Ema nalo uma tetu boot ida iha kota Babel
11
Uluk fohon, ema hotu-hotu iha raiklaran dale nodi lia ida dei. 2 Sia balu lori baa lorosa'e to'o rai fehan ida iha Sinear.a Hotu, sia nein iha nia. 3-4 Hotu, sia kabuar lia fuan na'ak, “Mamaluk sia! Di'ak liu, ita hariik hola kota boot ida. Ita halo fatuk mean, tunu to'o monas. Hotu, ita hada baa malu hodi hanit atu hariik uma tetu ida mak aas to'o lale'an. Hodi nunia, ita hetan naran boot. Ita bele dadi klubun boot ida, la fa'e karin malu ona.”
5 Hotu, MAROMAK tuun nateke kota nia no uma tetu boot mak sia nariik nia. 6 Naree nunia, MAROMAK naneo na'ak, “Ema ne'e sia, ema klubun ida mak dale lia ida dei. Saa mak sia nalo baa oras ne'e, foin hakat uluk fohon dei. Awan-wainrua, kalo sia metis malu nohuun, sia bele nalo sa-saa dei. 7 Di'ak liu, Ita tuun baa, tokar siakaan lian, nebee sia la bele natene malu lian.”
8 Hotu, MAROMAK tuun, tokar lauk siakaan lian. Nodi nunia, Nia nalo ema nia sia fa'e karin malu baa fatin hotu-hotu iha raiklaran. Sia moos nanawa nariik kota nia. 9 Tan MAROMAK tokar lauk siakaan lian, nodi nalo sia keen karin malu baa fatin hotu-hotu iha raiklaran, sia nanaran kota nia na'ak, Babel, (tan lia fuan ‘babel’ ne'e, hanesan lia fuan Ibrani ida mak na'ak ‘benar karin’).
Sem husar-binan to'o Abram
10 Ne'e, Sem husar-binan. Motasa'e boot nia nanawa ti'an tinan rua, Sem moos otas tinan atus ida. Hotu, netan oan mane ida, naran Arpaksad. 11 Sem sei moris tinan atus walu tenik, nodi netan tu'an oan feto, oan mane.
12 Baa oras Arpaksad otas tinan tolu nulu resin lima, netan oan mane ida, naran Sela. 13 Arpaksad sei moris tinan atus haat tolu tenik, nodi netan tu'an oan feto, oan mane.
14 Sela otas tinan tolu nulu, netan oan mane ida, naran Eber. 15 Sela sei moris tinan atus haat tolu tenik, nodi netan tu'an oan feto, oan mane.
16 Eber otas tinan tolu nulu resin haat, netan oan mane ida, naran Pelek. 17 Eber sei moris tinan atus haat tolu nulu tenik, nodi netan tu'an oan feto, oan mane.
18 Pelek otas tinan tolu nulu, netan oan mane ida, naran Rehu. 19 Pelek sei moris tinan atus rua siwi tenik, nodi netan tu'an oan feto, oan mane.
20 Rehu otas tinan tolu nulu resin rua, netan oan mane ida, naran Seruk. 21 Rehu sei moris tinan atus rua hitu tenik, nodi netan tu'an oan feto, oan mane.
22 Seruk otas tinan tolu nulu, netan oan mane ida, naran Nahor. 23 Seruk sei moris tinan atus rua tenik, nodi netan tu'an oan feto, oan mane.
24 Nahor otas tinan rua nulu resin siwi, netan oan mane ida, naran Tera. 25 Nahor sei moris tinan atus ida sanulu resin siwi tenik, nodi netan tu'an oan feto, oan mane.
26 Tera otas tinan hitu nulu, netan oan mane na'in tolu, mak Abram, Nahor no Haran.
Tera husar-binan
27 Ne'e, mak Tera husar-binan. Tera oan sia, mak Abram, Nahor no Haran. Haran netan oan mane ida, naran Lot. 28 Haran mate iha leo huun, naran Ur iha ema Kasdim rain. Oras nia mate, aman Tera sei moris. 29 Abram nola feto ida, naran Sarai, nalo baa feen. Nahor nola nikar Haran oan feto, naran Milka. Hotu, Haran netan oan mane ida, naran Yiska. 30 Mais, Sarai sei kiuk.