Ne pedai roo minahère ri dae d'ue lod'o ke, ne lod'o nga'a-kewèhu unu do Jahudi, do tima ta pale ta ‘Lod'o Paska’ nga ‘Lai Tao Nga'a Roti Dod'o Pake Ragi’. Pa d'ara lod'o nga'a-kewèhu na ène, pehenge awe do uru he, ama-èpu roo mèhu èni ti ihi rai Mesiir.^a

3 Pa rae Betania, era he dèu ne ngara Himo, do ie ti pèda kusta.

Awe do na ène, d'ai ded'o la lod'o nga'a-kewèhu, Yesus he kako la nga'a pa èmu Himo. Pa d'ara nga'a roo, dèka ke he dèu wobèni la pehapo nga Yesus. Dèka noo nga pèru hewue wob'uri do tao ti wowadu. Ne ihi noo, èi loko wumèngi do rihi maha keb'ue.^b Ta pèko ke ri noo ne lakoko wob'uri nee. J'e pehute ne èi wumèngi ne ri noo la wukolo Yesus, rutada pekeb'ue ri noo Yesus.

4 Era lema pa ène do pèri dèu do nga'a hela'u nga roo. Ta ngède ne j'èga wobèni na ène, kura pa d'ara ke roo, j'e pedai lii roo, mihe ane, “Hmm! Mobèni do minamii mèra, pehore ele èi loko wumèngi do rihi maha na nii! 5 Rihi ie ta pewie we ne èi wumèngi d'ee, j'e pepale ne doi do ae ne pa dèu do kehia-gahara! Rowi ne keb'ue èi wumèngi d'ee, hela'u nga gaji he dèu pa d'ara hewue tèu.”

6 Ta lii ke Yesus pa roo, “B'ole pehedue ri muu wobèni nad'ee! Hane we noo. Mengèlu d'ara Yaa ne tao noo, ri èla ke ri noo pe pehute ne èi wumèngi d'ee pa ngi'u Yaa. 7 Do kehia he, do era loro hela'u nga muu. Hiku, nara muu ta ped'elo ruba d'ara nga roo helod'o-helod'o. Tapulara Yaa, tui d'oke ne era hela'u nga muu.^c 8 Umu ke Yaa ta made. Èi wumèngi do pehute ri wobèni nad'ee pa ngi'u Yaa, hela'u le ke ta lua pemoke Yaa d'ai ne made, mii pemoko rape ta lebe pa ngi'u Yaa. 9 Henge pe'ie, oo! Pa mii we ne Lii Hag'a D'ara Deo ne pepeke pa hari hewue rai-wawa d'ee, do ta pedae lema ne woie wobèni nad'ee. Mij'i ta toi ri harièle dèu.”

10 Èla pe na ène, era he dèu ti do henguru do d'ue ana aj'a Yesus, ne ngara Juda Iskariot. Ta mèhu èni ke noo la kale ne mone ketèu pa kètu agama Jahudi he, mij'e ta la wie Yesus pa roo. Ta d'ai noo nga roo, ta pika ke ne lua dèka noo. 11 Rihi mengèlu d'ara roo, ta rènge ri roo ne lii pedai Juda. Ta pejaji ke roo, “Ki kewie ri èu Yesus pa j'ii, ta ma'e ma ri j'ii pa èu.” Ta mèhu èni ke Juda, j'e kale uku minamii ne j'ole Yesus pa roo.

12 Ne lod'o na ène, lèka pa lod'o petari ti lod'o nga'a-kewèhu unu do Jahudi. Hiku, pa lod'o na ène, patima roo ta wob'o roti dod'o pake ragi, nga tèb'u ki'i j'awa. Ta dèka ke ana aj'a Noo he la keb'ali pa Yesus, mihe ane, “Ama. Lod'o d'ee, lod'o nga'a-kewèhu Paska. Hiku, ne d'èi Ama, pa mii ke j'ii ne era pemoko ta nga'a-kewèhu Paska tuu dii?”

