3 Rona nola nunia, Abram nakni'a lo'u-sudur to'o rai. Hotu, Maromak katak liu na'ak, 4-5 “Ha'u kamate menon ko o nune'e: o atu dadi bei uluk bodik ema klubun wa'in! Tan lia nia, nahuu oras ne'e, okaan naran lahoos Abram tenik, mais Abraham (tan abraham lia isin na'ak ‘bei uluk mak nariik ema klubun wa'in’). 6 Ha'u atu kalo okaan husar-binan bea tebe-tebes! Ha'u moos atu kariik ema klubun wa'in nosi sia, kodi foti na'in lear nosi sia!

7 Ha'u kaer metis Ha'ukaan mamenon ko o mo okaan husar-binan to'o nima-nimak! Mamenon ne'e la nakotu, nebee Ha'u kdadi Maromak bodik o mo okaan husar-binan. 8 Ha'u atu klatan to-tomak rai Kana'an ne'e baa o mo okaan husar-binan! Oras ne'e, o mein heik iha ne'e dei! Mais okaan husar-binan atu netan rai Kana'an ne'e to'o nima-nimak! Ha'u atu kdadi baa siakaan Maromak! 9-10 Mais o mo okaan husar-binan musti mala'o mamenon ne'e hodi tadak hamane aan! 11-13 Nahuu baa oras ne'e, ema mane hotu-hotu musti namane aan, nahuu nosi otas foin loron walu. Okaan familin, okaan ema serwisu, no okaan ata mak o sosa ti'an mosi rai seluk, hotu-hotu musti namane aan! Hamane aan nia dadi tadak hamate menon bodik ita rua. Tadak nia atu nakri'it aan baa emi ida-idak! 14 Mane nabee mak la namane aan, nia la tama baa Ha'ukaan mamenon ne'e. Nia moos la dadi baa Ha'ukaan ema!”

15 Hotu, Maromak katak liu na'ak, “Nahuu oras ne'e, keta bolu tenik o feen ma'ak Sarai. O musti bolu nia ma'ak Sara! 16 Ha'u atu katuun matak-malirin wa'in baa Sara, nebee nia nahoris oan mane ida foo baa o! Tebes! Sara atu dadi bei uluk bodik ema klubun wa'in. Ha'u moos atu foti na'in lear nosi niakaan husar-binan!”

17 Rona nola nunia, Abraham nakni'a lo'u-sudur to'o rai. Mais, nia nanasa iha neon na'ak, “Mane katuas otas tinan atus ida nu'u ha'u ne'e, oin nunabee sei bele ketan oan tenik? Sara moos ferik maran ti'an, otas tinan siwi nulu ona. Oin nunabee, nia sei bele nahoris?” 18 Hotu, Abraham nasara baa Maromak na'ak, “MAROMAK! Masik Ismael dei mak netan ha'ukaan sasoin moos, la saa ida!”

19 Mais Maromak nataa na'ak, “Lale, Abraham! Okaan feen Sara atu nahoris oan mane ida! O musti tau naran baa nia, Isak! Ha'ukaan mamenon atu tuun baa nia no niakaan husar-binan to'o nima-nimak! 20 Mais Ha'u moos rona ti'an, saa mak o musu bodik Ismael! Tan nia, Ha'u moos katuun matak-malirin baa nia, kodi kalo bea niakaan husar-binan to'o dadi baa ema klubun boot. Ema fukun na'in sanulu resin rua atu mosu nosi husar-binan nia! 21 Masik nunia moos, Ha'ukaan mamenon ne'e nakri'it baa okaan oan Isak dei! Tinan oin, kona baa oras nune'e, Sara nahoris oan nia!” 22 Katak notu ti'an, Maromak la'o nela Abraham.

23-27 Baa loron nia moos, Abraham nala'o kedan tuir Maromak ukun. Nia na'in du'uk namane aan. Hotu, nia nalo hamane aan baa Ismael, no ema mane hotu-hotu iha niakaan uman laran. Nia moos nalo hamane aan baa niakaan ata mane sia hotu-hotu. Baa oras nia, Abraham otas tinan siwi nulu resin siwi ti'an. Ismael, otas tinan sanulu resin tolu.