2 Ta d'ai nga gubernur, ta keb'ali ke pa Yesus, mihe ane, “Minamii? Petuu tèra ke Èu ta duae do Jahudi?”

Ta b'ale ke ri Yesus, “Tèra. Petuu ke ne lii pali Ama Gubernur.”

3 Ta pedae ke ri mone ketèu pa kètu agama he nga gubernur, mihe ane, “Ad'o ke ta hudi we ne hala dèu nad'ee!” Ta nèj'i ke ri roo harièle ne hala Yesus.

4 Ta keb'ali wari ke gubernur pa Yesus, mihe ane, “Rènge d'o ri Èu ne lii pedai roo? Ae ke ne hala Èu, ne pika roo. B'ale ko ri Èu ta!”

5 B'ale d'o ri Yesus he ub'a he, tade madalae gubernur.

6 Pa tima hewue tèu-hewue tèu, pa lod'o nga'a-kewèhu Paska Jahudi, dèu lowe ami pa gubernur ta gole he dèu ti d'ara èmu b'èdo, pedutu lii ami roo. 7 Pa awe do na ène, era he dèu do b'èdo, ne ngara Barabas. Ne kèpe noo do uru he, pelai ta pelawa nga do pereda Roma, nga pemade dèu. 8 Ri umu ke ne lod'o nga'a-kewèhu Paska, ku ae ke ne dèu do kako nga gubernur, la pekaa, ane roo, “Ama gubernor! D'ai ke pa lod'o kewèhu Paska. Ki ie he, gole wie j'ii he dèu ti d'ara b'èdo, pedutu tima.”

9 Ta keb'ali ke gubernur, “Naduu ke do ta gole ri yaa? Minamii ki gole ri yaa ne duae do Jahudi d'ee? Hèmi muu, we ad'o?” 10 Pedai gubernur minahère, ne petuu he, do toi tèra ke ri noo, ta mone ketèu pa kètu agama he ne èbe Yesus nga noo, pelai ti rihi bubu d'ara nga Yesus.

11 Ri mone ketèu pa kètu agama he, ubu made ne dèu lowe he, lii ta ami pa gubernur, mihe ane, “Wae d'o j'ii nga Noo! Gole we Barabas!”

12 Ta keb'ali rike gubernur, mihe ane, “Ki minahère, ta tao minamii ke ri yaa pa Yesus, do pale ta ‘duae do Jahudi’ nad'ee?”

13 Ta pekaa ke roo hari-hari, mihe ane, “Pemade we Noo! Raje Noo pa aj'u ketoe!”

14 Ta keb'ali ke gubernur, “Nengaa ke ne hala Noo? Pereha ri yaa, b'ule d'o Noo nga hala!”

Juu mèdu ne lii pekaa roo, “Pemade we Noo! Raje Noo pa aj'u ketoe!”

15 Mij'i mengèlu d'ara dèu lowe, ta gole ke Barabas ri gubernur, pedutu lai d'èi roo. Ta pereda ke ri noo pa dèu jaga he, ta la wèbe Yesus ri gui.^a Ta èla pewèbe, ta èbe ke Yesus ri horod'ad'u, ta la raje mij'e ta made pa aj'u ketoe.

16 Pa awe do na ène, ta nune ke Yesus ri horod'ad'u he la keb'èla kato roo.^b Ta pedoa ke ne ihianga roo he batalion. 17 Ta pepake ke ri roo Yesus hewue b'aj'u merai do wo kelere mea, do tima ta pake ri duae he. J'e ènyo ri roo ne tèd'u ngati kelai a'ju do dudu. Petèd'o, j'e ènye peb'ère pa kètu Yesus. Ne tao roo minahère, ta mare-d'ole Yesus, ta mii d'ede he dèu duae do wiu, pepake tèd'u duae.

