2 Huru-hapo lod'o na ène lod'o heb'aj'a do Jahudi. Ta maho ke Yesus la èmu heb'aj'a, j'e wie ne lii aj'a pa ène. Ae ne dèu do dèka la heb'aj'a pa lod'o na ène. Madalae harièle dèu do d'èno ne lii aj'a Noo. Pedai roo he dèu nga he dèu, mihe ane, “Mèu d'ara ti mii ke ne nara Dèu nad'ee? Lua pej'ara ti mii ne nara Noo? Minamii Noo ne nara ta tao madalae? 3 Tuka aj'u we Noo. Do tade ri dii, ina Noo, Maria; ne ari Noo he, J'ako, Jose, Juda nga Himo. Lema ne nawèni Noo. Harièle roo do rae dii!” Ri do minahère, wae d'o roo ta hème Noo.

4 Ta pedai lii ke Yesus, “Do petuu ke! B'ale dii dèu, rihi pekeb'ue dèu pejuu Deo ti rai do wala, tapulara dèu pejuu Deo do pa d'ara rae miha, pekeb'ue d'o.”^a

5-6a Tapulara d'ai tèra ne adu ade dèu pa nii, Hiku wae d'o roo ta parahaj'a pa Yesus. Ri minahère ke madalae Yesus ne adu ade roo, ku ped'elo d'o ri Yesus ne kuaha Noo pa nii, wala ti pe'ie do pèri dèu do pèd'a.

6b Ta pekèd'e ke Yesus la rae-rae do umu pa ène, la aj'a ne dèu he j'ara lua do d'èi Deo. 7 Ta pedoa ke ri Noo do henguru do d'ue ana aj'a Noo, j'e pejuu do d'ue-do d'ue ta la pepeke ne Lii Hag'a D'ara ngati Deo. Wie lema ri Noo pa roo ne kuaha ta hud'i wango. 8-9 Ta pereda ke ri Noo pa roo, “B'ole teo ta ègu pe'ae nengaa tuu lai kako muu. Tenge d'o ta ègu nga'a-nginu, doi, nga taa. Èba we muu kèji, pake helapa, nga b'aj'u pa ihi, j'e kako. 10 Kiri era dèu do hèmi muu pa èmu roo, pee we muu pa ène tade ta pekèd'i wari muu. 11 Tapulara, kiri d'ai muu la hewue rae, j'e dod'o wae ne dèu he ta hèmi muu, lema wae d'o ta ped'èno nga muu, kèd'i ti ène. J'e lii pa roo, ‘Pelai ta dod'o wae muu ta ped'èno, hape miha ri muu ne lai apa ne!’”^b

12 Ta kako ke roo la pepeke ne Lii Ha'ga D'ara ti Deo. La pika ri roo pa dèu he lii ta hani ne muri-mada do d'o mèd'i pa Deo, j'e muri-mada pa ruj'ara do d'èi Deo. 13 Hud'i lema ri roo ne wango he. J'e pehuti ri èi mènyi pa dèu do pèd'a he, j'e heb'aj'a roo mij'e ta ie. Ta ie ke ne pèd'a roo.^c

14 Pa d'ara awe do na ène, rèngi ke harièle dèu j'ara lua Yesus. Rèngi lema ke duae Herode, j'ara lua kuaha Yesus. Era dèu do lii, “Ta kuaha hengaa Johani mone peherani dèu, do muri wari pa d'ara Yesus. Pelai ri minahère ke Noo, ne nara ta tao harièle lua madalae.”

15 Tapulara era lema dèu had'e do lii, “Ad'o! Elia ke noo! Ki ad'o, hala he dèu mone ub'a ngati Deo rai uru he.”^d

16 Ta rènge ri duae Herode ne pedai roo j'ara lua Yesus minahère, moko ta lii ke noo, mihe ane, “Ne toi ri yaa, Johani mone peherani dèu, do hewari nee, èle ke ri yaa pepereda ta 'ète ne kètu noo. J'e nee ke noo, do muri wari!”

17-18 Ta ngaa duae Herode ne lii minahère, rowi pa awe do ludu, do èla pe jad'i lai mone ae nga Johani. Minahee ne lii ped'iri ne: Moko ke duae Herode ta peloje ihi-èmu ari noo, Pelipu, ne ngara noo Herodia. Tapulara pa awe na ène, ad'o dae Herodia do pehèg'i nga Pelipu. Taga rowi lai na ène ke, ne pekeb'ède loro-loro Herode ri Johani, mihe ane, “Ama duae, b'ole peloje ihi-èmu ari èu nee. Rowi ne wue ai èu nad'ee ad'o do pelèka nga had'a rai dii do Jahudi!” Tapulara ped'èno d'o Herode, Hiku banga èmu noo nga Herodia. Pelai ti minahère ke, ku pejuu noo dèu la kèpe Johani, j'e pemaho la èmu b'èdo.^e

19 Pelai ti pekeb'ède loro-loro ri Johani, ta tèka nui ke Herodia, j'e kale ruj'ara ta pemade Johani. Tapulara jad'i ded'o, ri Johani do pa d'ara èmu b'èdo ko. 20 Pereda lema ri Herode pa horod'ad'u he ta jage Johani pe woie.