13 Ta pejuu ke ri Yesus do d'ue ana aj'a Noo, mihe ane, “Uru ko muu la d'ara kota. Pa nii, ta pehapo muu nga he dèu momone do nga hape èi pa d'ara guhi wo naiki. Pedute we noo ri muu. 14 La èmu na mii noo ne maho, pedute ri muu. Pika muu pa muri èmu nee, minahee: ‘Ama! Ama Guru unu j'ii ta ami era pa Ama, ta pake ta nga'a-kewèhu Paska nga ana aj'a Noo he.’ 15 Do ta peke ri noo hewue kama do bèla pa d'ida ène. Do èla ke pe pemoke ri noo ne kama ène. Hiku muu d'ue la pemoko nga'a we!”

16 Ta pekèd'i ke roo d'ue la d'ara kota. Pa nii, ta pehapo ke roo nga harièle lai do pedai Yesus. Ta la pemoko ke ri roo harièle, mij'e ta nara Yesus ta nga'a-kewèhu Paska pa ène. Ta la pedoa ke ri roo Yesus he.

17 Ta jèna lod'o, ta maho ke Yesus nga do henguru do d'ue ana aj'a Noo la nii.

18 Mejèd'i roo ta nga'a hela'u-la'u. Pa d'ara nga'a roo, ta lii ke Yesus, “D'èno ri muu, ee! He dèu ti telora muu do ta la pewie Yaa pa dèu do hewala.”^d

19 Ta rènge ne lii na ène, ta hedui pengee ke roo. He dèu-he dèu roo ne keb'ali pa Yesus, mihe ane, “Mage ta yaa, ne dèu do ane Ama nee?”

20 B'ale ri Yesus, “Dèu do pehèb'u roti la d'ara mago hela'u nga Yaa, noo ke, ne do ta pewie Yaa. 21 Henge, ee! Yaa d'ee, Dèu Rai-wawa do Petuu-Petuu, do ta made tèra pedutu do hure d'o b'uke. Jaga! Ne dèu do pewie Yaa d'ee, do ta hape ri noo ne hoe-ihilaka! Rihi ie noo ta b'ole metana ri ina noo!”

22 Pa d'ara nga'a roo, ta d'ede ke ri Yesus ne hewue roti, j'e peha'e lii ie ae pa Deo. J'e pipe ri Noo pemae ne roti nee, j'e j'ole pa ana aj'a Noo he. Ta lii ke Noo, “Ne roti nad'ee, ngi'u Yaa ke. Hème we, j'e nga'e.”

23 Èla pe na ène, ta èbe ke ri Noo ne galaa do ihe ri èi ago. Peha'e lema Noo lii ie ae pa Deo. Ta j'ole ri Noo ne galaa ne pa ana aj'a he, ta nginu. 24 Ta lii ke Noo, “Èi ago nad'ee, raa Yaa ke. Raa do d'ute ta wie helama pa dèu do ae. Raa nad'ee, jad'i hakahii ta do tobo ke ne lii jaji Deo. Hème we, j'e ngino.^e

25 D'èno pe'ie ko ri muu! J'ari mèd'a d'ee, ad'o ke Yaa do ta nginu wari èi ago. Hape la awe Ama Yaa mejèd'i ta pereda pa liru-bèla, j'e'itu ngino wari Yaa.”

26 Èla pe minahère, ta j'uka ke roo hewue lii lod'o ta pekelode ngara Deo. Ta mèhu èni ke roo mèd'a na ène la b'ojo Saitun.

27 Pa d'ara nga nèru roo, ta lii ke Yesus, mihe ane, “Mèd'a nèb'o, harièle muu do ta perai j'e hane Yaa. Ri do era ke do hure d'o b'uke, mihe ane,

28 Tèra do ta made Yaa. Tapulara do ta muri wari Yaa. Ki muri wari Yaa, do ta uru Yaa nga muu la propensi Galilea.”^g

29 Ta pelawa ke Petu, mihe ane, “Ama! Maji le harièle dèu ta perai, j'e hane Ama, tapulara ad'o yaa!”

30 Ta b'ale ke ri Yesus pa noo, “Petu! Henge ie, ee! Mèd'a d'e d'ènge, uru nga d'o d'ue awe manu ne tutu'oo, tèlu wari ke èu ne pehile Yaa.”

