2 Ta b'ale ke ri Yesus, “Petuu! D'ai gaa tèra ma ne Èmu nad'ee! Tui d'oke, j'e pekelole ne Èmu d'ee, pemenyèla ne wowadu he.”

3 Ta kako ke Yesus he la b'ojo Saitun, j'e mejèd'i pa era do pehed'apa nga Èmu Kepue Heb'aj'a pa Deo. Ta dèka ke do èpa dèu ana aj'a Noo la pedai nga Noo miha: Petu, J'ako, Johani, nga Anderia. 4 Ta keb'ali ke roo, mihe ane, “Ama! Peteleo ri ko ri Ama ne lii pedai do ngine nee. Pèri ke ne jad'i lai na ène? J'e minamii ne telia he?”

5 Ta b'ale ke ri Yesus pa roo, mihe ane, “Had'i ta jaga ie muu! B'ole luu muu. 6 Ae hine ne dèu do ta dèka nga tèb'a kodo, j'e lii, mihe ane, ‘Yaa ke nad'ee, Kristus, do jaje ri Deo rai uru he.’ Ae ne dèu do luu ri roo. 7 Kiri ngèdi muu dèu do pemuhu, ki rèngi lii ped'iri ta do era muhu pa mii-pa mii, b'ole keba'a ne pengee muu. Ne lai do minahère do ta jad'i uru, tapulara d'ai ded'o ne awe pedèka rai-wawa d'ee. 8 Do ta pemuhu kejie dèu nga kejie dèu. Pemuhu hewue rai nga hewue rai. Era d'ai ie pa mii-pa mii. Do ta era ne awe rihi menganga rai pa mii-pa mii. Harièle telia nahère, hela'u mii hedui mii wobèni do ta metana ana.

9 Hiku, jaga ie we muu! Do ta dèka roo ma kèpa muu, j'e nuni muu la hed'apa do hèpo kewèlu agama. Wuhu-d'aba muu ri dèu pa d'ara èmu heb'aj'a he. Uj'u ai muu, j'e ègu la hed'apa do pereda, pelai ti pedute Yaa. Awe tuu muu ta ped'ire j'ara lua Yaa pa roo. 10 Ne dèu unu Deo he ta la pika uru ko ne Lii Hag'a D'ara j'ara lua Yaa pa hari-hari kejie dèu pa harièle keb'ihu rai-wawa, j'e'itu d'ai lalod'o pedèka rai-wawa. 11 Henge ie, oo! Kiri uj'u ne ai muu j'e pera'u la hed'apa dèu do hèpo kewèlu, b'ole meda'u muu, j'e pengee, ‘Ta nengaa do ta pedai ri yaa pa nii?’ j'e, ‘Minamii ke ne lii b'ale yaa?’ Kiri d'ai ne awe na ène, palii we muu pedutu nengaa do palii Hengaa Megala Deo pa muu pa awe na ène.^a

12 Pa d'ara hewue èmu, kiri era dèu do parahaj'a pa Yaa, tuèhu noo miha ta kale ruj'ara ta pemade noo. Kiri ana ne do parahaj'a, ama noo miha do ta pemade noo. Kiri ina-ama noo do parahaj'a pa Yaa, ana roo do ta pemade roo. 13 Hiku, dèu do ta bubu made nga muu, pelai ti parahaj'a nga Yaa. Tapulara naduu do mèka wènge tade pedèka, do ta wie ne helama pa noo ri Deo.”^b

14 Ta pedai teruu rike Yesus, mihe ane, “Do ta dèka he dèu do rihi tao apa. Maho noo la titu pa era do mèu do megala pa d'ara Èmu Kepue Heb'aj'a pa Deo, dod'o jèma tuu noo pa ène, ta pera'e ne era na ène. Ri minahère ke, ta b'ale kej'unga ke Deo nga era na ène. Kiri nga ngèdi ri muu ne lai do minahère, jaga ie muu! (Naduu do aj'e ne lii nad'ee, jaga ie lema). Lai jad'i do minahère he èhi rutada, ne lod'o apa-kerewe nee, pa kelae ke. Kiri ngèdi ne lai do minahère, dèu do pee pa propensi Yudea, kèd'i j'e perai la lede la boj'o.^c 15 Mèriai roo ne perai, mij'e ta d'o abu roo ihilaka. Ki era do mèhu èni ti d'ara èmu, b'ole b'ale rii la èba b'ara nengaa we. 16 Dèu do era pa d'oka, b'ole b'ale rii la èmu la èba hij'i. Perai teruu we!^d 17 Ne do rihi hedui, wobèni do tèni ae, nga rena iki ana. Rowi laha d'o roo ne perai. 18 Rihi ie muu ta heb'aj'a, mij'e dod'o jad'i ne lai na ène pa awe èj'i liru. 19 Ri ne awe na ène, d'ai tèra ne hedui! Rai pe'era ri Deo rai-wawa d'ee, tade awe nad'ee ngèdi ded'o dèu ta lake ne lai hedui-herui do minahère. Èla pe na ène, b'ule d'o ke ne lai hedui-herui do minahère do ta lake wari ri dèu.^e 20 Ki d'o pehe'ète ke ri Deo ne awe hedui do minahère, b'ule d'oke he dèu he do nara ta muri-mada. Tapulara, pelai ti rihi d'èi Deo nga dèu do èla pepili ri Noo he, ri minahère ke ku pehe'ète ri Noo ne lai hedui-herui na ène.

