Abram baa tulun Lot
14
Baa oras nia, na'in haat libur malu. Sia nia, Amrafel, na'i rai Sinear. Ariok, na'i rai Elasar. Kedarlaomer, na'i rai Elam. No Tideal, na'i rai Goyim. 2 Baa oras nia moos, na'in lima seluk moos libur malu. Sia nia, Bera, na'i rai Sodom. Birsa, na'i rai Gomora. Sinab, na'i rai Adema. Semeber, na'i rai Seboim. No Bela, na'i rai Soar. Hotu, na'in haat ohin nia natuda sakar na'in lima seluk nia. 3 Na'in lima nia libur malu no siakaan sondadu sia iha rai fehan Sidim (mak oras ne'e ema temi na'ak, Tasi Maten).4 Hatuda nia, lia huun-abut nune'e: Uluk, na'in lima nia lo'u baa na'i Kedarlaomer to'o tinan sanulu resin rua. Mais tama baa tinan sanulu resin tolu, na'in lima nia moos nariik sakar nia.
5 Tama baa tinan sanulu resin haat, na'i Kedarlaomer no niakaan mamaluk na'in tolu nia, mai nodi siakaan sondadu sia. Hotu, sia natuda natoba nola ema rai hira sia, mak ema Refaim iha rai Asterot-Karnaim, ema Susim iha rai Ham, ema Emim iha rai Sawe-Kiryataim, 6 no ema Hori, mak nein iha foho Seir to'o raihenek molik El Paran di'in. 7 Hotu, sia la'o sees liu baa En Mispat, (mak oras ne'e naran Kades). Hotu, sia nabe'o dodok ema Amalek rain, no ema Amori, mak nein iha rai Haseson-Tamar.
8-9 Nosi ikus, na'in lima nia nahulin siakaan sondadu sia iha rai fehan Sidim, nodi natuda sakar na'in haat nia. 10 Iha rai fehan nia, noo debu kri'it wa'in. Baa oras sia natuda nia, na'i Sodom no na'i Gomora no siakaan sondadu sia ni'it aan nalai lakon. Balu monu tama baa debu kri'it nia sia. Balu tenik nalai baa foho. 11 Hotu, na'in haat mak natoba nola funu nia sia, tama baa nadau nola naha no haan hotu-hotu nosi kota Sodom no Gomora.
12 Baa oras nia, Abram alin oan Lot, sei nein iha kota Sodom. Na'in haat nia moos kohi nodi Lot sia, nodi nadau nola siakaan naha hotu-hotu. Hotu, na'in haat nia sia nahuu fila nikar.
13 Mais, ema ida nakbois sai. Nia nalai kedan baa katak Abram, ema Ibrani nia. Baa oras nia, Abram nein kre'is baa ema ida niakaan ai horis boot. Ema nia, ema Amori, naran Mamre. Mamre alin sia, Eskol no Aner. Sia ne'e dadi baa Abram niakaan partee. 14 Abram rona nola ema kohi nola niakaan alin oan Lot, nia libur niakaan meo sia. Sura sia hotu-hotu, ema na'in atus tolu sanulu resin walu. Hotu, sia baa te'ur tuir na'in haat nia, to'o leo Dan mak dook iha lorokaras.
15 To'o nebaa, Abram fa'e niakaan meo sia, nalo baa klibur hira sia. Baa kalan nia, sia natuda funu sia nodi te'ur to'o leo Hoba iha kota Damsik lorokaras. 16 Hotu, Abram nadau nola nikar Lot no niakaan ema sia, no siakaan naha hotu-hotu, no ema seluk sia.
Abram nasoru na'i Melkisedek, mak na'ilulik nosi Maromak
17 Abram fila nikar nosi natuda natoba na'in haat nia, na'i Sodom mai nasoru nia iha rai fehan Sawe (mak ema temi na'ak, Rai Fehan Na'in). 18 Baa oras nia, noo kota Salem na'in naran Melkisedek.a Nia moos na'ilulik nosi Maromak mak Aas Kaliuk. Melkisedek mai foo tubi no anggor ween baa Abram. 19-20 Hotu, nia nusu matak-malirin bodik Abram nodi katak na'ak, “Maromak, mak Aas Kaliuk no mak nase'i lale'an no raiklaran. Ha'u kaloon nebee Nia natuun matak-malirin baa o. Tonu Maromak! Nia mak nalo o matoba mola funu sia!”
Hotu, Abram fa'e foo baa Melkisedek, fa'ek ida nosi fafa'ek sanulu nosi sa-saa hotu-hotu mak nia nadau nola nikar nia.
21 Nunia hotu, na'i Sodom katak baa Abram na'ak, “Ama Abram! Naha hotu-hotu mak ama nadau nola nosi ha'ukaan funu sia, ama nola dei ona! Ha'u kusu kikar ha'ukaan ema sia dei.”
22 Mais Abram nataa na'ak, “Ha'u karai aan iha Maromak oin. Nia mak Aas Kaliuk, no mak nase'i lale'an no raiklaran. 23 Ka'ak, ha'u la kola naha saa ida kosi okaan naha sia! Masik kabas lahon ida moos, ha'u la kola! Hodi nunia, o la bele dale ma'ak, ‘Abram soi tan ha'u.’ 24 Ha'u la kbuka sa-saa. Ha'u ksimu loos saa mak ha'ukaan ema sia netan ti'an. Mais habusik ha'ukaan mamaluk na'in tolu ne'e, mak Aner, Eskol no Mamre, ida-idak nola siakaan fafa'ek.”