Ema na'in tolu mai nasoru Abraham
18
Oras Abraham nein kre'is baa ai huun boot sia iha Mamre, MAROMAK natadu aan baa nia. Lia nia nune'e: loron nia, manas basuk. Tan baa nia, Abraham tuur nola anin iha batane oin. 2 Nia foti oin, naree ema na'in tolu nariik iha nebaa. Hotu, nia nalai baa nasoru sia. Nia moos nakni'a 3 nodi dale na'ak, “Ama sia! Kalo bele, tuli sala-sala iha ha'ukaan batane lai. Masik hemu loos wee tanan dei moos, di'ak. 4 Emi bele hanawa kole iha ai leon. Oan sia atu nodi wee mai fasi ama sia ain. 5 Ha'u moos kadi'a haan bodik ama sia nebee hetan biit oda, foin ama sia la'o liu. Ha'u neon di'ak, kalo bele kaliku ama sia.”Rona nola nunia, sia nataa na'ak, “Di'ak. Ami tuli.”
6 Hotu, Abraham nalai baa batane, katak baa Sara na'ak, “Lai-lais! Mola tubi rahun kabaas kakaluk ida, malo baa tubi.”a
7 Nia moos nalai baa karau baka lalu'an, boi nola karau baka oan bokur ida. Naruka ata sia ko'a karau baka nia. 8 Hotu, nia nola susu, susu kedu no na'an tasan nia, foo baa bainaka sia. Oras sia naa, Abraham nariik nodi naliku sia iha ai leon.
9 Nunia hotu, sia nusu baa Abraham na'ak, “O feen Sara iha nabee?”
Nia nataa na'ak, “Iha batane laran.”
10 Hotu, bainaka ida na'ak, “Takseer tinan oin, ha'u kmai kikar. Baa oras nia, o feen Sara nahoris oan mane ida ti'an.”
Oras sia dale nunia, Sara nanono nosi batane laran. 11-12 Rona sia dale nunia, Sara nanasa iha neon, tan Abraham no Sara otas basuk ti'an. Sara moos nanawa nasoru fulan ti'an. Nia naneo na'ak, “Adeei! Ha'u ne'e, ferik maran ti'an! Ha'ukaan la'en moos katuas basuk ti'an! Nunabee ami sei beer malu nu'u ema uma kain foun mak atu buka oan?”
13 Hotu, MAROMAK nusu baa Abraham na'ak, “Sara nanasa baa saa? Arumak nia naneo ha'u kdale ne'e la bele dadi, tan nia ferik ti'an? 14 Ha'u ne'e, MAROMAK! La noo saa mak Ha'u la kbele kalo! Manoin di'a-di'ak! Tinan oin Ha'u kmai kikar ne'e, Sara nahoris nola oa mane ida ti'an.”
15 Rona nunia, Sara nata'uk. Hotu nia neli na'ak, “Ha'u la kanasa!”
Mais Maromak nataa na'ak, “Tebes! Ohin o manasa.”
Abraham namaus Maromak nebee keta kastikar ema Sodom sia
16 Hotu, bainaka na'in tolu nia moos tami, atu baa kota Sodom. Abraham no nela sia baa, to'o dalan klaran. Nosi fatin nia, sia bele naree kota Sodom. 17 Hotu, MAROMAK naneo na'ak, “Di'ak liu, Ha'u katak baa Abraham lia saa mak atu kalo baa kota Sodom. 18 Tan Abraham husar-binan atu bea tu'an, dadi baa ema klubun boot. Nia moos dadi matak-malirin bodik ema klubun hotu-hotu iha raiklaran. 19 Ha'u kboi nia ti'an, nebee nanorin niakaan oan, no ema seluk sia atu tuir bei-beik Ha'ukaan dalan nodi moris loos no moon. Kalo sia moris nunia, Ha'u moos kala'o Ha'ukaan mamenon ko Abraham.”
20 Naneo notu nunia, MAROMAK katak baa Abraham na'ak, “Nune'e! Ha'u krona ti'an ema wa'in nakro'an, tan ema Sodom no Gomora siakaan a'aat! 21 Tan lia nia, Ha'u ktuun du'uk atu katene lia mak Ha'u krona nia, tebes ka lale.”
22 MAROMAK sei dale no Abraham, bainaka na'in rua la'o liu baa kota Sodom. 23 Hotu, Abraham nare'is aan baa Maromak nodi namaus na'ak, “Nunabee? Ama nakara nadodok ema di'ak no aat bele-bele ka? 24 Kalo noo ema di'ak na'in lima nulu iha kota nia, Ama sei nadodok luku kota nia ka lale? 25 Keta hadodok. Keta to'o ema di'ak sia moos mate, tan Ama nakara nadodok ema aat. Ama mak Makotu Lia bodik lale'an no raiklaran. Ama du'uk natene, hahalok nunia la moon.”
26 MAROMAK nataa na'ak, “Kalo Ha'u ketan ema di'ak na'in lima nulu iha kota Sodom, Ha'u la kastikar kota nia.”
27 Abraham moos dale tenik na'ak, “Ama, atu kusu leet oda, kalo ha'u kbele dale tenik. Ha'u ne'e, ema raiklaran la katene sa-saa. 28 Kalo ema di'ak la to'o na'in lima nulu, mais Ama netan loos na'in haat nulu resin lima dei, nunabee? Kalo la noo ema na'in lima dei, Ama sei nadodok kota nia ka?”
Maromak nataa na'ak, “Kalo Ha'u ketan ema di'ak, na'in haat nulu resin lima iha nia, Ha'u la kadodok kota nia.”
29 Hotu, Abraham namaus tenik na'ak, “Kalo Ama netan loos ema di'ak na'in haat nulu dei, nunabee?”
Maromak nataa na'ak, “Kalo Ha'u ketan ema na'in haat nulu, Ha'u la kastikar kota nia.”
30 Hotu, Abraham namaus tenik na'ak, “Ama keta kanarak. Kalo ema di'ak na'in tolu nulu dei, nunabee?”
Maromak nataa na'ak, “Kalo Ha'u ketan ema na'in tolu nulu, Ha'u la kastikar kota nia.”
31 Abraham namaus ta'e natuun tenik na'ak, “Ama keta kanarak kalo ha'u kusu oda tenik. Kalo Ama netan loos ema na'in rua nulu dei, nunabee?”
Maromak moos nataa tenik na'ak, “Kalo Ha'u ketan ema na'in rua nulu, Ha'u la kadodok kota nia!”
32 Hotu, Abraham moos taka lia na'ak, “Ama! Ha'u kdale dala ida tenik, mais ama keta kanarak ha'u! Kalo Ama netan loos ema di'ak na'in sanulu dei, nunabee?”
Maromak moos nataa na'ak, “Kalo Ha'u ketan ema di'ak na'in sanulu iha nia, Ha'u la kadodok kota nia.”
33 Dale hotu baa malu nunia, MAROMAK la'o liu. Abraham moos fila.