Lii Ped'iri Petari Rai
J'ari ngati Deo Muri ne tao liru nga rai-wawa
Deo Muri pejad'i liru, rai-wawa nga ihi pa d'ara he
1
Uru j'ara Deo Muri ne pejad'i liru nga rai-wawa.2 Awe do napone jad'i ded'o rai-wawa, harièle do kenyawu-nyela ko. Ne do era, èi we. J'e do kerèba guru rai ko ne herimo noo. J'e Hengaa Muri era do manga pa d'ida èi do napone.a
3 Moko ta lii ke Deo Muri, “Do j'èma ta era teleo.” Ta èla pe lii minahère ta era ke teleo. 4 Ngède teleo do napone, ta mengèlu d'ara ke Noo, rowi ne do tao ri Noo, do woie tèra ma. D'ai ta petale ke ri Noo teleo do napone ngati kerèba, mij'e era nga awe miha-miha. 5 Ta pehune ke ri Noo teleo ne ta, ‘èni lod'o’, j'e kerèba ne ta, ‘mèd'a’. Nanee ke lod'o petari.
6-7 D'ai ta pali rike Deo Muri, “Do j'èma ta era, era do kehoo ta petala ne èi ne. Ri minahère ke era èi pa d'ida, lema era èi pa d'a'i.” Ta èla pelii minahère ta tala ke b'agi d'ue ne èi do napone. 8 Ta pehune ke ri Noo era do kehoo pa d'ida ne ta, ‘liru’. Nanee ke lod'o ked'ue.
9 D'ai ta pali rike Deo Muri, “Èi do pa d'a'i d'ee do j'èma ta teni pa èhi era, mij'e era worai do kemangu.” Ta èla pe lii minahère ta era ke worai do kemangu. 10 D'ai ne worai do kemangu napone, ta pehune ke ri Noo ta ‘kololede’; J'e èi do teni napone, pehune ri Noo ta ‘dahi’. Mengèlu ke d'ara Noo heleo harièle ne lai nahère, rowi nengaa ne do tao ri Noo, do tèra ne woie. 11 D'ai ta lii rike Deo Muri, “Do j'èma ta muri ri na'aj'u pa kololede. Do j'èma ta era na'aj'u do nga wue, do nga lamuhi, lema do nga rèu do mengèru. Mij'e ae kejie worèwu na'aj'u nahère nara ta wila ta wue ngati kepue roo miha.” Ta èla pe lii minahère, ta muri ke hari-hari na'aj'u. 12 Pa Kololede, ne na'aj'u he ta wila ta wue ke ngati kepue roo miha. Mengèlu d'ara ke Noo, heleo napone harièle, rowi nengaa ne do èla petao ri Noo he, do tèra ne woie. 13 Nanee ke lod'o ketèlu.
14-15 D'ai ta pali rike Deo Muri, “Pa d'ida nid'e, do j'èma ta era heworèwu-heworèwu b'ara do kelala mij'e nara ta peteleo ne rai-wawa do na d'ee. Do j'èma ta wie kelala pa awe èni lod'o, lema era do hewala do wie kelala pa awe mèd'a. Harièle lai nahère mij'e nara ta reke lod'o, tèu, nga wèru.” Ta èla pe pali minahère, ta era ke ne b'ara do ta pekelala he. 16 Pe'era ri Noo d'ue b'ara teleo do worena. Do rihi worena ne, wie kelala pa awe èni lod'o; do wonaiki ne, wie kelala pa awe mèd'a. Pe'era lema ri Noo ne moto he. 17 Ta peato ke ri Noo ne b'ara nahère pa liru, mij'e nara ri roo ta pekelale ma rai-wawa. 18 Moko ta wie kelala ke ri roo pa awe èni lod'o, lema kelala pa awe mèd'a. Nga minahère, ta petale ri roo kelala ngati kerèba. Mengèlu ke ne d'ara Noo heleo harièle do napuhère, rowi nengaa ne do èla pe'era ri Noo do napone, do tèra ne woie. 19 Nanee ke lod'o ke'èpa.
20 Ta pali rike Deo Muri, “J'èma ta petobe ri heworèwu-heworèwu nadu'u, do muri pa d'ara èi. Lema j'èma ta pe'ae ri heworèwu-heworèwu dolila do nara ta lila pa ihi liru nee.” 21 D'ai ta pe'era ke ri Noo harièle worèwu nadu'u nga b'ada do mone ae do muri pa d'ara èi. Pe'era lema ri Noo heworèwu-heworèwu dolila pa ihi liru ne. Heleo harièle do napone, mengèlu ke d'ara Noo, rowi nengaa do èla ta pe'era ri Noo do napone, do tèra ne woie. 22 Ta pali j'e wie mèngi ke ri Noo pa roo hari-hari, “Nadu'u he do j'èma ta juu ae, petobe ne èi pa mii-mii. Lema ne dolila he do j'èma ta juu ta ae.” 23 Nanee ke lod'o kelèmi.
24-25 D'ai ta lii rike Deo Muri, “Do j'èma ta era heworèwu-heworèwu b'ada do muri pa kololede. Ie ta b'ada peluja, b'ada èdu, lema b'ada do rod'o ri kabu pa worai, miha-miha nga worèwu roo.” Ta èla pe pali minahère, ta era ke hari-hari ne b'ada he. Ta mengèlu ke ne d'ara Noo heleo harièle do nahère, rowi nengaa do èla pe'era ri Noo do napone, do èla ta pe'era tèra ne woie.
26 D'ai ta pali rike Deo Muri, “Mai Dii maa tao ne dèu pedutu nga hia wewo Dii. Mij'e nara ri roo ta pemane hari-hari nadu'u pa d'ara dahi, hari-hari dolila pa liru, hari-hari b'ada peluja, lema nga hari-hari b'ada do hewala do muri pa kololede.”b
27 Ta tao ke ri Noo dèu pedutu nga hia wewo Noo. Tao ri Noo womone nga wobèni. 28 Ta pali j'e wie mèngi ke ri Noo pa roo, “Do j'èma ta b'èb'a kehanga muu pe'ae, ta petobe nga ta pemane rai-wawa na d'ee. Do wie higa ri Yaa pa muu ta pemane nadu'u he, dolila he, nga hari-hari b'ada pa kololede. 29 D'èno pe'ie-ie! Wie muu ri Yaa hari-hari worèwu b'ara nga'a pa rai-wawa d'ee. Mii; na'aj'u do nga wue, do nga lamuhi, lema do mengèru rèu. 30 Wie lema ri Yaa hari-hari worèwu na'aj'u, mij'e jad'i ta nga'a ri hari-hari worèwu b'ada. Era nga'a tuu b'ada peluja, b'ada èdu, b'ada do rod'o ri kabu, nga dolila he.” Ta èla pe lii minahère, era ke harièle worèwu b'ara nga'a. 31 Ta mengèlu ke d'ara Noo heleo harièle do napone, rowi nengaa ne do èla pe'era ri Noo do napone, do rihi tèra ne woie. Nanee ke lod'o ke'èna.