2 Nga lii, mihe ane, “Kako uru ko muu la rae na nii. D'ai muu ne maho la d'ara rae nee, do tangède ri muu he ngi'u ana keledei do 'èke. Ad'o dae do ngèdi ta menya'e ri dèu. Ma'e ri muu j'e pera'o ma d'ee. 3 Kiri era dèu do keb'ali pa muu, ‘Pera'o ta ngaa ri muu ana keledei nee?’ Pika ri muu, ‘Ta paraluu Muri dii. Kiri moko ne pake, ta peb'ale d'ènge ma.’”

4 Ta pekèd'i ke roo d'ue la nii. Era tèra ke, ne ana keledei ne do 'èke pa hed'apa èmu pa ngidi ruj'ara. Ta ma'e ri roo, j'e pera'o. 5 Ta keb'ali ke ne dèu do titu pa ène, mihe ane, “Ta ngaa! Ku pera'o ri muu ne ana keledei ne?”

6 Ta b'ale ke ri roo, mihe ane, “Ta paraluu Muri dii. Kiri moko ne pake, do ta peb'ale d'ènge ma ri j'ii ma d'ee.” Ta hani ke ri dèu he, ta pera'o ri roo ne ana keledei nee. 7 Ta pera'o ke ri roo la wie pa Yesus. Ta wèle ke ri roo ri hij'i pa dèni ana keledei nee, j'e j'ole pa Yesus ta menya'e.

8 Ta d'ai roo ta umu d'ara kota, hèga ne dèu he la wèla ne b'ara pake roo pa d'ara ruj'ara. Era lema had'e do la para ruaj'u do mii runyiu he^b pa ngidi ruj'ara, j'e la wèla pa ruj'ara, do ta lake ri Yesus. Ne tao roo minahère, he èhi pekeb'ue Yesus ta mihe dèu duae. 9 Era had'e do pe'uru èni nga Yesus, era had'e do lere Yesus. Ta hod'a-kej'eka ke roo, mihe ane,

11 Ta d'ai Yesus he la d'ara kota, ta maho ke roo la keb'èla rae Èmu Kepue Heb'aj'a pa Deo. Pereha ri Noo hari hewue ne d'ara keb'èla rae Èmu Heb'aj'a nee. Tapulara ri umu ke ta jèna lod'o, nara d'o ke roo tatao nengaa wari pa ène, ta b'ale ke roo la rae Betania.

12 Ta j'èmi ae do b'èli rai nee, ta pekèd'i ke roo ti Betania b'ale la kota Yerusalem. Pa telora ruj'ara, ta menganga ke Yesus. 13 Ta ngède ke ri Noo he kepue aj'u pa ngidi ruj'ara. Do tima tanga'e ri dèu ne wue noo.^e Ta kako ke Yesus la pe'umu-èni, la heleo ngee ta do era nga wue. Ta d'ai Noo la kepue aj'u nee, heleo ri Noo b'ule d'o nga wue, rèu ne we do bibu. Pa d'ara awe do na ène, ad'o tèra ma do awe wue. 14 Ta lii ke Yesus pa aj'u na ène, “Pelai ti dod'o b'ule èu nga wue tu Yaa, j'ari ngati awe nad'ee, b'ole era wari èu nga wue ta wie pa dèu do hewala!”

Rèngi lema ri ana aj'a Noo ne hekoto lii pedai Yesus pa aj'u nee.

15 Ta èla pe minahère ta nèru ke roo teruu la Yerusalem. Maho ke Yesus la d'ara Èmu Kepue Heb'aj'a pa Deo. Pa keb'èla rae Èmu Heb'aj'a na ène, do tao mii paha he ri dèu ta pewie koro j'awa, ta b'ara j'ola wie Deo. Ta ngèdi ri Noo minahère ta hud'i la tele ke ri Noo. Nyèka ri Noo pekeb'èla ne meja-meja pehuru doi, lema b'agu-b'agu ihi d'aga koro j'awa he.