31 Ta perui èni ke Petu, j'e lii noo, mihe ane, “Ad'o, Ama, ee! Ki made Ama, ta made hela'u ke yaa, nga Ama. Perai d'oke yaa ti nga Ama, nga pehile d'o Ama ri yaa.”

Ihianga Petu he dèu-he dèu palii minahère lema.

32 Èla pe na ène, ta kako teruu ke Yesus he tade d'ai la hewue d'oka pa b'ojo Saitun, ne ngara ‘Getsemani’. Ta lii ke Yesus pa roo, mihe ane, “Mejèd'i ko muu ta mate Yaa pa d'ee. Ta la heb'aj'a pa nii ko Yaa.”

33 Ta pedoa ke, ta penau hela'u nga Noo, Petu, J'ako, nga Johani. J'ari ti awe na ène, noho ne ade-pengee Noo ketèna d'oke. 34 Ta pedai ke Noo, mihe ane, “D'ai hedui ne d'ara Yaa. Mii do ta hèpo hengaa ke. Mejèd'i ke muu ta jaga pa d'ee.”

35-36 Ta nèru ke Noo hudi, j'e lèku rutuu Noo pa wurai, j'e heb'aj'a, mihe ane, “Ama tana! Ki do mèd'i he pa d'ara Ama, b'ole made Yaa nga hape lua hedui-herui do minahee. Toi tèra ri Yaa, hari-hari lai do nara ta tao ri Ama. Kiri mèd'i he pa d'ara Ama hore we pej'èu, ne hedui-herui nad'ee ti Yaa. B'ole jad'i pedutu nga do d'èi Yaa, jad'i we pedutu nga lua d'èi Ama.”

37 Ta èla pe heb'aj'a, ta b'ale ke Noo nga do tèlu dèu ana aj'a Noo he, tapulara era do b'èj'i luu. Ta perei ke ri Noo, j'e lii Noo pa Petu, mihe ane, “He, Petu!^h Do luu ta bèj'i èu? He melila he we Yaa pa nii, taha le d'o ma hudi he muu ta jaga hela'u nga Yaa! 38 Lure ko peweo ne namada èu. Kèd'i, j'e jaga hela'u nga Yaa! D'èi tèra ne d'ara muu ta j'ège lai do ie, tapulara rui d'o ne ngi'u muu. Rihi ie muu ta heb'aj'a, ngita j'era d'o muu, ki lèka ri ruhèku.”

39 Ta b'ale rike Yesus la heb'aj'a. Ta ami wari ke Noo pa Deo, ta b'ole hane Noo pehape hedui-herui na ène. 40 Ta b'ale rike Noo nga ana aj'a Noo do tèlu dèu he. Era ke roo do luu ta bèj'i wari, ri rihi ke roo ne mengètu namada. Ta perei ke ri Noo, i'a d'oke roo ne b'ale lii Yesus.

41 Ta hani ke roo ri Yesus, j'e b'ale la heb'aj'a ketèlu wari. Èla pe heb'aj'a, ta b'ale ke Noo la perei ne ana aj'a Noo. Ane Noo, “He do bèj'i ko ma muu! Pengaha we ne b'èj'i. Kèd'i! Ne dèu do ta pewie Yaa, Dèu Rai-wawa do Petuu-petuu, hère ke. Awe nad'ee, ta ma kèpe ke Yaa ri roo, j'e la j'ole pa dèu do tao apa he. 42 Kèd'i we! Heleo muu la nii! Na hii ke ne dèu do ta pewie Yaa. Mai we dii la pehapo nga roo.”

