Yesus penga'a do èpa tèb'a dèu
(Mateo 15:32-39)
8
1-3 He wari, ae ne dèu do peteni la d'èno ne lii aj'a Yesus. Tèlu lod'o ke roo ne pedute Noo, Hiku b'ule d'oke roo nga nga'a-nginu. Ta pedoa ke ri Yesus ne ana aj'a Noo, j'e lii, “Ruba d'ara ke Yaa nga dèu do lowe he. Era do dèka ngati rae do j'èu, j'e tèlu lod'o lema ke roo ne pedutu, tade ta èla ke ne nga'a unu roo. J'e ma d'oke ta peb'ale roo nga d'èlu wue. Ngee ta melanu pa telora ruj'ara.”
Ma'u 8:1-21
4 Ta b'ale ke ri ana aj'a Noo, mihe ane, “Wo Ama. Ne era na ène j'èu ti rae-kowa. Hiku nara d'o dii ta penga'a dèu do minahee ne ae!”
5 Ta keb'ali ke Yesus pa roo, mihe ane, “Henga ne roti do era pa muu?”
Ta b'ale ke ri roo, mihe ane, “He pidu b'ue roti we.”
6 Ta lii ke Yesus pa dèu lowe he, ta mejèd'i pa wurai. Èla pe minahère, ta èba ke ri Noo ne roti do pidu b'ue he, j'e heb'aj'a ta peha'e lii ie ae pa Deo. Ta pipe ke ri Noo ne roti he, j'e wie pa ana aj'a Noo he. J'e la peb'agi pa dèu lowe he. 7 Nara lema roo pèri ngi'u nadu'u. Hebaj'a wari Yesus ta ami terima kasi pa Deo tuu nadu'u he. Ta lii ke pa ana aj'a Noo, ta la peb'agi pa dèu lowe he. 8-9 Era ma roo harièle do èpa tèb'a dèu. Nga'a roo tade b'èhu. Ta èla roo pe nga'a, ta pekupu ke ri ana aj'a Noo, ne do rihi he, tobo pidu hope worena. Ta lii ke Yesus pa roo ta b'ale. 10 Ta ludu roo, ta ha'e ke Yesus nga ana aj'a Noo la d'ara kowa, j'e pekèd'i la hewue era, ne ngara noo Dalmanuta.
Do Parisi kale lai ta pebue Yesus
(Mateo 16:1-4)
11 Minahère Yesus he ne puru pa Dalmanuta, dèka ke do pèri dèu ti kejie Parisi la pehapo nga Noo. Ne dèka roo ta la pekerèi-keb'ali nga Yesus ta kale lai ta hie Noo. Ta ami roo pa Noo, mihe ane, “Ama! Ped'elo ko pa j'ii ne lai madalae ta he èhi rutada, ta kuaha do era pa Èu, ngati Deo.”a
12 Ta hèpi hengaa ke Yesus pemèdu, j'e lii pa roo, “Menyaha Yaa ne rèngi lii ami muu, ee. Ta ngaa ke muu ne ami rutada madalae? B'ole minahère. Era ma pa Yaa ne lua madalae nee, tapulara pengède d'o pa muu.”b
13 Ta hani ke roo ri Yesus, j'e ha'e b'ale la d'ara kowa nga ana aj'a Noo he. J'e pekèd'i roo la heb'èka èi lobo.
Yesus lii ta jaga-meniga ti lai apa do Parisi
(Mateo 16:5-12)
14 Ta d'ai Yesus he la telora èi lobo, ta henge ri ana aj'a Noo he, taa d'o do èba nga'a-nginu. Hewue we ne roti èba roo. 15 Ta rèngi roo nga pedai roti, ta lii ke Yesus, “Meniga pe woie muu! B'ole luu muu ri lai apa do dèka ti duae Herode nga do Parisi he. Ne lai apa roo do j'ala mii ragi do pekiwu pa terigu ta peha'e roti.”c
16 Ta rènge ne lii pedai Noo minahère, b'ingu ana aj'a Noo. Ta pedai ke roo, mihe ane, “Tada d'o dii lii pedai Noo ne! Maga-maga dii ta d'o èba roti ku pedai Noo minahii.”
17 Toi ri Yesus ne lua pengee roo. Ta lii ke Noo, mihe ane, “Ta ngaa muu Hiku pedai j'ara dod'o b'ule nga èba roti? Tada ded'o muu ne pedèb'o lii Yaa? D'ai rèpo ne kewadu kètu muu! 18 Ngèdi ke ri namada muu miha, tapulara pee ma muu nga d'o tada. Mii do b'èdu he muu. Rèngi ke ri wodilu muu miha, tapulara pee ma muu nga d'o tada nengaa-ngaa. Mii do hoe he muu. Bèlu ke muud 19 ne roti do lèmi b'ue do pipe ri Yaa, j'e penga'a do lèmi tèb'a dèu he? Pekupu ri muu do hewari nee, ne do rihi pèri hope?”
B'ale ri roo, “Henguru d'ue hope.”
20 Keb'ali wari Yesus, “Hewina ko ri muu ne roti do pidu b'ue do pipe ri Yaa, j'e penga'a do èpa tèb'a dèu he? Pekupu ri muu do rihi pèri hope?”
B'ale ri roo, “Pidu hope worena, Ama ee.”
21 Ane Yesus, “Do petuu! Ngèdi ke ri namada muu miha, tapulara ta ngaa muu ku pee nga d'o tada, ta dèka ti mii ne kuaha do pa Yaa?”
