Hagar no oan Ismael
16
1-3 Nunia ti'an, Abram nein iha Kana'an tinan sanulu. Mais feen Sarai la netan oan dauk. Baa oras nia, Sarai noo ata feto ida nosi Mesir, naran Hagar.Dala ida, Sarai dale no Abram na'ak, “Ama! MAROMAK sena-natoos ha'ukaan oa fatin ti'an. Di'ak liu, ama toba mo ha'ukaan atan Hagar, nebee nia nahoris oan foo baa ha'u.”
Rona nola nunia, Abram simu feen dalen nia. Sarai latan Hagar, dadi baa Abram feen ki'ik. 4 Abram toba no Hagar, to'o ko'us. Mais, baa oras Hagar natene nia ko'us ti'an, nia loko aan nodi naraik Sarai.
5 Natene nola nunia, Sarai dale baa Abram na'ak, “Ha'u mak klatan ata nia, dadi baa okaan feen ki'ik. Mais baa oras nia natene nia ko'us ti'an, nia naraik ha'u! Ne'e, okaan salan hotu-hotu! Habusik MAROMAK mak nakotu itakaan lia. Foin o matene!”
6 Mais Abram nataa na'ak, “Nune'e! O ne'e, feen kawa'ik. Nia, feen ki'ik dei! O mak moo beran ukun nia. O makara malo saa baa nia, loos o!” Hotu, Sarai natudu hahalok maka'as no Hagar, to'o Hagar ni'it aan nalai.
7 Nia nalai to'o raihenek molik ida. MAROMAK Niakaan makbukar lale'an ida mai nasoru nia kre'is wee matan ida iha dalan baa Sur. 8 Makbukar nia dale baa Hagar na'ak, “Hei! O ne'e, Hagar mak Sarai atan. Tan saa o iha ne'e? O mosi nabee, atu baa nabee?”
Hagar nataa na'ak, “Ha'u kalai kela ha'ukaan ina boot ti'an.”
9 Hotu, makbukar nia namaus nia na'ak, “Nune'e! Di'ak liu, o fila mikar baa okaan ina boot! Nia nalo saa baa o moos, simu dei. 10 Keta mata'uk, tan Ha'u atu kalo okaan husar-binan bea tebe-tebes, to'o ema la bele sura nola. 11 Oras ne'e, o mo'i ko'us. La kleur, o mahoris oa mane ida. O musti manaran nia, Ismael tan MAROMAK rona okaan tanis ti'an. (Isma-el ne'e, lian hanesan lia fuan Ibrani na'ak ‘Maromak rona’.) 12 Mais hanoin! Oan nia boot ti'an, nia atu moris nadook aan nosi maun-alin sia! Nia la natene rona ukun, hanesan kuda mada'ek. Nia sakar se-see dei. Ema hotu-hotu moos atu sakar fila nia.”
13 Rona nola nunia, Hagar naneo na'ak, “Ha'u karee MAROMAK ti'an. Nia mak titu no daka ha'u.” Nahuu oras nia, Hagar bolu Maromak nodi naran “Maromak Mak Naliku Ha'u.” 14 Tan lia nia, ema nanaran wee matan nia na'ak, Beer Lahai Roi. Lia isin na'ak, “wee matan nosi Nia mak moris, mak naliku ha'u.” Wee matan nia, to'o oras ne'e sei iha leo Kades no leo Beret leet.