Yesus do muri wari!
(Mateo 28:1-8; Luka 24:1-12; Johani 20:1-10)
16
Bèli rai, hari èna, lod'o heb'aj'a do Jahudi. Ta èla pejèna lod'o, ta pekèd'i ke Maria ti rae Magdala, Maria do wala (do ina ri J'ako), nga Salome, la wèli èi loko wumèngi, do ta èbe roo bèli rai, la pihe ngi'u Yesus, pedutu had'a Jahudi.
Ma'u 16:1-21
2 Rai j'ami ae lod'o Migu, ta pekèd'i ke roo tèlu la rai dare Yesus. 3-4 Pa telora ruj'ara, ta pedai ke roo, mihe ane, “Weh! Naduu ke do ta ami ri dii, ta riho ne wowadu worena do henèb'e ub'a ro'a nee? Mèka d'o dii tèlu, ta riho ne wowadu ène!”
Ta d'ai roo la nii, ngède ri roo ne wowadu ne èla ke periho. 5 Ta maho ke roo la d'ara ro'a ène. Ta keb'èd'i ane ke roo, ri ngède ri roo he dèu do ngèru do mejèd'i pa heb'èka ked'anga roo, nga pake b'ara wo pudi kewa'a. 6 Ta lii ke ne do ngèru na ène pa roo, “B'ole meda'u muu! Toi ri yaa, ta muu he ma kale Yesus ti Nasare, do èla pe pemade ri roo pa aj'u ketoe. Pe'ee d'o pa d'ee, èla ke Noo pemuri wari. Mai ma heleo miha ri muu, ne era peb'èj'e ngi'u Noo. Pe'ee d'oke. 7 B'ale we muu mèriai! La pika pa Petu he, ta èla ke Yesus pemuri wari. Nèi ke Noo do uru la Galilea. Do ta pehapo muu nga Yesus pa nii, minamii ne lii pika uru Noo pa muu. Naa, b'ale we muu!”a
8 Ta d'ai ne ngède ri wobèni he, ta d'o pe'ee tèra ke ne ngi'u Yesus, ta hengodo ke roo. Ta perai ke roo la tele. B'ale roo mèri-mèriai. Pedai d'o roo pa naduu-naduu pa ruj'ara, ri rihi meda'u roo.
Yesus pehapo nga Maria ti Magdala b
(Mateo 28:9-10; Johani 20:11-18)
9 Rai j'ami ae lod'o Migu, Yesus pengèdi èni pa Maria ti Magdala, do ngèdi ta hud'i ti d'ara noo ri Yesus, pidu ngi'u wango. 10 Ta èla noo pe pengèdi nga Yesus, ta b'ale ke noo la pika pa harièle dèu do ngèdi ta pedute Yesus. Do pee ko roo pa d'ara pekupu, nga hedui pengee he, nga pewewi èi namada ta henge ne lua made Yesus. 11 Ta lii ke Maria pa roo, “Ta ngaa muu ku pee ko nga hedui? B'ole hedui ri ne pengee, èla ke Yesus pemuri wari! Do nad'ee kowe, pehapo ko nga yaa!”
Tapulara b'ale ri roo, mihe ane, “Weh! B'ole peluu j'ii ri èu!”
Yesus pengèdi èni rii pa do d'ue dèu
(Luka 24:13-35)
12 Èla pe na ène, era do d'ue ana aj'a Yesus do kako la hewue rae. Pa telora ruj'ara, ta dèka ke Yesus la pengèdi èni pa roo d'ue. Rowi do wala ke ne hia Noo, Hiku ue ta tui hudi ne tade ri roo. 13 Ta b'ale ke roo d'ue, la pika pa ihianga roo, “Weh! D'èno ko ri muu! Ngine d'ee, pehapo Yesus nga j'ii pa ruj'ara!”
Tapulara ne lii ihianga roo harièle, “Weh! B'ole peluu j'ii ri muu!”