18 Ta mare-d'ole rike Yesus ri roo, ta petab'e nga Noo, mihe ane, “Helama pereda, Muri Mone, duae Jahudi!” 19 Hengaja roo ta peru'u èni pa hed'apa Yesus. J'e hebue-hebue ri ilu roo pa tanga mada Yesus. J'e wuhe d'abe ri aj'u pa kètu Yesus ri roo. 20 Ta b'enya roo ne tao pa Noo, ta boke ke ne b'aj'u do womerai nee. J'e pepake wari ri roo ne b'ara pake Noo. Ta èbe ke Noo ri roo la tele kota Yerusalem, mij'e ta la raje ketoe Noo tade made.

21 Pa telora ruj'ara ti Yerusalem, pehapo roo nga he dèu do dèka ngati kota Kirene. Ne ngara noo, Himo, ama ri Aleksander nga Rufus. Ta maho kowe noo la kota Yerusalem, moko ta kèpe ri horod'ad'u he, j'e pehèhe noo ta pehape ne aj'u ketoe Yesus.^c 22 Ta nune-hèpe ke ri roo Yesus, tade d'ai la hewue era, ne ngara Golgota, ne hela'u mii ‘era rui kètu’. 23 Pa nii, do ta pengino ri roo nèb'o èi ago do menyilu do pehiwe ri ruaj'u, mij'e ta d'o rihi noho pèda. Tapulara wae d'o Yesus ta ngino. 24-25 Ta èla pe minahère, ta raje ke Yesus peb'arèpa pa aj'u ketoe ri roo. J'e petito ri roo ne aj'u ketoe nee, era wèba heo j'ami ae he. Ta pepili ode ke ne horod'ad'u he, mij'e ta toi ta nara naduu ne b'ara pake Yesus.^d 26 Ta b'uke ke roo pa bèla papa, j'e raje pa huu aj'u ketoe, pemira wukolo Yesus, mihe ane:

Na ène ke ne kepue hala ta wole Yesus. 27 Pa ène lema, ketoe pemade ri roo do d'ue mone tao kenya'u nga apa-kerewe. He dèu pa heb'èka ked'anga, nga he dèu pa heb'èka keriu Yesus. 28 [Nahère, do lore do hure do b'uke ke, “Ne tao roo pa Noo, mii pa dèu do tao apa-kerewe.”]^{e f}

29 Harièle dèu do lake j'ara ène, ngède Yesus do ketoe. Ta piku-piku kètu ke roo, j'e mare pemekae d'ara Noo ri roo, mihe ane, “Eeh! Ad'o Èu ke do lii, ta b'age pemenyèle ri Èu Èmu Kepue Heb'aj'a pa Deo, j'e pekèd'e wari pa d'ara tèlu lod'o, we ad'o?^g 30 Hèku ko Èu ta puru ti kolo aj'u ketoe nee, mij'e bèla kètu Èu. Ki minahère, j'e'itu parahaj'a j'ii ta Èu tèra ke ne Ana Deo.”

31 Minahère lema, ne mone ketèu pa kètu agama he nga guru agama he, ne mare-d'ole Yesus, mihe ane, “Pehelama ri Noo dèu do hewala, tapulara nara d'o ta pehelama ne ngi'u Noo miha! 32 Do pika wari èni Noo, ta Noo ke ne ‘Kristus’, dèu do jaje ri Deo rai uru. Lii dèu do hewala, Noo ne Duae do Isra'el. Ki do petuu ke minahère, hèku ko Noo ta puru ti aj'u ketoe d'ee, mij'e ngède ri dii. Ki minahère, parahaj'a ke dii nga Noo.”

Hari do d'ue dèu do ketoe hela'u nga Yesus he, pedutu lema ta mare-d'ole Noo.

