Abram no Lot fa'e malu
13
Hotu, Abram la'o nela Mesir, baa nikar rai Negeb. Nodi feen no sasoin hotu-hotu. Alin oan Lot moos tuir no. 2 Oras nia, Abram soi tebes. Niakaan bibi no karau sia, wa'in basuk. Niakaan mean-mutin moos, wa'in tebes.3 Nosi Negeb, Abram lori baa-mai to'o nikar fatin uluk mak nariik taroman iha leo Betel no leo Ai leet. 4 To'o fatin nia, nia nalo sera nodi lo'u-sudur baa MAROMAK iha taroman nia.
5 Oras nia, Lot namutuk no Abram. Lot moos noo bibi no karau wa'in. Niakaan ema serwisu moos wa'in. 6-7 Abram no Lot la bele nein namutuk iha fatin nia, tan loot basuk. Siakaan makbalin sia toe malu, tan hae iha fatin nia la to'o bodik siakaan bibi no karau sia. (Baa oras nia, ema Kana'an no ema Feris moos sei nein iha nia).
8 Hotu, Abram katak baa oan Lot na'ak, “Lot! Ita ne'e, oan-aman. Keta to'o ita rua la kona malu, hotu itakaan ema serwisu sia moos nakaat malu bei-beik. 9 Di'ak liu, ita rua fa'e malu ona. Rai ne'e luan. Kalo o boi mola rai iha sorin karuk, ha'u kola iha sorin kwana. Mais, kalo o boi mola iha sorin kwana, ha'u kola iha karuk.”
10 Rona nola nunia, Lot titu satan leur. Titu naree rai fehan mota Yordan mak noo wee soe haa haat, to'o leo Soar. Fatin nia boran tebe-tebes, manesak no MAROMAK to'os etu, no rai Mesir. (Baa oras nia, MAROMAK sei la nabe'o dodok dauk kota Sodom no kota Gomora. Dadi, rai nia sei furak). 11-12 Hotu, Lot boi nola rai hotu-hotu iha rai fehan mota Yordan nia. Hotu, sia rua fa'e malu. Abram nein nafati iha rai Kana'an. Lot baa lorosa'e, nein iha leo mak kre'is kota Sodom iha rai fehan mota Yordan. 13 Iha rai nia, ema Sodom sia aat liu resik, to'o la no'uk rona baa MAROMAK.
14 Lot no Abram fa'e malu ti'an, MAROMAK katak baa Abram na'ak, “Abram! Soe kokon matan satan leur, mana fatin hotu-hotu mosi o mariik fatik nia. Maree di'a-di'ak oin-kotuk, karuk-kwana. 15 Tan rai hotu-hotu mak o maree nia, Ha'u atu klatan baa o mo okaan husar-binan, dadi baa emikaan bein sasoin to'o nima-nimak. 16 Ha'u atu kalo okaan husar-binan bea wa'in, hanesan raihenek iha tasi tehen mak ema la bele sura nola. 17 Oras ne'e, la'o masirin rai ne'e naruk no belar. Tan Ha'u atu klatan hotu-hotu baa o!”
18 Hotu, Abram sia moos lori baa nein nikar iha fatin kre'is baa ai huun boot sia iha Mamre, mak kre'is leo Hebron. To'o baa, nia nalo tenik taroman, nodi lo'u-sudur baa MAROMAK.