Lia Uluk Fohon 7

Motasa'e boot

Hotu, MAROMAK katak baa Noh na'ak, “Ha'u karee ema iha fatin hotu-hotu ti'an, mais o mesan dei mak loos! Tan lia nia, o mo okaan uma isin sia tama baa roo ona! 2-3 Osa no lotuk oi-oik mak bele haa, no mak bele sera baa Ha'u, modi inan no aman hitu-hitu, tama baa roo. Manu oi-oik moos, modi inan no aman hitu-hitu. Mais, osa no lotuk seluk sia, modi inan no aman ida-idak dei. Hodi nunia, sia dadi baa fini, nebee bea bei-beik.

4 Rona di'a-di'ak! Hela loron hitu dei, Ha'u atu katuun udan mak la nanawa, to'o kalan haat nulu, loron haat nulu! Kodi nunia, Ha'u ko'o mohu hotu-hotu mak moris iha rai maran, mak Ha'u kase'i ti'an.”

5 Hotu Noh nalo tuir MAROMAK harukan hotu-hotu. 6 Oras motasa'e nia, Noh otas tinan atus neen. 7 Nia tama baa roo no feen, no oan, no oan feen sia, nebee sori aan nosi motasa'e boot nia. 8-9 Oras nia moos, manu oi-oik no osa no lotuk seluk sia mai baa Noh. Osa no lotuk nia sia, inan no aman ida-idak, nosi mak ema bele naa no ema la bele naa. Sia tama bele-bele baa roo namutuk no Noh, tuir MAROMAK harukan. 10 Loron hitu liu, motasa'e moos nakfakar mai, to'o nahuu taka nola raiklaran ne'e.

11 Kona baa Noh otas tinan atus neen, liu fulan rua no loron sanulu resin hitu, motasa'e nia to'o mai. Udan nakfakar tuun hanesan lale'an odamatan nakloke. Wee matan hotu-hotu iha rai kidun moos taba no nakduar sai. 12 Udan moos la nanawa kois loron-kalan, to'o loron haat nulu.

13 Mais loron nia, Noh tama baa roo laran no feen, oan na'in tolu, mak Sem, Yafet no Ham, no oan feen hotu-hotu. 14 Sia tama bele-bele no osa no lotuk mak hakiak, mak fuik, mak mane'ek, no manu ai leten, no osa no lotuk seluk mahoo liras sia. 15-16 Osa no lotuk inan no aman ida-idak nosi hotu-hotu mak moris, tama baa roo namutuk no Noh, tuir Maromak harukan nia.

Sia hotu-hotu tama ti'an, MAROMAK moos kusa roo odamatan.

17-19 Udan boot tuun bei-beik, to'o loron haat nulu. Motasa'e nia moos hetak aas tu'an, to'o roo naklele. Wee sa'e bei-beik, to'o taka nola foho aas sia. 20 Wee nia sa'e la nanawa kois, to'o aas ro'a hitu iha foho leten.

21-23 Hodi nunia, hotu-hotu mak moris iha rai maran, mate fasi. Ne'e mak: ema, osa no lotuk mak hakiak, mak fuik, mak mane'ek no manu ai leten. Hela mesan Noh no hotu-hotu iha roo laran nia, mak moris. 24 Wee nia la moti kois, to'o loron atus ida lima nulu.