Herode lema do d'ai meg'ig'i ri Johani. Do toi ri noo ta Johani nee, dèu pejuu Deo. Lema he dèu do mola ngee-mola d'ara. Mengèlu d'ara lema noo ne d'èno lii pedai Johani, maji lema ne lii pedai Johani ta pereja ne pengee noo.

21 Pedèka, pa d'ara he lod'o, ta nara ke Herodia ne awe kehoo do rihi woie, ta petobe ne lua pana d'ara noo pa Johani. Pa lod'o na ène, awe hari jad'i duae Herode. Ta pedoa ke ne dèu-dèu do mone ae pa propensi Galilea, ie ngati do pereda, kètu-kètu horod'ad'u, nga kètu-kètu rai. 22 Pa d'ara rame mengèlu d'ara do na ène, ta maho ke ne ana do wobèni ri Herodia la ledo. D'ai woie tèra ne ledo noo, Hiku tobo ri mengèlu d'ara Herode nga harièle dèu do pedoa ri noo. Ta èla pe ledo, ta pedoe ke ne ana wobèni ne ri duae Herode, j'e lii noo, “Pika we èu pa yaa, ami nengaa èu. Ta wie ma ri yaa! 23 Ta ame heb'èka rai pereda yaa, ta wie ma. Hupa yaa nga ngara Deo!”

24 Ta kako ke ne ana wobèni ne la keb'ali pa ina noo, mihe ane, “Wo mama! Ami nengaa ke dii pa papa, ne do rihi woie?”

Ane mama noo, “Naaa! Ame ne kètu Johani, b'oke ina tana ee!”

25 Ta la pedai ke ne ana wobèni ne nga Herode, mihe ane, “Papa, ee! Ame kètu Johani ri yaa mèd'a d'ee. Pèlo pa d'ara d'ula.”

26 Ta rènge ne lii ami na ène, lila nèd'a Herode. Tapulara i'a d'o ke noo, ta nyèke ne lii ami na ène, rowi èla ke noo pe hupa pa hed'apa dokepai do pedoa ri noo he. 27 Ta pereda ke Herode pa kètu horod'ad'u ta la 'ète ne kètu Johani pa d'ara èmu b'èdo. 28 Ta la 'ète ke ri roo ne kètu Johani, j'e ihe pa d'ara d'ula, j'e la wie pa ana wobèni nee. Hème rowi noo, j'e d'ede la wie pa ina noo. 29 Ta rèngi ne ana aj'a Johani ta do èla ke pe'ète ne kètu noo, ta kako ke roo la ègo ne ngi'u noo j'e la pedane.

Minahère ke ne lii ped'iri j'ara lua made Johani.

30 Pa d'ara he lod'o, ta b'ale ke ne ana aj'a do pejuu ri Yesus he, la peteni wari hela'u nga Noo. Ta ped'iri ke ri roo hari-hari ne do èla pe tao, nga do aj'a ri roo.

31 Tapulara pa awe do na ène, ae tèra ne dèu do pe holi-hoo la kale Yesus, Hiku b'ule d'oke roo nga awe kehoo ta pengaha ta nga'a. Ta lii ke Yesus pa ana aj'a he, mihe ane, “Mai we dii la kale era do kehii mij'e nara ko dii ta pengaha ihi hudi he.”

32 Ta pekèd'i ke roo j'ara kowa la kale era do kehii, do j'èu ngati d'ara rae.

33 Tapulara do ngèdi ri dèu lowe he ne kowa do ha'e Yesus he, do ore ne ngidi èi lobo nee. Ta mèhu èni ke roo ti d'ara rae, j'e kako pe'uru èni la era do ta penawu kowa Yesus he. 34 Minahère Yesus ne puru ngati d'ara kowa, ta ngèdi ke ri Noo ne dèu lowe he do mate Noo. Ta ruba ke ne d'ara Noo nga roo, rowi ne dèu lowe he era mii ki'i j'awa do d'o b'ule nga mone b'ata he ke, Hiku toi d'o ke nengaa ne do madae ta tao ri roo. Moko ke Yesus ta aj'a roo j'ara lua do d'èi Deo,^f 35-36 rai ti nètu lod'o hape la mèd'a lod'o. Ta lii ke ne ana aj'a he pa Noo, mihe ane, “Ama! Umu ke ta jèna ne lod'o. Ne era nad'ee do kehii, lema do j'èu ngati rae-kowa. B'ule d'o nga'a-nginu pa d'ee. Pejuu kowe ne dèu lowe he la wèli nga'a pa rae-kowa do umu pa d'ee.”