Yesus pe'ie do b'èdu pa Batsaida
22 Ta d'ai rike Yesus nga ana aj'a Noo la rae Betsaida. Ta dèka ke ne dèu nga ègo he dèu do b'èdu nga Yesus. Ne ami roo pa Yesus, mij'e ta pe'ie ne namada dèu na ène.
Ma'u 8:22-38
23 Ta pera'o ke ri Yesus ne do b'èdu ne la tele rae. Ta hebue ke ne ilu Noo pa namada dèu na ène, j'e b'uje ri Noo. Keb'ali Noo, mihe ane, “Minamii? Ngèdi ke èu?”
24 Ta d'ede ke ne tangamada noo, j'e heleo ke la keriu-keg'ana, ta b'ale ke ri noo, “Wa! Ngèdi ke yaa dèu do kako. Tapulara era mii aj'u do kako!”
25 Ta tèke rike ne wolaèba Yesus pa namada dèu nee. Ta hèku rike noo ta heleo, ngèdi woie ke. 26 Ta pejue ke noo ri Yesus ta b'ale la èmu, j'e tèka lii, mihe ane, “B'ale we èu lake ruj'ara do wala! B'ole lake ri j'ara Betsaida.”
Lua ketèra Petu ta Yesus nee, Kristus, do pej'uj'e ri Deo rai uru
(Mateo 16:13-20; Luka 9:18-21)
27 Èla pe na ène, ta nèru ke Yesus nga ana aj'a Noo he la rae-kowa pa Kaisarea-Filipi. Pa telora ruj'ara, ta keb'ali ke Yesus pa roo, mihe ane, “Pedutu nga lii pedai dèu, naduu ke Yaa nad'ee?”
28 Ane roo, mihe ane, “Era do lii, ta ‘Johani, mone peherani dèu’. Era do lii ta ‘Elia’, mone ub'a Deo do uru he. Era lema do lii, ta hala he dèu ngati mone ub'a Deo do wala he pa awe do uru.”e
29 Ta keb'ali rike Yesus pa roo, “Pedutu tade ri muu miha, naduu ke Yaa nad'ee?”
Ta b'ale ke ri Petu, mihe ane, “Èu ke Kristus! Do èla pe pej'uj'e ri Deo rai uru.”f
30 Ta lara ke ri Yesus, ta “B'ole pedai nga naduu-naduu!”
Yesus ped'iri d'ènge j'ara lua hedui nga made Noo
(Mateo 16:21-28; Luka 9:22-27)
31 Ta j'ari ke Yesus ta pika pa ana aj'a Noo, mihe ane, “Yaa d'ee, Dèu Rai-wawa do Petuu-Petuu. Hine do ta lake ri Yaa ae lua hedui, ri do ta nyèke Yaa ri dokepai rae he, ketèu ngati kètu agama he, nga guru agama he. Do ta pemade Yaa ri roo, tapulara muri wari Yaa nèli.” 32 Ta rèngi ne lii pika Yesus, ta la pera'o ke Yesus ri Petu la keraha. J'e tèka lii noo, mihe ane, “B'ole pedai minahère, Ama ee! Wie d'o ri yaa ta d'ai ai roo pa Ama!”
33 Tapulara ne lii pedai Petu ad'o do hela'u nga d'èi Deo. Ta b'ale hed'apa ke Yesus nga ana aj'a do wala he. J'e j'ege ri Noo Petu, “Lii pedai kètu wango he na ène! Lènga ti d'ee! Ad'o èu do pengee ne lua do d'èi Deo, pengee ne lua do d'èi dèu rai-wawa we!”
34 Ta pedoa ke ri Yesus ne dèu lowe he la pe'obo nga ana aj'a Noo he. J'e aj'a roo ri Noo, “Naduu do d'èi ta pedute Yaa, mèka tee noo ta pedute helod'o-helod'o. Hore ne lua do d'èi miha, j'e pedute ne lua do d'èi Deo we. Maji lema ta era dèu do ta pemade noo, pee ma nga pedutu teruu, mii dèu do nga hape aj'u ketoe ta la pemade.g 35 Dèu do d'èi ta muri-mada tuu ngi'u miha, do ta ele ne muri-mada noo nga minahère we! Tapulara naduu do moko ta la made taga pedute Yaa, nga pepeke ne ruj'ara muri-mada do d'èi Deo, do ta muri loro noo hela'u nga Deo.h 36 D'èno we! Kiri bab'o ri èu harièle ihi hewue rai-wawa d'ee, tapulara nyèke èu ri Deo, ngaa ne nara èu? 37 Maji lema ta èbe ri èu hari ihi hewue rai-wawa nad'ee, nara d'o ta pehure nga muri-mada do peloro nga Deo!
38 Henge ie ri muu! Dèu rai-wawa pa d'ara awe nad'ee, muri-mada pa d'ara ae kera'a apa-kerewe. Ped'uli d'o ke roo ta pedute Deo. naduu do mekae d'ara ta pedute Yaa, ki ad'o mekae d'ara ta pèro lii pedai Yaa, mekae d'ara lema Yaa ta hème noo pa hed'apa Deo. Rowi Yaa, Dèu Rai-wawa do Petuu-Petuu nad'ee, hine do ta dèka wari ti liru-bèla. Nga dèu pejuu Deo he, dèka hela'u nga Yaa. Ne puru j'ii ti liru-bèla nga kuaha Deo do mèu-megala, itu toi Yaa ri dèu, naduu Yaa nad'ee.