33 Pa awe do na ène, ta kerèba guru rai ke ne era na ène, rai nètu lod'o tade wèba tèlu mako lod'o.

34 Pa d'ara wèba tèlu, ta pekaa ke Yesus pa d'ara lii Aram, mihe ane, “Eloi! Eloi! Lama sabaktani?” (Ki peb'ale pa d'ara lii rai dii, “Wo Muri Yaa! Deo Yaa! Ta ngaa ke Ama ku naja kej'unga, j'e hane Yaa minahee?”)^h

35 Era do pèri dèu do umu pa ène, do rènge ne lii pekaa Yesus. Ta lii ke roo, “Weh! D'èno ko ri muu. Nèi ke ri Noo ta pedoe Elia, mone ub'a ngati Deo do uru nee!” 36 Mèri-mèriai he dèu la èba boroo la pehèb'o pa èi ago do menyilu. Tèb'o ri kèji ne boroo nee, j'e pej'ole la kuri ub'a Yesus, mij'e ta hemuhe ri Noo, j'e lii, “Mata ko! Heleo ko ri dii! Ngita dèka tèra Elia ma pepure Noo ti aj'u ketoe d'ee.”ⁱ

37 Moko ta pekaa wari ke Yesus, j'e made.

38 Pa d'ara Èmu Kepue Heb'aj'a pa Deo, era ne b'èla do perète ta pewate Kama do Mèu do Megala. Pa awe hèpo hengaa Yesus, ne b'èla mehèri ped'ue rai ti d'ida, hape la d'a'i.^j

39 Pa Golgota, era he dèu kètu horod'ad'u do jaga, do titu pe'umu nga aj'u ketoe Yesus. Ta ngède ri noo ne lua made Yesus, ta keb'èdi ke noo. J'e lii, mihe ane, “Wii! Tèra-tèra, Dèu nad'ee, Ana Deo!”

40-41 Pa ène, era lema do pèri dèu wobèni, do titu ti j'èu, do ngède ne lua made Yesus. Mobèni nahère, do tima ta pemoke Yesus he pa Galilea. Ne ngara wobèni he, Salome, Maria ti rae Magdala, nga Maria do wala (ri ina ri J'ako do ngèru, nga Yoses),^k nga era ri ko wobèni do wala, do dèka pedutu Yesus hape la Yerusalem.^l

42-43 Èla pe na ène, era he dèu do kale pengee ta d'èi ta pepure ngi'u Yesus ti aj'u ketoe. Ne ngara noo Yusuf, ti rae Arimatea. Noo lema he dèu ti telora mone hèpo kewèlu pa d'ara agama Jahudi. Noo he dèu, mone mola ngee. Noo lema pa d'ara ta mata ne dèka lua pereda Deo.

Made Yesus, lèka pa hari lèmi. B'èli rai nee, lod'o heb'aj'a do Jahudi. Ri harièle mii ke, ku d'èi ke Yusuf ta la pepure mèriai ne ngi'u Yesus. Ta peb'ani d'èlu ke noo, ta la ame ne ngi'u Yesus pa gubernur Pilatus. 44 Ta rènge ne lii ami Yusuf minahère, ta hengodo ke noo, j'e lii, “Weh! Made d'ènge ke Noo? Ne pengee ri yaa, ad'o minahère.”

Ta pejuu ke ri noo dèu la pedoe ne kètu horod'ad'u do jaga. J'e keb'ali noo, “Minamii we? Do made tèra ke Yesus, we ad'o?”

45 Ta b'ale ke ri kètu horod'ad'u nee, mihe ane, “Made rai ngine heke, Ama, ee.” Ta rèngi ri gubernur ta do minahère, ta lii ke noo pa Yusuf, ta la èbe ne ngi'u Yesus.

46 Ta pekèd'e ke Yusuf la Golgota. La pepure ri noo ne ng'iu Yesus ti aj'u ketoe. Ta wute ke ri noo ne ngi'u Yesus pe wo'ie-ie, ri b'èla do wiu, do maha keb'ue. Pa awe do na ène, ta èla kowe roo, pe kei hewue ro'a naba ta tuu rae dare pa b'ojo wowadu. Ta hero'e ke ri roo ne ngi'u Yesus la d'ara ro'a ène. J'e riho ri roo hewue ne wowadu keb'èla do worena, la henèb'e ne ub'a ro'a ène. Ta b'ale ke Yusuf he.

47 Pa awe na ène lema, Maria ti rae Magdala, nga Maria do wala (do ina ri Yoses ne), do pedutu hape la nii. Do toi woie ke ri roo d'ue, ne era peb'èj'e Yesus.