43 Pa d'ara pedai lii Yesus, hèra d'ènge Juda nga dèu do rihi ae. Dèka roo nga pèru wela nga tubu, ta la kèpe Yesus. Dèka roo nga minahère, pedutu lii pereda mone ketèu pa kètu agama Jahudi he, guru agama he, nga dokepai-dokepai rae he. 44 Do pika uru ke J'uda pa roo, mihe ane, “Heleo pe'ie ri muu! Naduu do hengèd'o ri yaa, kèpe ri muu! Noo ke ne dèu do kale ri muu.”

45 Ta d'ai Juda la ène, mola noo nga Yesus, pelango ri noo, “Ama Guru!” Ked'ake ri noo, j'e hengèd'o. 46 Ta dèka ke ne dèu do ae he la kèpe Yesus.

47 He dèu ti dèu Yesus he ta rèda wela ke, j'e pare pehèpo ne wodilu he dèu. Ne dèu na ène, ènu ri kètu mone ae agama Jahudi. 48 Ta pedai ke Yesus nga dèu do la kèpe Noo he, mihe ane, “Minamii? Pengee ri muu, Yaa ne mone b'ani? Ku dèka muu ma kèpe Yaa nga wela nga tubu? 49 Helod'o-helod'o era ma Yaa nga muu pa Èmu Kepue Heb'aj'a pa Deo, b'ule d'o he dèu he do dèka la kèpe Yaa. Mai we, ma kèpe Yaa. Nad'ee, do lore do hure d'o b'uke ke.”ⁱ

50 Made ri meda'u ne ana aj'a Noo he. Ta hane ke Yesus, j'e perai roo.

51 Pa ène lema, era he dèu ana do ngèru, do pedute Yesus ti kej'unga. Era nga robo hij'i noo. Ta kèpe ke noo ri dèu he, 52 tapulara abo pa hij'i noo we. Pelai ti rihi meda'u, ta perai ke noo nga ihi wue, b'ule d'o nga b'ara pa ihi.

53 Èla pe na ène, ta èbe ke Yesus ri roo la èmu Kètu Mone Ae Agama Jahudi. Pa ène, era ke do peteni ne dokepai-dokepai he. Harièle mone ketèu pa kètu agama he, guru agama he, nga dokepai-dokepai rae.

54 Ta d'ai ne èbe ri roo Yesus, Petu lema do pedutu mena'o ti kej'unga, tade d'ai la èmu Kètu Mone Ae Agama Jahudi. Maho noo hape la d'ara rae nee, la mejèd'i hela'u nga dèu do jaga do menyiru ai pa ène.

55 Pa d'ara èmu d'ee, mone ketèu pa kètu agama he pedai lii nga dèu do majèd'i ta hèpo kewèlu agama he. Harièle roo kale hakahii ta pehale Yesus, ri d'èi ke roo ta wole pemade Noo. Tapulara nara d'o lai nengaa ta mii hakahii. 56 Ta pedoa ke ri roo ne dèu do ae, ta hakahii ta pebue Yesus. Tapulara ne lii lolo roo pe'abu d'o he dèu nga he dèu.

57 Era had'e ne hakahii do kèd'i ta titu ta ped'iri pote, mihe ane, 58 “Rèngi ri j'ii ne lii pedai dèu nad'ee, mihe ane, ‘Do ta pekelole ri Yaa ne Èmu Kepue Heb'aj'a pa Deo do j'ège ri ruai dèu rai-wawa. Èla pe tèlu lod'o, do ta pekèd'e wari ri Yaa ne Èmu na ène, nga dod'o pake ruai dèu rai-wawa.’”^j 59 Tapulara pe'abu d'o ne lii lolo roo he dèu nga he dèu.

60 Ta titu ke Kètu Mone Ae Agama Jahudi nee, pa hed'apa harièle dèu do mejèd'i pa ène. J'e keb'ali pa Yesus, mihe ane, “Ae ke dèu do kelaa pehed'apa nga Èu. Ta ngaa Èu ku pehèngo èni we?”

