Ema Sodom siakaan a'aat
19
Maromak sei dale no Abraham, makbukar lale'an na'in rua nia liu baa kota Sodom. To'o nebaa, loro atu monu ona. Baa oras nia, Lot no'i tuur iha kota odamatan nanokar.a Naree ema rua nia, Lot baa nasoru sia. Hotu, nia nakni'a nodi lo'u-sudur baa sia. 2 Nia moos dale na'ak, “Ama sia! Tuli heik iha ha'ukaan uman lai! Fasi ain lai, hotu toba iha ha'ukaan uma. Awan seisawan, foin ama sia la'o liu.”Mais sia nataa na'ak, “Lalika! Ami toba iha kota rai molik dei.”
3 Mais Lot namaus sia bei-beik, to'o sia moos simu. Hotu Lot sia nalo tubi, nadi'a haan wa'in, hotu sia naa bele-bele. 4 Bainaka nia sia sei la toba dauk, ema mane Sodom ki'ik-boot hotu-hotu, mai lisuk nola Lot uman. 5 Sia nahii naka'as baa Lot na'ak, “Hoi Lot! Mane rua ohin nia iha nabee? Masai sia mai, nebee ami sa'e heet sia!”
6 Rona nunia, Lot sai baa, taka kedan odamatan. 7 Nia dale baa sia na'ak, “Maun-alin sia! Emi keta halo aat nunia baa ha'ukaan bainaka. 8 Emi rona! Ha'u koo oa feto na'in rua. Sia sei lawarik. So'in baa, ha'u klatan sia rua baa emi. Emi hakara halo saa baa sia, loos emi dei. Mais emi keta halo sa-saa ho ha'ukaan bainaka ne'e sia, tan tuir amikaan adat, ha'u kmusti kaliku sia di'a-di'ak.”
9 Mais ema Sodom sia nahii na'ak, “O keta kahur! O ema maktabar dei iha ne'e! O ema luan. O la moo beran babilan ami. Di'ak liu, o sees sai mosi ne'e. Kalo lale, ami halo o todan liu tan ema rua nia!” Sia moos dudu sees Lot, hotu sia baa basak bele-bele odamatan atu nadodok uma nia odamatan.
10 Mais bainaka rua nia lolo liman, dada natama Lot baa uma laran, hotu kusa kedan odamatan. 11 Hotu, sia nadelek ema Sodom nia sia matan. Tan baa nia, ema Sodom sia na'in lelemas buka odamatan, mais sia la netan.
Lot sia nalai nela Sodom
12-13 Hotu, bainaka rua nia dale baa Lot na'ak, “Lot! MAROMAK natene kota ne'e niakaan a'aat ti'an. Nia solok ami mai nebee hadodok kota ne'e. O sei moo famili seluk iha ne'e ka lale? Kalo o moo oan mane, lale oan feto, lale oa la'en, lale se-see dei, di'ak liu mola sia sai mosi kota ne'e ona!”
14 Rona nola nunia, Lot baa nasoru niakaan oan feto sasudin na'in rua. Nia katak na'ak, “Rona! Emi musti sai lai-lais hosi kota ne'e ona, tan MAROMAK atu nadodok kota ne'e!” Mais sia na'ak falik Lot dale nakdiuk dei.
15 Awan seisawan, makbukar na'in rua nia moos seten Lot sai lai-lais ona. Sia na'ak, “Lot! Madeer! Modi okaan feen, no oan feto rua nia, halai ona! Halai hela kota ne'e. Keta to'o emi mate butan, dodok ho kota ne'e.”
16 Tuir loos, MAROMAK nakara sori Lot. Mais nia sei naleur aan. Tan lia nia, bainaka rua nia kaer nola siakaan liman, dada sai Lot no familin sia nosi kota nia. 17 Hotu, bainaka ida naruka na'ak, “Halai lai-lais, baa sori aan! Keta mana baa kotuk! Keta hanawa iha rai fehan! Halai sa'e liu baa foho nebaa, nebee keta mate!”
