nunia, klosan nia tuir Laban tama baa Betuel uman. Laban sia moos natuun tu'an naha nosi kuda unta sia. Hotu, sia tau hae. Sia moos nodi wee fasi ain foo baa klosan no niakaan ema sia. 33 Oras sia nadi'a haan ti'an, klosan nia katak na'ak, “Ita atu haa ona, mais ha'u kusu leet ida atu katak sain lia ida ne'e lai.”
Laban nataa na'ak, “Ama katak baa dei.”
34 Klosan nia moos dale na'ak, “Ha'u ne'e, emikaan bei Abraham klosan. 35 MAROMAK natuun ti'an matak-malirin wa'in baa ha'ukaan ulun nia, to'o soi liu resik. Maromak natuun baa nia mean-mutin, ata feto, ata mane, no bibi no karau wa'in basuk, nu'u karau baka, kuda unta, kuda keledai, bibi no bibi malae. 36 Baa oras ha'ukaan ulun sia feen-la'en otas ti'an, ina Sara nahoris oa mane ida, foo baa ha'ukaan ulun Abraham. Oan nia mak atu simu aman sasoin hotu-hotu. 37 Foin da-dauk ne'e, ha'ukaan ulun Abraham naruka ha'u karai aan ka'ak, ‘Ha'u la kola feto Kana'an bodik niakaan oan Isak. 38 Mais, ha'u kmusti kola feto nosi niakaan familin du'uk, dadi baa niakaan oan feen.’
39 Mais, ha'u kusu baa ha'ukaan ulun ka'ak, ‘Kalo feto nia la no'uk tuir ha'u, nunabee?’
40 Hotu, nia nataa na'ak, ‘Ha'u ktuir MAROMAK hakaran nohuun. Tan baa nia, nanis Nia naruka makbukar lale'an mai buka dalan bodik o, nebee o bele metan feto ida nosi ha'ukaan familin du'uk, atu dadi baa ha'ukaan oan feen. 41 Mais, kalo ha'ukaan familin sia dudu, lale, sia la no'uk nabusik feto nia mai ne'e, o makbois mosi harai aan nia.’
42 Dadi, ohin ha'u to'o wee knuuk nia, ha'u kamulak iha neon laran ka'ak, ‘MAROMAK, mak ha'ukaan ulun Abraham niakaan Maromak. Tulun loke dalan, nebee ha'ukaan dalan ne'e netan sotir di'ak. Nebee kasoru Isak sasudin. 43 Na'i Maromak, ha'u kariik iha wee knuuk di'in ne'e. Feto sia nosi kota ne'e mai nakonu wee iha ne'e. Dadi, ha'u kusu nune'e: kalo ha'u kdale ko feto ida ka'ak, “Bete! Tulun matuun lolo, foo ha'u kemu lai,” 44 hotu feto nia nataa na'ak, “Ama memu baa! Ha'u moos atu karoo ama niakaan kuda unta sia,” lia nia dadi tadak na'ak feto nia mak Na'i Maromak boi ti'an, dadi ha'ukaan ulun oan Isak feen!’
45 Ha'u ksei kamulak nunia, bete Ribka mai nodi lolo atu nakonu wee iha wee knuuk nia. Oras nia foin sa'e baa leten, ha'u kusu kedan ka'ak, ‘Bete! Foo ha'u kemu lai.’ 46 Hotu, nia moos natuun lai-lais lolo, nodi na'ak, ‘Ama memu baa! Ha'u moos atu karoo ama niakaan kuda unta sia.’ Rona nunia, ha'u moos kemu. Ha'ukaan kuda unta sia moos nemu.
47 Hotu, ha'u kusu ka'ak, ‘Bete aman, naran see?’
Nia moos nataa na'ak, ‘Ha'ukaan ama, naran Betuel. Ha'ukaan bei mane, naran Nahor. Bei feto, naran Milka.’ Rona Ribka dalen nia, ha'u moos tau karabu baa inun, no riti mean rua baa liman karuk-kwana.