61 B'ale d'o ri Yesus he ub'a he. Ta keb'ali rike ne Kètu Mone Ae Agama Jahudi pa Noo, mihe ane, “Hèku ko Èu ta pika mola! Èu tèra ke nad'ee Kristus, Ana Deo do jaje rai uru nee?”

62 Ta b'ale ke ri Yesus, “Do petuu! Yaa ke nad'ee. Do ta ngède ri muu harièle ta Yaa, Dèu Rai-wawa do Petuu-Petuu, do mejèd'i pa liru-bèla pa ked'anga Deo. Rihi mone ae ne kuaha Noo! Do ta pèru pereda Yaa hela'u nga Noo. Èla pe na ène, do ta puru Yaa ti liru-bèla nga merèmu.”^k

63 Ta rènge ne lii b'ale Yesus do minahère, made ri bubu d'ara ne Kètu Mone Ae Agama Jahudi ène, tade hio ke ri noo ne b'aj'u do womerai do pake ri noo. Ta pekaa ke noo pika pa dèu lowe do mejèd'i pa ène, mihe ane, “Teo d'oke dii ta pake hakahii wari! 64 Rèngi ke ri wodilu muu miha, Noo ma do pika wari èni minahère. Èla ke Noo pepai èni ta Ana ri Deo. Lii Noo d'ee, ta pe'ape ngara Deo! Pedutu petèka agama dii, ki era dèu do pale wari èni ta hela'u nga Deo, dèu na ène ta pemade! Ku, minamii ne lai hèpo muu?”

Hèpo ri roo hari-hari, “Hala tèra ke dèu nad'ee! Hiku, ta wole made!”^l

65 Èla pe minahère, ta kèd'i ke do pèri dèu la hebue Yesus ri ilu. Wute ne namada Noo, j'e merèho. J'e lii roo, mihe ane, “Kiri Èu tèra ke mone ub'a Deo, hèku ko Èu ta pale ne ngara dèu do kud'e Èu!” Ta pereda ke roo pa dèu do jaga Èmu Kepue Heb'aj'a pa Deo, ta ma èbe Yesus. Ta èbe ke ri roo, j'e tèb'e b'ale-b'ale.

66-67 Pa awe do na ène, Petu do mejèd'i ta menyiru ai pa d'ara rae ène. Ta dèka ke he dèu wobèni, ènu ri Kètu Mone Ae Agama Jahudi, ngède noo ta menyiru ai. Pehod'e ri wobèni na ène, ne worèwu Petu, j'e kab'ali noo, “Ngine d'ee, èu era hela'u-la'u nga Yesus, do Nasare ène, we ad'o?”

68 Ta b'ale ke ri Petu, “Ad'o! Ta ngaa èu ku lii minahère! Tade d'o Noo ri yaa.” Èla pe na ène, ta kako ke Petu la titu pa toka rae nee. Pa d'ara awe na ène, ta tutu'oo ke ne manu.

69 Ta ngède rike Petu ri wobèni na ène. Ta pika ke noo pa harièle dèu do era pa ène, mihe ane, “Noo ke he dèu ti kejie Yesus!”

70 Ta pehihi èni ke Petu, j'e lii, mihe ane, “Ad'o èu ta wuj'u! Tade d'o ri yaa dèu na nii!”

Tui d'o, era ri he dèu do hewala pa ène, lii la Petu, mihe ane, “B'ole pote èu ta ad'o do hela'u nga dèu na nii! Muu he, do Galilea, to?”

71 Ta pelawa rike Petu, mihe ane, “B'ani yaa ta hupa! Tade d'o ri yaa dèu na nii!”

72 Tatuu ne lii pedai noo, ta tutu'oo ke ne manu ta d'ue awe. Ta henge ke ri Petu ne lii pedai Yesus ngine, mihe ane, “Uru nga d'o d'ue awe manu ne tutu'oo, tèlu wari ke èu ne pehile Yaa.”

D'ai ne henge ri noo ne lai na ène, ta tangi oga-oga ke Petu.