18 Mais Lot nataa na'ak, “Adeei, ama! Keta nunia! 19 Ama tulun no sori ami ti'an! Mais foho nia dook resik! Keta-keta, ami sei la to'o da'uk, dinu toma ami ti'an iha dalan klaran! 20 Ama maree lai! Noo leo ki'ik ida la dook nosi ne'e! Masik leo nia la noo folin, kalo ama makara, so'in baa, ami baa sori aan iha nebaa dei.”
21 Hotu, bainaka nia na'ak, “Bele! Baa ona! Ha'u la kadodok leo nia. 22 Lai-lais baa nebaa ona! Tan ha'u la kbele kalo sa-saa ida, kalo emi sei la to'o dauk.” Nahuu baa oras nia, ema nanaran leo nia na'ak, ‘Soar’. Lia isin na'ak, ‘ki'ik’.
Kota Sodom no kota Gomora dodok welon
23 Loro atu sa'e, Lot sia to'o Soar. 24 Teki-tekis, MAROMAK fakar ha'i no fatuk laak lobot nosi lale'an, tuun baa Sodom no Gomora. 25 MAROMAK nadodok mohu kota no leo hotu-hotu iha rai nia. Nadodok ema no hotu-hotu mak moris iha nia.
26 Baa oras sia nalai, Lot feen mana nikar kotuk. Sarebak, nia dadi kedan ai riin masin ida.
27 Awan seisawan, Abraham baa nikar fatik hori sehik nia nodi namaus MAROMAK. 28 Nia mana tuun baa Sodom no Gomora, no rai fehan nia tomak. Iha fatin hotu-hotu, nia naree ha'i dubun sa'e baa lale'an. Ha'i naa mohu sa-saa hotu-hotu.
29 Oras Maromak nadodok kota nia sia, Nia nanoin Niakaan mamenon baa Abraham. Tan lia nia, Nia nasai Lot nosi fatin mak kona kastikar nia.
Lot no oan feto sia
30 Hotu Lot no oan feto na'in rua nia lori baa foho. Sia nein iha fatuk kuak ida, tan sia nata'uk nein nafati iha leo Soar.
31 Dala ida, oan feto biin dale baa alin na'ak, “Iha ne'e la noo mane ida atu nola ita. Itakaan ama hetak katuas. La kleur, ama la bele netan oan tenik ona. 32 Di'ak liu, ita haroo halanu ama, nebee bele ita toba ho ama, atu hatutan niakaan husar-binan.”
33 Kalan nia moos, sia naroo nalanu aman nodi anggor ween. Hotu, oan feto biin toba no aman. Mais katuas lanu todan basuk, to'o la natene nia nalo saa ti'an no oan feto nia.
34 Baa awan, biin katak baa alin na'ak, “Ali! Ha'u ktoba ko ama ti'an. Ohin kalan ne'e, ita haroo halanu tenik ama, nebee o moos toba mo nia! Hodi nunia, ita rua bele hetan oan, nebee atu hatutan ama husar-binan.”
35 Kalan nia moos, sia naroo nalanu aman tenik. Hotu, oan ikun tama toba no aman. Mais katuas lanu todan basuk, to'o la natene nia nalo saa ti'an no oan feto.
36 Hodi hahalok nunia, sia rua ko'us nosi aman susun du'uk. 37 Nosi ikus, oan feto biin nahoris nola oan mane ida. Nia nanaran oa nia na'ak Moab (tan moab ne'e, lian hanesan lia fuan Ibrani na'ak ‘mai nosi ama’). Oa nia, mak dadi baa ema Moab oras ne'e, siakaan bei uluk. 38 Hotu, oan feto alin moos nahoris nola oan mane ida. Nia nanaran oa nia na'ak Ben Ami (tan ben-ami ne'e, lian hanesan lia fuan Ibrani na'ak ‘oa nosi ha'ukaan eman sia’). Oa nia, mak dadi baa ema Amon oras ne'e, siakaan bei uluk.b