Yesus pengèdi èni pa harièle ana aj'a Noo
(Mateo 28:16-20; Luka 24:36-49; Johani 20:19-23; Lii Ped'iri Dèu Pejuu Yesus he 1:6-8)
14 Èla pe na ène, pengèdi èni rike Yesus pa do henguru he dèu ana aj'a Noo, pa d'ara mejèd'i ta nga'a roo. Ta b'ani ke ri Noo, mihe ane, “Weh! Rihi kètu wowadu muu! Dèu ta pika pa muu, ta do ngède ke Yaa ri namada roo miha, parahaj'a d'o muu! Ane muu, ta peluu muu. Nad'ee, ne ke Yaa ma hed'apa muu. Èla tèra ke Yaa pemade, tapulara do nad'ee, ne ke Yaa do muri wari! Naa, heleo ri namada muu miha.
15 Hiku, nad'ee, kako we muu la èpa keb'ihu rai-wawa d'ee, la pepeke pa harièle dèu ne Lii Hag'a D'ara ngati Yaa.c 16 Naduu do parahaj'a nga Yaa, j'e do herani ke, do ta wie ri Deo ne helama pa noo, mij'e nara noo ta muri loro hela'u nga Deo pa liru-bèla. Tapulara naduu dod'o parahaj'a, do ta nara ruwolo noo, ta hane loro noo ri Deo pa tele. 17 Ne dèu do parahaj'a pa Yaa, do ta tao ri roo, ae kera'a rutada madalae, mij'e ta toi ri harièle dèu, ta kuaha do era pa roo dèka ngati Deo. Unupala he roo, do ta nara roo ta hud'i wango nga ngara Yaa. Do ta wie ri Deo, ta i'a pedai lii pedai do wala, dod'o toi ri roo. 18 Kiri ta hib'i ri dob'oho do nga raho, kiad'o lèka ta nginu raho roo, ihilaka d'o roo. Ki tèka roo wolaèba pa wukolo dèu do pèda, ta ie ma ne dèu ène.”
Yesus ta d'ede la liru-bèla
(Luka 24:50-53; Lii Ped'iri Dèu Pejuu Yesus he 1:9-11)
19 Ta èla Yesus pepedai lii nga ana aj'a Noo he, ta d'ede ke Noo ri Deo la liru-bèla. Pa nii, jad'i Noo ta ai d'anga Deo, mejèd'i Roo hela'u ta pereda.d
20 Ta èla pe minahère, ana aj'a Noo he, pedute ne lii pereda Noo. Pekèd'i roo la harièle keb'ihu rai la pepika Lii Hag'a D'ara ngati Yesus pa harièle dèu. Ta wie ke ri Deo pa roo, ne kuaha ta tao ae kera'a rutada madalae do èla pewie ri Yesus. Ae tèra ne dèu do parahaj'a pa Yesus, ri ne Lii Haga D'ara nad'ee, do petuu.
Ma'u 16:21-21
LUA HENÈB'E LII PED'IRI MA'U, PEDUTU DO HURE DO B'UKE DO WALA e
9 Ta d'ai ne do tèlu wobèni he ta pe'abu nga Petu he, ta ped'iri ke roo harièle j'ara lua do ngèru do pedai lii nga roo pa rai dare ne ngine. 10 Moko ke Yesus miha pereda pa ana aj'a Noo he, lita kako la pepeke ne Lii Hag'a D'ara ti Noo la hari-hari era, hape la èpa keb'ihu rai-wawa. Lii Hag'a D'ara nad'ee, do pika ruj'ara ta Deo do ta wie helama pa harièle dèu ti hala-ludu roo, mij'e ta nara roo ta muri-mada peloro nga Noo.
Lii Hag'a D'ara nad'ee, do petuu tèra. Ri do minahère ke, ku pee noo ta era loro, hape la lod'o na mii-mii.