37 Ane Yesus pa roo, “B'ole teo ta pejuu ne dèu he! Ta penga'a ri muu we ne dèu he!”

Ta keb'ali ri ke roo, mihe ane, “Ama ee! Kiri penga'a ri j'ii ne dèu do minahee ne worèwu ae, d'ai ae doi ne do ta pake ri j'ii! Hela'u nga gaji tuka natuu he wue tèu!^g Minamii ke j'ii ne nara doi do minahère ne ae!”

38 Ta lii rike Yesus pa roo, “La kale toi ko ri muu, naduu do nga èba nga'a.”

Ta èla ri roo pe kale toi, ta b'ale ke roo la pika pa Yesus, mihe ane, “Era lèmi b'ue roti, nga d'ue ngi'u nadu'u we.”

39 Ta lii ke Yesus pa dèu he harièle ta mejèd'i pa kolo j'u'u he, hekewolo-hekewolo. 40 Moko roo ta mejèd'i pedute ne lii Yesus. Pa d'ara he kewolo, era do hengahu, era lema do lèmi nguru dèu.

41 Ta èba ke ri Yesus ne roti do lèmi b'ue, nga nadu'u d'ue ngi'u he. J'e tengara Noo la liru ta peha'e lii ie ae pa Deo. Èla pe minahère ta pipe ke ri Noo ne roti he, j'e wie pa ana aj'a he ta peb'agi pa dèu he hari-hari. Minahère lema ne nadu'u he. 42 Ta nga'a ke roo harièle tade b'èhu. 43 D'ai roo ne èla pe nga'a, ta pekupu ke ri ana aj'a he ne nga'a do rihi he. Tobo henguru d'ue hope ne ae.

44 Ne dèu do nga'a he, ne pe'ira era ma do lèmi tèb'a dèu momone; reke d'o wobèni nga naiki.

45 Ta moko harièle ne lai nahère, ta pejuu ke ri Yesus ne ana aj'a Noo la ha'e kowa, mij'e ta uru la heb'èka èi lobo, la rae Betsaida. Pe leto èni ko Yesus mij'e ta pejuu ne dèu do lowe he ta b'ale. 46 Ta b'ale harièle dèu, ta ha'e ke Noo la hewue lede j'e la heb'aj'a pa ène.

47-50 D'ai ta mèd'a, ta puru ke Yesus. Ngèdi ri Noo ne kowa ana aj'a he, do d'ai ke la telora èi lobo nee. Era ke roo nga tuku hetenga made ne kowa nee, rowi awe na ène do rihi mèdu ngèlu d'uru. Umu ta mèu rai, ta kako ke Yesus nèru pa kolo èi, la dutu ne ana aj'a he. Ta d'ai Noo ne umu ta hihu ne kowa roo, moko ta ngède ke Noo ri roo. G'ig'a tèra roo. Ta pekeb'ali ke roo he dèu nga he dèu, mihe ane, “Heleo ko ri muu! Nengaa ke na nii? Wango ke na nii, we nengaa?”

Tapulara ta lii d'ènge ke Yesus, “B'ole meda'u muu! Yaa ma na d'e rii!”

51 Ta d'ai Yesus ne ha'e la d'ara kowa nee, milu d'ènge ne ngèlu. Madalae tèra ne ana aj'a he harièle. 52 Maji lema ri roo ta èla pengède ne kuaha Yesus ne penga'a do rihi ngati lèmi tèb'a dèu, tapulara tade ded'o ri roo nga petuu ne kuaha Noo, pelai ta do adu ade-pengee roo.

53 Ta d'ai roo la heb'èka èi lobo, ta penawu ke ne kowa roo pa ngidi èi lobo pa rae Genesare. 54 Minahère roo ne puru ti d'ara kowa, ae ne dèu pa ène do ngèdi roo. Ta petoda ke roo, “Nee ke Yesus, ó!” 55-56 Ta perai ke roo la pepika pa hari hewue rai na ène. Ta dèka ke ne dèu lowe he, nga merèi ne dèu-dèu do pèd'a he.

Had'i ta rèngi we ri roo ta Yesus do era pa he èhi era, ta ègu ke ri roo ne dèu do pèd'a he j'e la pebèj'i pa keb'èla. Ane pa d'ara lai pengee roo, “Had'i ta d'ai we ta b'uje ne b'ara pa ihi Noo ri do pèd'a he, do ta ie ma roo.” Harièle dèu do nara ta b'uje ne b'ara pa ihi Noo, ie d'ènge ne pèd'a roo.