Abraham no na'i Abimelek
20
Hotu, Abraham lori nosi Mamre baa rai Negeb iha rai Kana'an lorokbelan. Nia nein iha fatin ida iha leo Kades no leo Syur leet. Hotu, nia lori tenik baa leo Gerar atu nein heik iha nia. 2 To'o nebaa, nia katak baa ema na'ak, Sara nia, niakaan alin. Oras nia, na'i rai Gerar naran Abimelek. Rola nola lia nia, Abimelek naruka niakaan ema sia baa saka nola Sara, nodi baa na'in tofatik. 3 Mais kalan ida, Maromak natadu aan baa Abimelek tuir me'i na'ak, “O makara buka mate mak ne'e! Tan o mola ema seluk feen.”4-5 Mais na'in simu na'ak, “Na'i Maromak! Ha'u ksei la rose aan baa feto nia. Ha'u la sala. Abraham mak na'ak du'uk, feto nia niakaan alin! Feto nia du'uk moos katak nunia! Tan lia nia, ha'u karuka ema baa nola nia, kodi neon moos! Dadi Na'i Maromak keta masalak ha'u!”
6 Hotu, Maromak nataa na'ak, “Tebes. Ha'u katene o neon moos! Tan baa nia, Ha'u ksaseni o, nebee keta rose aan baa feto nia! Hodi nunia, o la malo sala. 7 Oras ne'e, o musti solok fila feto nia baa la'en! La'en nia, Ha'ukaan mako'an. Musu nia namulak bodik o, nebee o keta mate. Mais, kalo o la solok fila, manoin di'a-di'ak! Tan o mo okaan ema sia hotu-hotu nanis mate!”
8 Baa seisawan, Abimelek bolu nola niakaan klosan sia, hotu nasara me'i nia. Rona me'i nia, sia hotu-hotu nata'uk. 9 Hotu, Abimelek bolu nola Abraham nodi nusu na'ak, “Ha'u kalo sala saa baa o, to'o o malo dinu kona baa ha'u ko ha'ukaan renun nune'e? La bele malo nune'e. 10 O maneo saa, to'o malo nune'e?”
11 Abraham nataa na'ak, “Ama Na'i! Ha'u ka'ak falik emi la hatene Maromak! Tan baa nia, kata'uk ema atu no'o ha'u, hotu nola ha'ukaan feen. 12 Ha'u kdale nia tebes, tan nia ha'ukaan alin tebes. Ami, aman ida, inan rua! Tan baa nia, ami hola malu dadi baa feen-la'en! 13 Dadi, baa oras Maromak naruka ami rua baa ema rain, ha'u katak baa ha'ukaan feen ka'ak, ‘Kalo ita rua baa nabee dei, hotu ema nusu itakaan hatalin malu ne'e, kalo o madomi ha'u, o mataa ma'ak ita rua feton-naan’.”
14-16 Rona nola nune'e, na'i Abimelek foo fila Sara nodi katak baa na'ak, “Oras ne'e, ha'u kselu baa okaan naan osan murak tomak rihun ida, dadi tadak na'ak, ha'u la kalo sala saa ida ko o! Nebee, ema hotu-hotu natene!”
Hotu, na'in dale baa Abraham na'ak, “Abraham! Ha'ukaan rai ne'e, luan bodik o. O makara mein iha nabee dei moos, bele.” Hotu, na'in latan baa Abraham, karau baka, bibi no bibi malae. Na'in moos latan ata feto, ata mane.
17-18 Uluk, MAROMAK taka notak feto hotu-hotu mak nein iha Abimelek rain, tan Abimelek nadau nola Abraham feen. Mais, oras Abimelek foo fila Sara, Abraham moos namulak, nebee Maromak loke nikar feto hotu-hotu notak. Hamulak ti'an, feto mak iha rai nia nahuu nahoris tenik.