Maromak namate menon no Noh
9
Hotu, Maromak natuun matak-malirin baa Noh no oan sia nodi katak na'ak, “Emi hahoris bea hakonu hikar raiklaran ne'e. 2 Osa no lotuk no manu ai leten no na'an tasi wee laran, hotu-hotu atu nata'uk emi. Emi mak babilan sia. 3 Emi bele haa siakaan na'an. Emi moos bele haa ai fuan nosi ai horis sia. Ne'e sia hotu-hotu, Ha'u klatan baa emi.4 Mais, emi la bele haa siakaan na'an kalo sei noo raan, tan sia moris nosi raan nia. 5-6 Ha'u kase'i ema tuir Ha'ukaan ilas. Tan lia nia, la bele ho'o ema. Kalo ema ida no'o ema, musti ukun mate nia. Kalo osa no lotuk sia no'o ema, musti ho'o. Ukun ne'e, nosi Ha'u. 7 Emi musti hahoris bea hakonu hikar raiklaran ne'e.”
8 Hotu, Maromak katak tenik na'ak, 9 “Oras ne'e, Ha'u atu kamate menon ko emi no emikaan husar-binan! 10 Mamenon ne'e moos kona baa hotu-hotu mak moris. Ne'e mak, osa no lotuk mak hakiak, mak fuik no manu ai leten sia. Mamenon ne'e kona baa sa-saa hotu-hotu mak sai namutuk no emi nosi roo nia. 11 Mamenon nia nune'e: Ha'u la katuun tenik motasa'e boot ona atu kabe'o dodok raiklaran ne'e no sa-saa mak moris.
12-13 Ha'u ktau Ha'ukaan baur iha lale'an dadi baa tadak, nebee emi bele hatene Ha'ukaan mamenon la nakotu baa emi no baa sa-saa mak moris iha raiklaran ne'e. 14-17 Kalo kalo'an sa'e iha lale'an, hotu baur tubu, baur nia foo natene baa Ha'u na'ak, Ha'u kameno ti'an, motasa'e boot la bele nabe'o dodok tenik sa-saa mak moris. Baur nia moos dadi tadak na'ak, Ha'u kamate menon ti'an ko emi no sa-saa hotu-hotu mak moris.”
Noh lanu
18 Noh oan sia mak sai mai nosi roo, sia mak Sem, Yafet no Ham (Ham nia, Kana'an aman). 19 Ema hotu-hotu iha raiklaran ne'e husar-binan mai nosi Noh oan na'in tolu nia.
20 Noh nia, ema mafaho rai. Nia mahalo to'os anggor uluk fohon. 21 Baa dala ida, Noh nemu anggor to'o lanu todan. Nia kolu tais, toba nakwalan iha batane laran. 22 Ham naree nola aman nakwalan nunia, nia moos nalai sai baa katak maun Sem no Yafet. 23 Sem no Yafet nola tais ida, hotu felar nodi sakat baa siakaan baas. Hotu, sia la'o nakiduk, tama baa batane laran, nafu'ut siakaan aman. Sia nalo nunia, nebee sia du'uk la naree aman nakwalan. Hotu, sia sai.
24 Noh oin moo ti'an, foin natene nola oan ikun hahalok. 25 Hotu nia katak na'ak, “Hoi Ham, Kana'an aman! Ha'u kastikar o! O atu dadi baa okaan maun sia atan.
26 Nebee MAROMAK atu natuun matak-malirin baa Sem!
Mais o oan Kana'an atu dadi baa Sem atan.
27 Nebee Maromak naluan Yafet rain.
Niakaan husar-binan moris dame no Sem husar-binan.
Mais, o oan Kana'an atu dadi baa Yafet atan.”