Ema siakaan a'aat
6
Oras nia, ema hetak bea tu'an. Sia moris keke lema rai ti'an. Sia moos nahoris oan feto kabaas. 2 Hotu, Maromak oan mane sia naree feto oan nia sia. Sia moos nola sia, tuir siakaan beer. 3 Loron ikus, MAROMAK katak na'ak, “Ha'u kole resik ti'an, tan ema raiklaran moris la loos! Ha'ukaan Kmalar mak foo moris baa sia. Mais oras ne'e, Ha'u la ko'uk sia moris nohuun.a Nahuu baa oras ne'e, sia la bele moris otas naruk ona, mais sia musti mate. Sia bele moris to'o otas tinan atus ida rua nulu dei.”4 Baa oras nia no otas ikus tenik, ema bei balerab moris iha raiklaran. Maromak oan mane sia nola ema oan feto sia, hotu sia nahoris ema balera nia sia. Sia dadi meo ulun mak ema hotu-hotu natene tuir lia uluk.
5 Oras nia, MAROMAK naree ema raiklaran hahalok aat liu resik. Sia natene loos nanoin aat dei. 6 MAROMAK laran moras, tan nase'i ti'an ema raiklaran. 7 Etuk, MAROMAK katak na'ak, “Tan siakaan a'aat nia, Ha'u atu kabe'o dodok ema raiklaran mak kase'i ti'an nia. Ha'u moos kabe'o dodok manu no osa no lotuk hotu-hotu. Ha'u laran moras kase'i sia ti'an!” 8 Baa oras nia, Noh mesan mak nalo MAROMAK neon di'ak.
Lia Noh
9-10 Lia nosi Noh niakaan dalan moris nune'e. Noh oan mane na'in tolu, naran Sem, Yafet no Ham. Noh moris loos, la nalo aat. Nia mesan dei mak di'ak, tan nia moris kre'is baa Maromak.
11-12 Mais Maromak naree ema seluk sia, aat hotu. Iha nabee dei, sia moris aat liu resik, to'o Maromak naree a'aat dei iha raiklaran. 13 Naree nunia, Maromak katak baa Noh na'ak, “Iha fatin hotu-hotu, Ha'u karee a'aat dei. Dadi, Ha'u kakotu ti'an atu kabe'o dodok raiklaran ne'e no sasoin hotu-hotu. 14 Mais nune'e, Noh! O musti malo roo boot ida modi ai monas! Malo ke'an iha laran. Hotu, tukir roo molin modi hanit. 15 Roo nia naruk musti ro'a atus ida tolu nulu resin tolu, belar ro'a rua nulu resin rua, aas ro'a sanulu resin tolu. 16 Soor roo nia. Malo soor no leet nosi kadidin leten, takseer ro'a baluk ida. Fa'e roo nia malo baa tetu tetek tolu. Hotu, malo odamatan ida baa roo sorin!
17 Manoin di'a-di'ak, tan Ha'u atu katuun motasa'e boot, kodi ko'o hotu-hotu mak moris iha raiklaran ne'e. To'o la hela sa-saa! 18 Mais, Ha'u atu kamate menon ko o, Noh. O musti mola o feen, o oan, no o oan feen sia, tama baa roo nia.
19-20 Mola tenik osa no lotuk hotu-hotu, inan no aman ida-idak. Mola mak hakiak, mak mane'ek, no manu ai leten sia. Matama sia baa roo, nebee moris namutuk no o. Hodi nunia, sia bele moris. 21 O moos musti loi matama haan oi-oik bodik emi ho osa no lotuk nia sia.”
22 Rona nola nunia, Noh moos nala'ok tuir Maromak harukan hotu-hotu.