16 Lara ri Noo harièle dèu, ta b'ole lake nga èba nengaa we, j'ara d'ara rae Èmu Heb'aj'a ène. 17 Aj'a ri Noo dèu, ane Noo, “Do toi ke ri muu, nengaa ne do hure do b'uke, mihe ane, ‘Ne pe'era ri Yaa ne Èmu nad'ee, tuu harièle kejie dèu, ta maa heb'aj'a pa d'ee.’ Tapulara lare ri muu ne Èmu na ène, ta era pekupu do peraba dèu!”^f

18 Ta rèngi ri mone ketèu pa kètu agama he nga guru agama he ne lii pedai j'ara lua tao Yesus do minahère, bubu d'ara tèra roo. Moko ke roo ta kale ruj'ara ta pemade Noo. Tapulara meg'ig'i roo, ri ae tèra ke ne dèu do d'èi nga lii aj'a Noo.

19 Ta umu ta jèna lod'o, ta pekèd'i ke roo ti kota Yerusalem, la bèj'i la Betania.

20-21 Ta j'èmi ae do b'èli rai ène, ta b'ale rike roo la Yerusalem. D'ai le telora ruj'ara, ta lake ke roo j'ara aj'u do mid'a nee, do pedai lii Yesus nga noo nee. Ta ngède ne aj'u na ène, ta madalae ke ne ana aj'a Noo he harièle, ri made ke hari nga amo nee, ne aj'u na ène. Ta henge ke ri Petu ne lii pedai Yesus pa aj'u na ène. Ta lii ke noo, “Ama! Heleo ko ri Ama ne aj'u do mid'a nee, do mengao ri Ama nee, made ke!”

22 Ta b'ale ke ri Yesus, “Do tèra! Had'i ta parahaj'a lema muu pa Deo minahère. 23 Kiri parahaj'a tèra muu, nara lema muu ta lii pa hewue lede, ta b'ita èni j'e lari èni la d'ara dahi ae. Do ta lare ma ri Deo ne lede na ène, ki parahaj'a muu nga petuu. Parahaj'a we muu nga ketèra pa Deo.^g 24 Naa, b'ole bèlu, oo! Had'i ta parahaj'a tèra muu ta Deo do nara ta wie nengaa we ne do ami muu, do ta wie tèra ma ri Deo pa muu! 25 Tapulara ki heb'aj'a muu, j'e era nga pengee do apa nga dèu do wala, la pe'ie uru ko nga dèu na ène. Minahère lema Ama muu pa liru-bèla do ta lonye-pemèu uru lema ne hala muu. 26 [Kiri era do petèka pengee do apa, nga d'o wae ta pehuba hala dèu do wala, tatu Ama muu pa liru-bèla bèlu le d'o maa ne hala-ludu muu.”]^{h i}

27 Ta nèru teruu ke roo. Ta d'ai le Yerusalem, ta maho ke roo la d'ara Èmu Kepue Heb'aj'a pa Deo. Ta d'ai roo la d'ara rae nee, ta dèka ke ne mone ketèu pa kètu agama he nga guru agama he. 28 Ta keb'ali ke roo pa Yesus, “Naduu do pepue Èu ma tao kenya'u pa d'ee mid'a d'ee? Naduu ne do wie higa pa Èu?”

29 Do toi ri Yesus ne lua pedèb'o roo ta kale ruj'ara ta pebue Noo. Ta b'ale ri Yesus pa roo, “Ta keb'ali lema Yaa pa muu. B'ale uru ri muu ne lii keb'ali Yaa, j'e'itu wie muu ri Yaa ne lii b'ale! 30 Ne lii keb'ali Yaa minahee: tade ri muu Johani, mone peherani dèu. Naduu do pejue noo la peherani dèu? Deo, we dèu rai-wawa?”

31 Ta pengee b'ale-b'ale ke ri roo, j'e pelii roo, “Wee! Apa ke dii! Ki b'ale ri dii, ‘ta pereda ri Deo’, lii Noo nèb'o, ‘kiri minahère ta ngaa muu ne d'o parahaj'a pa Johani!’ 32 Jad'i d'o ke dii ta lii ‘ta ti dèu rai-wawa’. Ta kenya'u ke dèu lowe he nga dii. Ri do parahaj'a tèra ke roo, ta Johani, mone ub'a ngati Deo.”

33 Ta lii ke roo pa Yesus, mihe ane, “Toi do ri j'ii!”

Moko ta lii ke Yesus pa roo, “Kiri minahère, wae led'o ma Yaa ta b'ale ne lii keb'ali muu, ta naduu ne do wie higa pa Yaa.”