48 Hotu, ha'u klo'u-sudur baa Maromak ka'ak, ‘Tonu-kaboot Na'i Maromak! Tan Na'i Maromak loke dalan baa ha'u ti'an, to'o ha'u kbele kasoru ha'ukaan ulun Abraham familin sia iha ne'e. Ha'u moos bele kasoru ha'ukaan ulun oan Isak sasudin.’ 49 Dadi, oras ne'e, kalo ama sia nadomi ha'ukaan ulun Abraham, katak malorek baa ha'u. Kalo lale moos, katak malorek. Nebee ha'u kbele katene, ha'u kmusti kalo saa.”
Ribka familin sia simu Isak
50 Rona nola nunia, Laban no Betuel dale na'ak, “Kalo MAROMAK babilan nunia ti'an, ita atu dale saa tenik? 51 Bete Ribka iha ne'e. Mola nia modi baa. Nebee dadi bei Abraham oa feen, tuir MAROMAK babilan.”
52 Rona ti'an lia nunia, Abraham klosan nia sudur to'o rai, sera dodan baa MAROMAK. 53 Hotu, nia foti sai naha mean mutin no tais kabaas sia, foo baa Ribka. Nia moos foo sasolok folin todan sia baa Ribka inan no Ribka naan. 54 Hotu, sia hotu-hotu tuur naa dahur. Abraham klosan no niakaan ema sia moos toba iha nia. Awan seisawan, sia nadeer. Hotu, klosan nia katak baa ema uma na'in sia na'ak, “Kalo bele, oras ne'e ami fila baa amikaan ulun ona.”
55 Mais Ribka inan no Ribka naan katak na'ak, “Hakara fila lai-lais baa saa? Habusik Ribka nein no ami loron sanulu sia lai! Foin hodi nia baa.”
56 Mais klosan nia nataa na'ak, “Adeei! Keta saseni ha'u! MAROMAK tulun ha'u ti'an, to'o kasoru ti'an ha'ukaan ulun oan feen. Dadi, ina sia habusik ami ona, nebee ami fila baa hasara lia baa ha'ukaan ulun lai.”
57 Sia nataa na'ak, “Nune'e! Ita husu kokon baa Ribka du'uk. Nia nakara, nunabee?”
58 Hotu, sia bolu Ribka nodi nusu na'ak, “Ribka! Oras ne'e, loos o dei. O makara tuir kedan mo ema ne'e ka, nunabee?”
Hotu, Ribka nataa na'ak, “Kakara.”
Ribka no Isak nola malu
59-60 Hotu, sia nabusik Ribka tuir Abraham klosan sia. Ata feto mak naliku Ribka hori sei ki'ik no ata feto seluk sia moos atu tuir Ribka. Ribka familin sia naloon foo matak-malirin baa nia na'ak, “Ribka! Ami haloon, nebee Na'i Maromak nalo o mahoris oan wa'in lear, to'o okaan husar-binan dadi maliun-maliun. Ami moos haloon, nebee okaan husar-binan sia natoba nola funu!”
61 Hotu, Ribka no ata feto sia nahulin naha. Nahulin hotu, sia sa'e kuda unta tuir kedan Abraham klosan sia.
62 Oras nia, Isak nein iha rai Negeb. Nia foin fila nosi wee knuuk iha Beer Lahai Roi. 63 Loraik ida, nia sai nosi batane, la'o nola anin. Nia foti oin, titu naree kuda unta sia la'o lolok mai.
64 Baa oras Ribka naree nola Isak, nia tuun lai-lais nosi kuda unta. 65 Nia nusu baa Abraham klosan nia na'ak, “Ama! Ema mak la'o nebaa nia, see ida?”
Klosan nia nataa na'ak, “Nia, mak ha'ukaan ulun oan.” Rona nola nunia, Ribka foti nola tais oan, taka sara oin.