Maromak bolu Abram
12
Abram aman Tera mate ti'an, MAROMAK katak baa Abram na'ak, “Abram! La'o mela okaan leo, okaan familin no okaan ama uman! Baa fatin ida mak Ha'u atu katudu baa o.2 Ha'u atu katuun matak-malirin baa o.
Okaan husar-binan atu bea tu'an,
dadi ema klubun boot, to'o ema iha fatin hotu-hotu natene okaan naran.
O moos dadi matak-malirin bodik ema seluk.
3 Ha'u katuun matak-malirin baa ema mak tulun o.
Mais, katuun kastikar baa ema mak nasusar o.
Rona di'a-di'ak!
Tan o, ema klubun hotu-hotu iha raiklaran netan matak-malirin.”
4-5 Oras Abram otas tinan hitu nulu resin lima, nodi feen Sarai, alin oan Lot, eman serwisu hotu-hotu, no bein sasoin hotu-hotu mak nia netan iha leo Haran. Sia la'o nela Haran, baa fatin ida naran Kana'an. Fatin nia mak MAROMAK natudu baa Abram.
6 To'o nebaa, Abram la'o to'o kre'is baa leo ida, naran Sikem. Hotu, sia nein heik kre'is baa ai huun boot ida iha More. Baa oras nia, ema Kana'an sia sei nein iha nia. 7 Iha fatin nia, MAROMAK natadu aan baa Abram na'ak, “Ha'u klatan rai ne'e baa okaan husar-binan.” Rona nola nunia, Abram nariik taroman nodi natetu sera baa MAROMAK, mak natadu aan ti'an iha nia.
8 Hotu, Abram sia lori sa'e baa foho iha lorokbelan baa. Sia nein heik iha fatin ida iha leo Betel no leo Ai leet. Iha nia, Abram nariik taroman ida, nodi lo'u-sudur baa MAROMAK. 9 Hotu, nia lori baa-mai, to'o rai ida, naran Negeb, iha rai Kana'an lorokbelan baa.
Abram lori baa rai Mesir
10 Baa tinan ida, rai salaen boot iha rai Kana'an. Tan baa nia, Abram sia lori soruk tenik baa lorokbelan, to'o rai Mesir. Sia nein heik iha nia. 11 Oras sia atu tama baa rai Mesir, Abram katak baa feen Sarai na'ak, “Sarai, o ne'e, feto kabaas basuk. 12 Kalo ema Mesir sia naree o kabaas nune'e, nanis sia atu no'o ha'u, tan ha'u ne'e okaan la'en! Hodi nunia, sia bele nola o. 13 Di'ak liu, o katak baa sia ma'ak, ha'u ne'e okaan maun. Hodi nunia, sia la no'o ha'u. Mais sia di'a-di'ak no ha'u, tan o.”
14 Sia to'o Mesir ti'an, ema naree nola feto kabaas basuk nia. 15 Baa oras na'i Mesir klosan sia naree nola nia, sia moos tonu feto kabaas nia iha na'in oin. Hotu, sia nodi feto nia baa na'in tofatik. 16 Na'in di'a-di'ak no Abram, tan Sarai. Nia foo loos bibi no bibi malae, karau baka, kuda keledai no kuda unta baa Abram. Na'in moos foo loos ata feto no ata mane.
17 Mais, MAROMAK natuun kastikar oi-oik baa na'in nia no niakaan ema sia, tan nola ema feen, natama baa tofatik. 18 Hotu, na'in bolu nola Abram nodi nusu na'ak, “Abram! O malo nunabee baa ha'u ne'e? Tan saa o la katak sain ma'ak feto ne'e, okaan feen? 19 Mais o ma'ak, o alin! Teni oan ida dei, kola nia baa ha'ukaan feen ti'an! Tan nia ne'e okaan feen, oras ne'e modi baa ona. Sees ona mosi ha'ukaan oin!” 20 Hotu, na'in naruka klosan sia te'ur nasai Abram no Sarai sai nosi rai nia, nodi siakaan naha hotu-hotu.