2-6 Pa ène, era he dèu momone do maho ri wango tade wuj'u. Ne era pee noo pa rai dare-rai dare. Mèd'a-nilod'o noo pekemale èni nga d'o b'ule b'ara pa ihi, pa kolo-kolo b'ojo pa ène, j'e pekaa-pekèra. Lema dede-wuhe ne ngi'u noo miha ri wowadu tade no'e. D'ai tèra noo ne rui, Hiku b'ule d'o he dèu he do nara ta 'èke noo, maji lema ri rate b'èhi. J'aj'i wari ke ne uj'e ne kae-nga'a nga kae-j'èla noo. Tapulara pehèpo ne rate ri noo, lema pepade ri noo ne tuki b'èhi do pa b'eb'o noo.

Minahère Yesus he ne puru ngati d'ara kowa, ta ngèdi ke roo ngati j'èu rowi do wuj'u na ène. Ta mèhu èni ke noo ti rai dare-rai dare nee, j'e perai la lèku rutuu pa hed'apa Yesus. 7-8 Minahère Yesus ne pehapo tangamada nga dèu na ène, ta lii ke Noo, “Wango apa! Mèhu èni ti d'ara dèu nad'ee!”

Ta pekaa ke ne dèu ne pemèdu-mèdu, “Ne dèka Èu nad'ee, ta ma tao ngaa ke pa yaa? Tade ma Èu ri yaa, ta Èu ke Yesus, Ana Deo do wiki higa nga kuaha. Ne huba yaa, b'ole ma wole yaa ri Èu!”

9 Ta keb'ali ke Yesus pa noo, “Naduu ne ngara èu?”

Ta b'ale ke ri noo, “Ngara yaa Legion, rowi j'ii na he do rihi ae, mii tèb'a dèu horod'ad'u he!”

10 Ta pedide ke noo ri wango do pa d'ara noo he, mij'e ta ami pa Yesus ta b'ole hud'i roo ngati era na ène!

11 J'èu d'o ti ène, era ke ne dèu do nga b'ata wawi do rihi ae. Era ma d'ue tèb'a ngi'u he. Ne wawi nahère pa d'ara nga kale nga'a pa keraha lede. 12 Ta ami ke ne wango he pa Yesus, “Pejuu we j'ii ta maho la d'ara wawi na hii.”

13 Ta rèngi ne lii ami roo, ta wae ke Yesus. Moko ne wango he ta mèhu èni ti dèu na ène, j'e maho la d'ara wawi do nahère. Ta wuj'u ke ne wawi he j'e perai peb'igo-gale ti keraha lede nee, j'e maho la d'ara èi lobo, moko ta made bolo èi harièle.

14 Ta ngède ne lai na ène, d'ai meda'u ke hari-hari ne dèu do b'ata wawi he. Ta perai ke roo la pepika pa d'ara rae d'ara kowa pa ène, j'ara lai do èla pejad'i, do lake ri roo. Ta dèka ke ne dèu do lowe he la heleo nengaa ne do èla pejad'i. 15 Ta kako ke roo la pehapo nga Yesus, era ke ne do wuj'u ne do mejèd'i pa ène. Do nga b'ara pa ihi ke, j'e do mèu d'ara ke noo. Ta ngède minahère, muri ne lua meda'u roo harièle, ri toi ke ri roo naduu ne do nara ta hud'i wango ti dèu do wuj'u nee, tèra-tèra ne mone ae kuaha Noo. 16 Ta ped'iri ke roo he dèu nga he dèu nengaa ne do èla pe ngèdi ri namada roo miha, j'ara lua dèu do èla pe'ie ngati wuj'u nee, nga j'ara lua wawi do made bolo èi he. 17 Ta dèka ke ne dèu-dèu ti rae-rae pa ène la ami pa Yesus ta pekèd'e ti rai roo.

18 Ta d'ai Yesus ne ha'e la d'ara kowa, moko ne dèu do ie ngati wuj'u nee, ta ami pa Yesus mij'e ta pedutu roo lema.

19 Tapulara wae d'o Yesus. J'e lii Noo, mihe ane, “B'ale we èu la ped'iri pa a'a-ari èu harièle, nengaa ne do èla petao ri Deo tuu èu. Lema minamii ne mone ae ruba Deo pa èu.”

20 Ta b'ale ke noo, j'e la pedai-pepika la rai henguru b'ue kota, do tima lema ta pale ‘Dekapolis’. Pa rai nahère, ta pepika ke ri noo minamii ne ruba Deo do tao ri Yesus pa ngi'u noo. Ta madalae ke harièle dèu do rènge lai na ène.

21 Ta ha'e kowa rike Yesus nga ana aj'a Noo, j'e b'ale la heb'èka èi lobo nee. Ta d'ai roo ta puru ti d'ara kowa nee, ta dèka ke ne dèu lowe he la pewore Noo.

