Maromak namate menon no Abram
15
Hotu, MAROMAK natadu aan baa Abram na'ak, “Hei Abram! Lalika mata'uk! Ha'u mak sara kola o nosi funu! Ha'u moos atu foo sotir boot baa o!”2-3 Mais Abram nataa na'ak, “Aaa! Na'i Maromak! Masik foo wa'in nunia moos, la no folin! Tan ha'u la koo oan atu foo husar-binan baa ha'u! Masik koo sasoin oi-oik moos, kodi kalo saa? Tan Ha'u la koo oan, habusik ha'ukaan atan Eliasar nosi Damsik dei mak netan Ha'ukaan sasoin hotu-hotu!”
4 Mais MAROMAK nataa na'ak, “La nunia! Okaan oan du'uk mak netan okaan sasoin nia. Lahoos okaan atan.”
5 Nunia ti'an, Maromak nala'o nodi Abram sai, hotu katak baa nia na'ak, “Tanaat baa lale'an! Maree kokon fitun nia sia. O bele sura mola sia ka lale? Okaan husar-binan nanis atu bea hanesan fitun nia sia!”
6 Rona nola nunia, Abram fiar kedan baa MAROMAK. Hotu, MAROMAK nafoli Abram na'ak, ema loos, tan Abram niakaan fiar.
7 Hotu, MAROMAK natutan tenik na'ak, “Ha'u ne'e Maromak mak kodi o sai kosi leo Ur iha ema Kasdim rain, nebee Ha'u klatan rai ne'e baa o, dadi baa sasoin bodik o mo okaan husar-binan sia.”
8 Mais Abram nusu na'ak, “MAROMAK? Oin nunabee, ha'u kbele katene rai ne'e nanis dadi baa ha'ukaan sasoin?”
9 Maromak nataa na'ak, “Ita halo lahan ida lai, atu hamate lia mak Ha'u kdale ohin nia. Lahan nia nune'e! O baa mola karau baka inan matan ida, bibi inan matan ida, no bibi malae aman matan ida. Ida-idak musti otas tinan tolu ti'an. Hotu, modi tenik mai, manu lakateu matan ida no manu lakateu sina matan ida.”
10 Rona nola nunia, Abram baa nola kedan. Hotu, nia saki fa'e rua karau baka, bibi no bibi malae nia. Nahulin na'an nia sia, fa'e baa rua, butuk iha rai. Fa'ek ida se'i oin baa ida, dadi baa tuik rua. Mais nia la saki fa'e manu nia sia. 11 Nunia hotu, manu kawaa sia semo mai atu naa na'an nia sia. Mais Abram nabu'a lakon sia.
12 Loro monu, Abram toba dukur. Nia me'i na'ak, nakukun luri taka nola nia, to'o nia nata'uk tebe-tebes.
13-15 Hotu, Maromak katak baa Abram na'ak,
“Abram! O atu moris to'o katuas basuk. O moos mate no-nook. Foin sia nakoi o di'a-di'ak!
Mais, okaan husar-binan sia atu dadi ema maktabar iha ema rain.
Ema rai nia atu nalo sia baa ata, no tonan nasusar sia to'o tinan atus haat laran.
Mais, Ha'u nanis kastikar ema rai nia!
Ha'u atu kodi okaan husar-binan sai kosi rai nia. Sia moos loi nodi sasoin wa'in nosi rai nia.a
16 Ha'u moos kahulin nebee okaan husar-binan dala lima sia, fila nikar mai rai ne'e.
Oras ne'e, ema Amori sia mak sei nein iha rai ne'e. Sia moris aat, mais sei la duun resik.
Nosi ikus, kalo okaan husar-binan sia fila mai nikar ti'an, Ha'u kodi sia kala'ok kastikar, kodi kabe'o dodok ema Amori sia, tan baa oras nia, siakaan hahalok aat naksoit liu kladik ti'an.”
17 Maromak katak ti'an, Abram moos naktekir. Kalan nia, teki-tekis sasanan rai ida nakboo, no klonus ida laka, nakfodak nalai liu tuir na'an tuik rua nia leet. 18 Oras nia moos, MAROMAK namate menon no Abram na'ak, “Ha'u kameno atu klatan rai ne'e baa okaan husar-binan. Nahuu nosi mota Mesir,b to'o mota Efrat, 19 no rai ema Keni, rai ema Kenas, rai ema Kadmon, 20 rai ema Het, rai ema Feris, rai ema Refaim, 21 rai ema Amori, rai ema Kana'an, rai ema Girgasi no rai ema Yebus sia.”