Rai nahuu maran
8
Mais Maromak la nalu'a Noh no osa no lotuk sia hotu-hotu iha roo nia. Nia foo anin nuu namoti wee motasa'e nia. 2 Nia moos taka wee matan hotu-hotu, no sena udan. 3 Wee nahuu moti oa-oan. Loron atus ida lima nulu siku liu ti'an, wee moos nahuu nakraik. 4 Natoon besik baa fulan hitu liu loron sanulu resin hitu, sura hosi udan nakfakar tuun nia, roo nia baken aan baa foho leten aas ida naran Ararat. 5 Wee moti bei-beik to'o loron dala uluk fulan sanulu, foho dikin sia moos tadu nikar. 6 Loron haat nulu siku liu ti'an, Noh loke kuak anin ida nosi roo nia. 7 Hotu, nia nabusik sai manu kawaa ida. Manu nia semo baa-mai. Oras wee motasa'e nia moti, nia la fila nikar baa roo. 8 Hotu, Noh moos nabusik manu lakateu ida, atu nodi natene, wee moti tebes ti'an ka, sei. 9 Mais, tan wee sei taka nola raiklaran, manu nia la netan rani fatik. Hotu, nia fila nikar baa roo. Noh lolo liman, simu nola manu nia, natama nikar baa roo laran.
10 Hotu, Noh nein loron hitu tenik, foin nia nabusik nikar manu nia. 11 Loro malirin, manu nia fila nikar mai baa Noh, mais tutu nodi ai saitun tahan ida, mak foin tutu silu nola. Naree nunia, Noh bele natene wee moti tebes ti'an. 12 Nia nein loron hitu tenik, foin nabusik tenik manu nia. Mais dala ida ne'e, manu nia la fila mai.
13 Oras Noh otas tinan atus neen ida, wee motasa'e nia nakraik tebe-tebes, kona baa fulan ida loron dala uluk. Noh loke kuak anin nodi titu satan leur, foin natene na'ak, rai atu maran ona. 14 Liu fulan ida loron sanulu resin hitu tenik, rai maran tebe-tebes ti'an.
15 Hotu, Maromak naruka Noh na'ak, 16 “Oras ne'e, emi hotu-hotu tuun hosi roo ona. 17 Masai osa no lotuk nia sia hotu-hotu. Masai mak hakiak, mak fuik, mak mane'ek no manu ai leten sia. Mabusik sia, nebee sia bea tu'an, nakonu nola raiklaran ne'e.”
18-19 Rona nola nunia, Noh moos tuun nosi roo no feen, oan sia, no oan feen sia hotu-hotu. Osa no lotuk nia sia moos sai, tuir oik ida-idak.
Noh nalo sera baa Maromak
20 Sai nosi roo ti'an, Noh nada fatuk taroman, nodi nalo sera baa MAROMAK. Nosi osa no lotuk no manu ai leten mak bele sera, Noh nola matan ida-idak, ko'a no'o, hotu tunu baa taroman nia leten, nalo sera baa MAROMAK. 21 MAROMAK noran nola sera tunun nuhar morin nia, Nia neon di'ak. Hotu, naneo na'ak,
“Nahuu baa oras ne'e, Ha'u la kastikar tenik raiklaran ona, tan ema siakaan a'aat. Masik sia naneo mesan aat dei, Ha'u la kabe'o tenik ona sa-saa mak moris, nu'u Ha'u kalo ti'an nia. 22 Oras raiklaran ne'e sei iha, loro no kalan musti la'o bei-beik atu babilan oras furi no oras ku'u, oras malirin no oras manas, oras loro falin no oras rai udan.”