Oan rua nia boot mai, Habel bali bibi no bibi malae, Kain serwisu to'os. 3 Dala ida, Kain nodi niakaan to'os isin balu, sera baa MAROMAK. 4 Habel moos nola bibi malae oan ulun sia. Nia no'o, hotu nodi na'an kabaas sia, sera baa MAROMAK. Naree nunia, MAROMAK neon di'ak baa Habel, tan sera nia. 5 Mais MAROMAK la nakara Kain niakaan sera. Tan baa nia, Kain krakat, to'o oin kadubuk.

6 Naree nunia, MAROMAK nusu Kain na'ak, “Hoi Kain! O oin kadubuk baa saa? 7 Kalo o malo di'ak, Ha'u moos simu di'a-di'ak. Mais, sintidu! Kalo o malo aat, a'aat nia atu naa fila o, hanesan busa sobak laho. Kalo o makara malo aat, di'ak liu dudu sees hanoin aat nia kedan!”

8 Nunia hotu, dala ida Kain namaus Habel na'ak, “Ali! Mai ita baa to'os lai!”^a Hotu sia baa. To'o to'os baa, teki-tekis Kain ta'e no'o alin.

9 Naree nunia, MAROMAK nusu Kain na'ak, “Hoi Kain! O alin iha nabee?”

Kain nataa na'ak, “Ha'u la katene! Ha'u mak kaer nia ain ka?”

10 Hotu, MAROMAK dale na'ak, “Tan saa o malo aat nunia? Keta maneo o bele subar o alin raan baa rai. Ha'u karee ti'an! 11 Oras ne'e, kastikar sa'e kona o ona. Oras o mo'o o alin, rai norut nola niakaan raan. Tan baa nia, rai la bele foo tenik moris baa o. 12 Kalo o malo to'os, rai la foo isin baa o. Nahuu baa oras ne'e, o tablaun lerek hanesan ema susar mak buka moris iha raiklaran.”

13 Rona nola nunia, Kain sakar MAROMAK na'ak, “Adeei Na'i Maromak! Keta matuun kastikar todan liu resik nunia, to'o la kbele katiu! 14 Kalo Na'i Maromak te'ur sai ha'u kosi fatin ne'e, ha'u kdook nanis kosi Na'i Maromak ti'an. Ha'u tablaun lerek dei ona. Ema mak nasoru ha'u, nanis no'o ha'u.”

15 Mais, MAROMAK nataa fila na'ak, “Lahoos nunia! Kalo ema no'o o, Ha'u atu kastikar nia isin hitu todan liu tan!” Hotu, MAROMAK tau marak baa Kain, nebee ema bele natene na'ak, la bele ho'o nia. 16 Hotu, Kain la'o nela fatin nia, baa nadook aan nosi MAROMAK, to'o fatin ida naran Nod, iha to'os Eden lorosa'e. Nod ne'e lia isin na'ak ‘tablaun’. Hotu, Kain nein iha nia.

17 Nosi ikus, Kain nola feto. Hotu, feen ko'us to'o nahoris oan mane ida, naran Henok. Kain moos nariik nola leo ida. Nia nanaran leo nia na'ak, Henok, tuir oan naran. 18 Nosi ikus, Henok netan oan, naran Irad. Irad oan, Mehuyael. Mehuyael oan, Metusael. Metusael oan, Lamek.

19 Lamek feen rua. Ida naran Ada, ida tenik, Sila. 20 Ada oan, Yabel. Yabel husar-binan dadi makbalin. Sia lori baa-mai, nein iha batane. 21 Yabel alin, Yubal. Yubal husar-binan dadi makdiuk bareka no mahuu kfui.

22 Lamek feen Sila nahoris Tubal Kain. Tubal Kain husar-binan dadi badaen besi no besi riti. Tubal Kain feton, naran Na'ama.

23 Dala ida, Lamek loko aan iha feen sia oin na'ak, “Emi rona! Foin da-dauk ne'e, mane nurak ida atu ta'e ha'u, mais ha'u ktuku ko'o nia. 24 Kalo ema no'o Kain, netan kastikar dala hitu. Mais, kalo ema nakara rai hirus baa ha'u, atu netan kastikar dala hitu nulu resin hitu.”

25 Nosi ikus, Adam feen Efa nahoris tenik oan mane ida naran Set. Hotu, Efa dale na'ak, “Na'i Maromak foo oan ne'e baa ha'u atu seluk Habel, mak Kain no'o ti'an nia!” 26 Kleu-leur Set moos netan oan mane ida naran Enos.

Natoon baa oras nia, ema nahuu natene MAROMAK nodi lo'u-sudur baa Nia.