22 Pa ène, era he dèu ne ngara noo Yairu. Noo, he dèu kètu èmu heb'aj'a pa rae na ène. Ta d'ai ta ngède ri noo Yesus, ta kako ke noo la lèku rutuu pa hed'apa Yesus, 23 nga lii huba, mihe ane, “Ruba ko we ne d'ara Muri Mone, rowi ne ana yaa do wobèni do pemuri henguru d'ue b'ue tèu, nèi do pèd'a ta mate ne hengaa neke. Tulu ko we Ama ta la pe'ie noo.”^a

24 Ta kako ke Yesus penau nga Yairu la èmu noo.

Ta d'ai roo ne pekèd'i, ae tèra ne dèu do pedute Noo, Hiku peb'èra-pewingi roo nga Noo ti heb'èka-heb'èka.

25 Ti telora dèu do ae do nahère, era he dèu wobèni do d'o pengaha nara do ra'i helama henguru d'ue b'ue tèu. 26 Èla èle ke ne b'ara nga doi noo, ne pake ta ma'i pa dote-dote do la pe'ie noo. Tapulara b'ule d'o do nara ta pe'ie noo. La'a ta juu mejèni we ne pèd'a noo. 27-29 Ne wobèni na ène, ae ke ne rèngi j'ara lua Yesus. Ta perub'i ke noo nga dèu do lowe he mij'e ta tade d'ae Yesus ti kej'unga. Ane pa d'ara pengee wobèni na ène, mihe ane, “Had'i ta d'ae we ri yaa ta b'uje ne b'ara pa ihi Noo, ta ie ma ne pèd'a yaa.”

Minahère ri noo ne d'ae ta b'uje ne b'ara pa ihi Yesus, pengaha d'ènge noo ne nara do ra'i. Ta toi d'ènge ke ri noo ta do ie ke. 30 Pa d'ara awe do na ène lema, toi ri Yesus ta do era kuaha do mèhu èni ti d'ara ngi'u Noo. Ta b'ari èni ke Noo la kej'unga, j'e keb'ali pa dèu lowe he, mihe ane, “Naduu muu do b'uje ne b'ara pa ihi Yaa?”

31 Ta lii ke ne ana aj'a Noo, mihe ane, “Heleo we ri Ama miha. Minahee ma ke ne ae dèu do pewingi. Ta keb'ali ri ko Ama ta, ‘Naduu do b'uje ne b'ara Yaa?’”

32 Tapulara pee ma Yesus nga heleo peheru ta kale toi ta naduu ne do èla peb'uje ne b'ara Noo. 33 Ta rènge ne lii Yesus minahère, kerij'i-kerègu ne wobèni na ène ri meda'u. Moko ke noo ta la lèku rutuu pa hed'apa Yesus, j'e kelolo nengaa ne do tao ri noo, mihe ane, “Ama! Yaa ne do b'uje b'ara Ama ngine.”

34 Ta lii ke Yesus pa wobèni do na ène, “Pelai ti parahaj'a tèra ina pa Yaa, Hiku ie ke ne pèd'a èu. B'ale we èu nga tunge-mengèlu d'ara.”

35 Pa d'ara nga pedai lii ko Yesus, ta dèka ke ne dèu pejuu ti èmu Yairu la pika pa Yairu, mihe ane, “Èla ke ne ana èu pehèpo hengaa. B'ole pehedue Ama Guru. Tenge d'oke Dokepai ne ta kako la nii.”

36 Ped'èno d'o Yesus nga lii pedai dèu do na ène. Ta lii ke Noo pa Yairu, “B'ole hedui ne pengee èu! Parahaj'a we èu pa Deo.” 37 Ta pe'uru èni ke Yesus ti ana aj'a Noo do wala he. Tituwata Petu, J'ako nga ari noo Johani we, ne do èba pedute Noo. 38 Ta d'ai roo la èmu Yairu, era ke ne dèu he do wiho-waho, era lema do tangi peloro èni do mèdu. 39 Ta maho ke Yesus la d'ara nee, j'e la lii, mihe ane, “Ta ngaa ke muu ne pewiho-waho, nga tangi peloro èni mihee? Naiki nane ad'o do made. Ne ta bèj'i hewe noo.”

40 Ta rènge ne lii pedai Yesus minahère, ta mare ta d'ole ke ri roo harièle.

Ta pereda ke Yesus pa roo hari-hari ta mèhu èni la tele. Ta pedoa ke ri Yesus ne ina-ama naiki ne nga do tèlu ana aj'a Noo, j'e maho roo la kama naiki do made nee. 41 Ta pèro ke ri Yesus ne wolaèba naiki nee, j'e pedai Noo pa d'ara lii rai Aram do pake pa ène, mihe ane, “Talita kum!” Ki pa d'ara lii rai di, “Ana wobèni! Kèd'i we!”

42-43 Ta kèd'i d'ènge ke, ne naiki nee, j'e kako. Ta lii ke Yesus pa ina naiki nee, “Wie ko noo nga'a!”

Harièle dèu do ngède ne lai do èla pe jad'i na ène, ta madalae ke roo. Tapulara, ta lara made ke ri Yesus pa roo, mihe ane, “B'ole la pedai j'e muu nga naduu-naduu ta do èla ke ri Yaa pe pemure wari noo!”