21 Ki d'ai la lod'o-lod'o do minahère, rèngi ri muu ne lii pedai dèu, mihe ane, ‘Heleo we! Kristus ne pa d'ee!’ Lii had'e, ‘Kristus nèi pa nii!’ B'ole d'èno muu! 22 Era dèu do dèka, nga tèba kodo, nga lii, ‘Yaa ke nad'ee, Kristus!’ Era lema do lii, ‘Yaa ke nad'ee, dèu ub'a ngati Deo.’ Ae ne madalae do ta tao ri roo pake kuaha wango ta peluu dèu. La hèku-hèku ri roo ta peluu ne dèu Deo. 23 Jaga-meniga ie muu! Uru nga dod'o dèka dae ne awe hedui-herui nee, èla ke muu pe pehewina uru ri Yaa.”

24 Ta pedai teruu ke Yesus nga ana aj'a Noo, mihe ane, “Kiri moko ne awe hedui-herui nee,

26 Èla pe minahère, j'e'itu ngède ri dèu, ta Yaa d'ee, Dèu Rai-wawa do Petuu-Petuu. Do ta puru Yaa pa d'ara merèmu ti liru-bèla. Do ta ngède ri harièle dèu ne kuaha nga mèu-megala Yaa!^h 27 Do ta pereda ri Yaa pa dèu pejuu Deo pa liru-bèla, ta la pekupu harièle dèu do èla pepili ri Yaa, ti èpa keb'ihu rai-wawa.”

28 Ta pedai teruu ke Yesus, mihe ane, “Èbe ri Yaa ne lii pehèku pa aj'u do muri. Kiri lara ke ne rèu, rutada hedèka ke wèru wadu.

29 Minahère lema, kiri ngèdi ke ri muu ne lod'o hedui-herui do dèka nee, mii do èla pepika ri Yaa pa muu ngine, rutada ta ne awe dèka Yaa umu ke. 30 D'èno pe woie! Ti harièle dèu do muri-mada pa awe nad'ee, era ko dod'o made, pa awe dèka ne lod'o hedui-herui ène. 31 Maji liru-bèla nga rai-wawa ta ele ta mèra, tapulara lii pedai Yaa nad'ee, peloro hape la lod'o namii-mii.”

32 Ta pedai rike Yesus, mihe ane, “B'ule d'o he dèu he do toi ne lod'o nga jaa dèka wari Yaa. Dèu-dèu pejuu Deo pa liru-bèla lema, toi d'o. Ri Yaa le miha, toi d'o. Tituwata Ama Yaa we, ne do toi.ⁱ 33 Ri minahère ke, jaga ie muu, ri dod'o toi ri muu pèri ne awe dèka Yaa.

34 Tui d'o ke ne awe, j'e lènga Yaa ti telora muu, do ta dèka ri ma Yaa wari. Mii dèu do lènga ti èmu, la rai do j'èu. Pereda ri noo pa dèu pee nga noo, lita pemoke pe'ie ne èmu-kemali noo. Peb'age roo ne j'èga he dèu-he dèu. Tèka lii noo pa mone jaga toka, ta jaga-meniga pe'ie, tade b'ale noo.^j 35 Jaga muu nimèd'a-nilod'o, ri dod'o toi ri muu pèri ne awe dèka do muri èmu nee. B'ale mèd'a lod'o we, telora mèd'a we, nilod'o we, awe hèu lod'o we, toi d'o ri muu ta pèri ne awe. 36 Ngita dèka noo nga hewèka, j'e abu muu nga b'èj'i pegoo-koko.

37 Hiku, minamii ne lii pedai Yaa pa muu, do ta pedai lema Yaa nga dèu do hewala he, lii ta, ‘Jaga pe'ie muu, ta mate ne lod'o dèka Yaa.’”

(Minahère we, ne lii pedai Yesus nga ana aj'a Noo pa b'ojo Saitun.)